jueves, 4 de diciembre de 2025
Malia todo, e pese a que a Taxa de Actividade Emprendedora (TEA) é menor que nos ámbitos urbanos, a de mulleres emprendedoras é maior no rural (7,7%) que nas poboacións de máis de 10.000 habitantes (5,8%), conforme revelan os datos ofrecidos polo equipo.
O documento presentárono este martes na sede da Confederación de Empresarios de Galicia en Santiago as profesoras da USC Loreto Fernández, directora do equipo GEM Galicia, e Isabel Neira Gómez, directora técnica do informe, xunto con Nuria Calvo, da Universidade da Coruña, directora técnica de GEM España. Ao acto asistiron o reitor da USC Antonio López, o presidente da CEG, Juan Manuel Vieites, e a directora xeral de Traballo Autónomo e Economía Social da Xunta, Marta Mariño.
Datos positivos
En termos xerais, o equipo GEM destaca no seu informe que 2023 foi un ano moi positivo para a actividade emprendedora en Galicia e con melloría respecto ao anterior, cunha TEA que se sitúa nun 6,4% (6,6% homes e 6,1% mulleres) e cun 27% de persoas que aprecian oportunidades para emprender. Mais coa análise dende a perspectiva de xénero, o informe advirte de que a TEA feminina pasou do 6,7 en 2022 ao 6,1 en 2023, un cambio que veu acompañado por unha caída na percepción de oportunidades para emprender: só o 23% das mulleres perciben oportunidades na contorna fronte ao 35% dos homes, matizan.
O perfil da poboación emprendedora é de xente nova (o 45% ten entre 35-44 anos), con actividade orientada a empresas de servizos ao consumidor (48%) e maioritariamente micro-pemes (o 45% ten entre 1-5 empregados), con formación universitaria (35%) ou estudos de formación profesional (21%). O 7% das persoas emprendedoras presenta algún tipo de discapacidade e o 13% son inmigrantes. A forma xurídica maioritaria é a de autónomos (66%), sendo o 23% Sociedade Limitada e o 4% empresas de economía social. Ademais, o 10% destas iniciativas de nova creación pertencen a sectores con nivel tecnolóxico medio-alto e entre o 26-28% son innovadoras en procesos ou produtos.
Entre outras cuestións, o monográfico sobre a situación no rural que inclúe o informe sinala que en Galicia tres de cada catro persoas que viven nesa contorna ven dificultades para emprender, e o principal motivo para ser unha persoa emprendedora é o de buscar unha alternativa laboral que evite abandonar a súa zona vital, na que frecuentemente o traballo escasea.
GEM Galicia
O equipo de investigación GEM Galicia estuda o emprendemento na comunidade e realiza informes anuais para apoiar e impulsar iniciativas emprendedoras. Ten a súa sede na Universidade de Santiago de Compostela e conta con persoal investigador das tres universidades galegas, ademais de formar parte do Observatorio de Emprendemento de España (Red GEM Spain) e do consorcio Global Entrepreneurship Monitor Global (GEM Global).
O seu informe anual, que conta co apoio da Xunta de Galicia e a colaboración da Confederación de Empresarios de Galicia, elabórase a partir dos datos recollidos de 2.000 persoas adultas e dun panel de expertas e expertos dos distintos ámbitos do sistema emprendedor galego.
O Centro Dramático Galego presenta esta semana no Salón Teatro Berenguela na gaiola, unha coprodución entre a compañía pública, Galeatro, Xarope Tulú e o Festival Internacional Outono de Teatro (FIOT), que foi recoñecida co Premio Manuel María de Proxectos Teatrais 2024. A obra está escrita e dirixida por Paula Carballeira, Premio Nacional de Literatura Dramática, e chega ao escenario compostelán tras a súa estrea os pasados 26 e 27 de setembro en Carballo. Berenguela na gaiola contou, ademais, con residencias técnicas e artísticas tanto no Salón Teatro como no FIOT, que foron claves para o seu proceso de creación.
O 84,3% das persoas de Galicia de 5 a 15 anos utilizou dispositivos electrónicos nos últimos 3 meses, e a porcentaxe sube ata o 94,8% no caso das de 10 a 15 anos. Os datos do estudo Rapaciñ@ dixitais. Edición 2024 elaborado polo Observatorio da Sociedade da Información en Galicia (Osimga), adscrito á Axencia para a Modernización Tecnolóxica de Galicia indican que o nivel de dixitalización nestas idades recupera a tendencia ascendente tras a baixada detectada en 2023.
