Notas de prensa

A Semana da Ciencia do IGFAE conmemorará o décimo aniversario do bosón de Higgs

Titulada ‘Celebrando 10 anos do bosón de Higgs: explorando o universo temperán no CERN’, a conferencia terá lugar o xoves 24 de novembro ás 20.00 horas no auditorio Abanca (Rúa Preguntoiro, 23) de Santiago de Compostela. A entrada será de balde previa reserva de invitación nesta ligazón, ata completar capacidade. Haberá tradución simultánea do inglés ao castelán.

“O descubrimento do bosón de Higgs non foi o final dunha longa viaxe, senón que é o comezo da exploración dun novo terreo”, explican dende o IGFAE. Que ten de especial esta partícula? É realmente o bosón de Higgs o que se detectou? Que hai que investigar despois do descubrimento e como axuda esta partícula na comprensión do universo primitivo? Por que o bosón atrae tanto a atención do persoal científico e público? A charla abordará estas cuestións e tamén analizará os retos futuros neste eido investigador.

Nerd Nite

O décimo aniversario do descubrimento do bosón de Higgs será tamén a temática arredor da que xirará a vindeira Nerd Nite, que o mércores, 23 de novembro, regresa logo do parón obrigado por mor da pandemia. Rolf Heuer será un dos relatores que integrarán o programa desta sesión que se artella en base a pequenas charlas científicas onde especialistas dialogan co público das disciplinas que lles apaixonan fóra do ámbito académico, nun ton distendido e en horario nocturno. A sesión do día 23, desenvolverase na Nave de Vidán, ás 20.30 horas, e está organizada conxuntamente co IGFAE.

Ademais de Rolf Heuer, quen pronunciará o relatorio ‘Sabía que o tiñamos (I knew we had it)’, intervirán na Nerd Nite o profesor da USC e investigador do IGFAE, José Edelstein, e Pier Paolo Giardino, investigador distinguido do IGFAE. ‘O segredo está na masa’ é o título da intervención do profesor Edelstein; mentres que Giardino disertará sobre ‘O bosón de Higgs, unha luz na escuridade’. As Nerd Nites naceron hai anos en Estados Unidos, unha proposta orixinal á que se sumou Santiago de Compostela en 2012, sendo a primeira cidade española en facelo. O coordinador das Nerd Nites é o catedrático de Electromagnetismo da USC, Jorge Mira Pérez.

Traxectoria

Rolf-Dieter Heuer (Göppingen, Alemaña, 1948) estudou física na Universidade de Stuttgart e doutorouse na Universidade de Heidelberg. De 1978 a 1983, foi físico investigador na Universidade de Heidelberg, traballando no anel de almacenamento de electróns-positróns PETRA como membro da colaboración JADE. De 1984 a 1998, foi membro do CERN, traballando para a colaboración OPAL no Gran Colisionador de Electróns e Positróns (LEP). Dende 1994, foi o voceiro da colaboración.

Gran parte da súa carreira estivo relacionada coa construción e o funcionamento de grandes sistemas de detectores de partículas para estudar colisións electrón-positrón. Ao deixar o CERN en 1998, asumiu unha cátedra na Universidade de Hamburgo, onde estableceu un grupo que traballa na preparación de experimentos nun posible futuro colisionador lineal de electróns e positróns. Ao asumir o seu nomeamento como director de investigación de física de partículas e astropartículas no DESY en 2004, Heuer foi responsable da investigación no acelerador HERA, a participación do DESY no LHC e a I+D para un futuro colisionador de electróns e positróns. En 2009 substituíu a Robert Aymar como director xeral do CERN e en 2015 Fabiola Gianotti pasou a ser a directora ata a actualidade.