Notas de prensa

A atención persoal e a accesibilidade, claves na elección de supermercado polas persoas maiores en Galicia

A experiencia de compra das persoas maiores en Galicia realizado pola Cátedra Cruz Roja USC e Vegalsa–Eroski, que ten como obxectivo valorar a experiencia de compra das persoas maiores, a atención que se realiza desde os establecementos e a accesibilidade aos mesmos.

Ademais, o estudo amosa que as experiencias positivas das persoas consumidoras de máis idade se relacionan estreitamente coa conexión social, é dicir, coa interrelación que se ten coas persoas que nos rodean. Mentres, aspectos relacionados coa ergonomía e a accesibilidade son os que máis lles dificultan a compra ás persoas maiores, desde o punto de vista do persoal dos supermercados de proximidade.

A solicitude de axuda adoita estar relacionada con aspectos referidos á accesibilidade como a dificultade de comprensión de etiquetas, ofertas, cartelería, etc, así como na dificultade para atopar produtos nos andeis. Ademais, no proceso de caixa ponse de relevancia a solicitude para aspectos relacionados co peso da compra, a altura da cinta e os medios tecnolóxicos e telemáticos, entre outros. Observáronse posibles melloras á hora de incrementar a accesibilidade e a usabilidade dos establecementos, como a adaptación auditiva das caixas e básculas, o incremento do tamaño da letra no tícket de compra ou a instalación de portas corredeiras nas cámaras frigoríficas.

As conclusións mencionadas permitíronlle á Cátedra Cruz Roja USC realizar un decálogo de recomendacións que será implantado nos supermercados de proximidade Eroski Center Galicia e que inclúe, entre outros aspectos, crear un ambiente seguro e de confianza para as persoas maiores, falarlles con empatía e respecto, ou axudalas se se desorientan utilizando unha comunicación clara e amigable.

Tal e como explicaron Onésimo Juncos Rabadán, codirector da Cátedra Cruz Roja USC, e Trini de Lorenzo Otero, secretaria técnica da Cátedra Cruz Roja USC, o estudo achega conclusións moi interesantes que servirán para fomentar as boas prácticas do persoal do supermercado de proximidade na atención á clientela de maior idade, así como identificar posibles melloras. Na presentación estiveron tamén o director da Cátedra Cruz Roja USC, Arturo X. Pereiro Rozas; a directora de Responsabilidade Social Empresarial, Comunicación e Cliente de Vegalsa-Eroski, Gabriela González Márquez; a presidenta de Cruz Roja en Galicia, Mercedes Casanova Díaz; e o director xeral de Maiores e Atención Sociosanitaria da Xunta de Galicia, Antonio Acevedo Prado.

O estudo é o primeiro que se realiza en Galicia recollendo tanto o punto de vista das persoas consumidoras sénior como das que traballan no sector dos supermercados de proximidade. Realizouse cunha mostra de máis de 500 persoas participantes, que incluía 293 con 60 e máis anos que acudiron a 38 supermercados de proximidade dos supermercados Eroski Center en Galicia (61,8% mulleres) e 259 integrantes do equipo desta insignia de Vegalsa-Eroski cun posto relacionado coa atención directa ao público.

Mediante a realización de dúas enquisas diferenciadas, ao analizar os hábitos de compra observouse que a frecuencia coa que acode a persoa ao supermercado para realizar as súas compras e a adquirir produtos frescos está asociada co número de habitantes da localidade de residencia: canta máis poboación ten a localidade de residencia, acódese con maior frecuencia ao supermercado de proximidade.