Notas de prensa

Unha exposición reúne un conxunto de autorretratos xurdidos dunha reflexión colectiva

Este taller teórico-práctico propuña afondar no autoconcepto a través da creación artística e 'chegar ao autobiográfico a través da interacción cos demais', dando como resultado un conxunto de obras 'moi diversas', como recoñece a tamén comisaria desta exposición, que poderá visitarse ata o 4 de abril.

A ilustración, a fotografía, o vídeo ou o traballo con materiais atopados ou con obxectos que forman parte da memoria persoal das artistas fanse presentes na mostra que se inaugura na tarde deste martes. Nela reúnense unha vintena de obras de Patricia Álvarez, Uxía Bustbem, Celeste Garrido, Mónica Lago, Pablo Martínez, Candela Omil, Paula Romay, Miriam Rodríguez e Jimena Rodríguez. As súas creacións preséntase á súa vez acompañadas por unha serie de materiais que permiten achegarse “aos procesos de traballo e dinámicas de creación destes autorretratos” dun obradoiro inserido na programación de extensión universitaria da Vicerreitoría do campus e impartido por Vázquez xunto coa docente e cineasta Xisela Franco. Con esa mesma idea, unha serie de códigos QR permiten acceder a arquivos sonoros que reúnen as reflexións de varias das participantes respecto de cuestións como o que significa a creación ou cales son as súas características e límites.

De carácter teórico-práctico, este taller tiña como obxectivo “afondar no carácter transformador da práctica artística contemporánea”, converténdose nun “espazo de experimentación, investigación a aprendizaxe conxunta”, sinala Vázquez, no que reflexionar sobre “o carácter performático da creación e a dimensión que adquire o autobiográfico na teoría, crítica e prácticas artísticas feministas”. Aberta á toda a cidadanía, esta actividade reuniu tanto estudantes da facultade como “artistas xa consagradas” e cos que as responsables deste taller buscaron promover unha reflexión “sobre as que ideas que temos sobre a creación e en que lugar nos sitúan”, tratando de que “a capacidade lúdica fose destronando en certa maneira á idea da creación con maiúsculas”, sinala Vázquez. Partindo do “carácter performático da creación”, obradoiro levou a reflexionar sobre o papel do propio corpo nos procesos artísticos ou sobre o papel que “ten o autobiográfico e o persoal” nas prácticas artísticas feministas. Tratábase nese senso, dun “curso no que dabamos prioridade aos propios procesos”, recoñece Vázquez, e que deu lugar a “sesións mesmo bastante catárquicas”, mais tamén “a pezas que merecía e pena mostrar”.

Retratos que xorden de pór en cuestión a idea de identidade

“Quizais o máis interesante do taller foi esa idea de chegar ao autobiográfico a través da interacción cos demais, chegar ao tema da identidade a través pequenas performances en grupo”, salienta Vázquez. Nese senso, tanto a “idea de xogo” como a “aproximación ao retrato a partir do común” fanse presentes na maioría das obras que integran esta exposición, resultado de exercicios e dinámicas que buscaban impulsar “propostas artísticas interdisciplinares baseadas na propia biografía” e quen nalgúns dos casos deron lugar a obras nas que as e os participantes continuaron traballando tras o obradoiro. Este conxunto de pezas afátase, de feito, “desa idea de identidade predeterminada que nos ensinaron”, amosándoa como algo “cun carácter bastante máis procesual, que está continuamente cambiando”, salienta a súa comisaria.

“Debuxando un futuro en igualdade”

Verse outra vez ao revés tamén funciona toma o relevo na sala O Abrigo da exposición Retratos de mujeres artistas, unha mostra comisariada pola catedrática Yolanda Herranz que permitiu achegarse ao labor que a presidenta da asociación de mulleres artistas Blanco, negro y magenta, Concha Mayordomo, leva a cabo desde hai máis dunha década no espazo web Mujeres en el arte. Nesta páxina reúne máis de 1100 pequenas biografías de artistas de diferentes épocas, boa parte delas acompañadas de retratos como os 59 que puideron verse na facultade ou os que desde este mércores 26 exhíbense no Museo Municipal Manuel Torres de Marín. Comisariada tamén pola Catedrática de Escultura, a exposición Mujeres artistas. Dibujando un futuro en igualdad poderá visitarse ata o 30 de abril e insírese na programación do festival multidisciplinar Ellas Crean, que se leva a cabo en múltiples puntos de España.