Notas de prensa

A Axencia Espacial Europea supervisará o desenvolvemento da misión espacial BIXO de UVigo SpaceLab

A misión espacial BIXO é un dos seis proxectos seleccionados para participar no programa Fly Your Satellite! Design Booster Pilot da Axencia Espacial Europea, o que supón que este equipo, composto por preto de 40 estudantes de diferentes titulacións da UVigo, vai contar co apoio de especialistas do máximo nivel durante o desenvolvemento da misión, así como con toda a experiencia e as facilidades das que dispón a axencia.

“É dicir, a ESA vaise implicar de cheo no peche do deseño e na parte da testaxe do satélite”, explica Manuel Diz, coordinador do proxecto, tremendamente satisfeito con este novo éxito para o equipo, que se suma a outros logros recentes como o feito de ter sido seleccionados pola Academia chinesa de tecnoloxía de vehículos de lanzamento para ser enviado ao espazo en 2024.

Competían con outros 11 equipos de estudantes de diferentes universidades europeas (doce incluíndoos a eles), dos que só seis pasaron a criba: o equipo da Universidad Carlos III de Madrid e o resto de centros de Suíza, Italia e Romanía. “Aínda que competiamos contra equipos que xa tiñan experiencia no lanzamento de satélites, a ESA continuou apostando pola nosa misión” apunta Diz, quen sinala que o apoio da ESA vailles garantir que a carga útil do satélite e, máis en concreto, a súa parte biolóxica e microfluídica “se poida consolidar e comezar a converter o que agora son prototipos en futuros modelos de voo para estar en órbita”.

Ano e medio de asesoramento e acceso ás instalacións da ESA

O asesoramento da ESA chegará en formato híbrido, incluíndo tanto formación en liña como a realización das probas dos prototipos nas súas instalacións, xa que o programa dálles acceso a todos os instrumentos e facilidades da ESA para facer probas de certificación en condicións espaciais.

O programa ten unha duración dun ano e medio e durante este tempo a ESA acompañará en todo o momento aos integrantes de UVigo SpaceLab no desenvolvemento da misión. “Estas revisións/cursos/formacións e probas son supervisadas por expertos da axencia que están ou estiveron en misións previas”, aclara Diz, quen fai fincapé en que contarán co apoio destes especialistas en todas as cuestións relativas ao desenvolvemento do proxecto, “desde a avaliación dos deseños dos distintos sistemas que compoñen o satélite e as súas interfaces ata a preparación das probas de vibracións e termobaleiro coas que se cualifican este tipo de sistemas, por citar só dous exemplos”.

Desde UVigo SpaceLab valoran especialmente o feito de ter acceso a este asesoramento por parte de profesionais de alto nivel. “Cando desenvolvemos unha misión espacial sempre nos enfrontamos a grandes retos e dúbidas e un deles é atopar a persoas que poidan axudarnos, xa que ao ser un equipo de estudantes o noso fin é aprender e, para logralo, temos que contar con eses coñecementos, que, neste caso, nos chegan desde a ESA”, explica o responsable do equipo.

BIXO é o satélite máis pequeno que se quere pór en órbita con este tipo de cargas biolóxicas, xa que ata o de agora a NASA e o resto de axencias que desenvolveron satélites deste tipo fixérono cun tamaño maior, é dicir, cun formato cubesat 3U (30X10X10 cm) e desde UVigo SpaceLab farano en 2U (20x10x10 cm), o que supón un reto adicional polo compacto que será todo o sistema.

“Demostra que a Universidade de Vigo e os seus estudantes seguen unha carreira espacial que nos pon no mapa”

Os resultados que acadaron ata o de agora nos diferentes concursos e programas nos que levan participado indícanlles que van na dirección correcta. “Recibir a misión por parte da IAF, a Federación Astronáutica Internacional, e da CSA, a Academia Espacial de Vehículos de China, mediante o premio que nos permite poder lanzar o noso satélite a órbita foi unha grande ilusión para nós, pero ver que outra axencia internacional como a ESA admitiu a nosa participación neste programa demostra que a Universidade de Vigo e os seus estudantes seguen unha carreira espacial que nos pon no mapa, non só a nivel europeo senón mundial”, indica Diz.

Unha vez anunciados os proxectos que van participar no programa, nas vindeiras semanas recibirán novas indicacións da ESA, incluíndo a valoración a toda a documentación presentada ata o de agora –que lles permitiu ser un dos proxectos seleccionados- e explicacións relativas aos pasos que deben seguir para preparar a seguinte revisión do proxecto por parte das persoas expertas.

