jueves, 15 de octubre de 2026
Cun limiar do profesor e escritor Ricardo Polín, máximo coñecedor de Fientosa e a súa obra, o libro comprende un exhaustivo estudo lingüístico e literario do profesor e poeta Xosé Otero Canto (nado tamén no concello de Castro de Rei, na Ponte Outeiro) dos poemas do autor que foi chamado o "Lorca galego", e que tivo tamén tráxico final no convulso Madrid de 1936, aos 24 anos de idade.
A versión ao castelán foi do propio Otero Canto; ao catalán e portugués estivo a cargo de Anamar Rábade, escritora, investigadora da Cultura Celta e historiadora; e ao éuscaro verqueunos o profesor e tradutor Aitor Fernández de Martikiorena Rodríguez. E cada poema leva como complemento ou contrapunto un minimalista e fermosísimo debuxo da profesora e artista vilalbesa María Guerrero. Todas estas aportación conforman un libro fondo e fermoso que se titula IMOS COLLER NIÑOS NOVOS
, que é o primeiro verso do primeiro poema en galego de Francisco de Fientosa.
O libro ven de presentarse na Biblioteca pública de Castro de Rei, berce do escritor homenaxeado (acto ao que corresponde a primeira foto), no que interviñeron o Alcalde de Castro de Rei, Francisco Javier Balado; Secretario Xeral de Política Lingüística, Valentín García Gómez; Xosé Otero Canto, Anamar Rábade, Ricardo Polín e Xulio Xiz, polo Colectivo Egeria. Na presentación en Lugo (segunda foto), na Biblioteca Pública provincial, interviñeron María José Gómez Rodríguez, Xefa provincial de Cultura; Alcalde de Castro de Rei, Xosé Otero Canto, Anamar Rábade, Ricardo Polín e Xulio Xiz.
Un total de cinco candidaturas galegas optan como finalistas aos XIX Premios Nacionais de Artesanía, convocados polo Ministerio de Industria, Comercio e Turismo. Galicia convértese así na comunidade con máis finalistas, con candidaturas en catro das cinco categorías. En concreto, os ceramistas Barreiros Artesanía e a deseñadora e redeira Amalia Puga optan ao Premio Produto, mentres que Sandra Vilas é candidata por segundo ano consecutivo ao Premio Emprendemento. Na categoría Promociona para Entidades Privadas, resultou finalista a asociación APAMP e a súa marca A Casa Rodante; e no Promociona para Entidades Públicas, é candidata a Fundación Pública Artesanía de Galicia.
O conselleiro de Presidencia, Xustiza e Deportes, Diego Calvo, anunciou que a Xunta vai desenvolver o título II da Lei de Xuventude de Galicia' para mellorar a calidade dos servizos que se prestan á mocidade galega con medidas para 'incrementar o número de monitores nos campamentos ou flexibilizar os requisitos para poder exercer este traballo'. Así se recolle no proxecto de decreto co que se actualiza o segundo título desta normativa que foi avaliado hoxe no Consello da Xunta e que se publicará nos vindeiros días no Diario Oficial de Galicia 'despois dun longo proceso de participación e diálogo cos axentes implicados' a través de distintos espazos de escoita activa.