Porta aberta a que novos patrocinadores se sumen ao proxecto

En canto ao estado actual do desenvolvemento do proxecto desde o equipo indican que no relativo á plataforma do satélite están traballando en conxunto coas empresas Alén Space, spin-off da UVigo, e DHV Technologies na integración do ordenador de abordo (OBC), o sistema das comunicacións (TTC) e o subsistema de potencia (EPS e paneis solares) e estrutura. Polo que respecta á carga útil de BIXO, seguen a ultimar os deseños da cámara presurizada na que irá toda a electrónica de control e sistemas microfluídicos. De forma complementaria, seguen tamén a probar as condicións e viabilidade das bacterias coas que traballan xunto ao Grupo de NanoBioMateriais Funcionais (FunNanoBio) do Cinbio para a creación do liófilo –bacteria en estado durminte- que se activará en órbita para iniciar o experimento.

Esta novo impulso que agora lle dá a ESA agardan que sirva tamén para que novas empresas se animen a participar e colaborar co proxecto, xa que desta maneira non só colaboran co desenvolvemento desta misión, senón que teñen tamén a oportunidade de colaborar estreitamente con todos estes organismos internacionais. “A colaboración con nós permite que os seus produtos poidan utilizarse no noso satélite e deste xeito probar o seu funcionamento en voo”, recalca o estudante.

Universidade de Vigo, 2022-12-22

Actualidad

Foto del resto de noticias (mitec-42-2025.jpg) A Mostra Internacional de Teatro Cómico e Festivo de Cangas presentou hoxe a programación da súa 42ª edición, que se celebrará entre os días 22 de xuño e 6 de xullo no Auditorio Municipal Xosé Manuel Pazos Varela, así como nas rúas e noutros espazos da vila do Morrazo, que acollerán 26 espectáculos e un nutrido programa de actividades lúdicas e sectoriais. O certame, organizado desde 1984 pola Asociación Cultural Xiria, é un dos poucos festivais de teatro europeos cuxo principal selo de identidade é a comedia, unha marca consolidada e referente da produción escénica deste xénero en calquera das súas vertentes: negra, branca, xestual, contemporánea, circense, dramática, musical e, dende hai máis dunha década, tamén na danza.
Foto de la tercera plana (musica-clasica.jpg) A praza Conde de Fontao de Foz será o enclave elixido para a actuación extraordinaria do festival o 31 de xullo con La Carroza Del Real, mentres que o destacado pianista Denis Kozhukhin abrirá oficialmente o ciclo de concertos o 12 de agosto na Fortaleza de Alfoz. O 13 de agosto a Real Filharmonía de Galicia e o Coro da Comunidade de Madrid realizarán o primeiro concerto sinfónico-coral no que interpretarán o Réquiem de Mozart na Catedral de Mondoñedo. A clausura do XII Festival Bal y Gay será co barítono galego Borja Quiza, o 21 de agosto, no Teatro Pastor Díaz de Viveiro, cita na que tamén participarán o pianista Javier Carmena e a mezzosoprano Andrea Rey, nunha proposta que mesturará as raíces galegas e españolas.

Notas

Afondar no papel que a evidencia científica pode e debe xogar nas decisións políticas e na implantacións de políticas públicas foi o obxectivo central da conferencia impartida pola presidenta do Consejo Superior de Investigaciones Científicas, Eloísa del Pino, na UVigo. Sustentar as actuacións públicas na ciencia, defendeu Del Pino, posibilita en primeiro termo 'ser eficiente cos recursos, porque sabes que é máis probable que unha política funcione, aínda que non é unha garantía de éxito'.
A Sociedade Europea de Biomateriais recoñeceu cun dos seus premios europeos de doutoramento Julia Polak 2025 a Ana Iglesias Mejuto e Miguel Pereira Silva, que realizaron a súa tese de doutoramento en iMATUS da USC. O galardón distingue persoal investigador novo que completou un doutoramento de excelencia no ámbito dos biomateriais e a enxeñería de tecidos, valorando tanto a calidade da súa investigación como a súa formación internacional.
ACTUALIDAD GALICIADIGITAL
Blog de GaliciaDigital
PUBLICIDAD
HOMENAXES EGERIA
PUBLICACIONES