lunes, 15 de junio de 2026
A Biblioteca Municipal Varela Jácome de Lalín acollerá o venres a presentación do libro gañador do IV Concurso Balbino de Relatos, B.S.O. Banda Sonora Orixinal, da autoría de Pablo Nogueira. O acto contará coa presenza do profesor e escritor Xoán Carlos García Porral; a tamén profesora e escritora Charo Golmar; o presidenta da Fundación Xosé Neira Vilas, Fernando Redondo; a concelleira de Cultura do Concello de Lalín, Begoña Blanco; e o autor do libro, Pablo Nogueira.
A obra
A música vertebra e estrutura B.S.O. Banda Sonora Orixinal, por cuxa partitura discorren a modo de notas discordantes unha serie de personaxes cun certo pasado pero cun incerto futuro, sempre tentando encaixar nos espazos e nas liñas xustas do pentagrama.
Unha estrutura traballada con prosas que se enlazan entre si, dando o final dunhas pé ao comezo doutras de xeito que os distintos capítulos se suceden coma se fosen escenas curtas dunha película, pequenos fragmentos dunha mesma historia pero sempre cosidos polo fío da música, sendo o cine o outro eixo esencial desta obra.
Unha unión entre a música e o cine nun marco xeográfico particular e nun contexto social moi concreto, que fai ás veces de fonte de inspiración esencial para unha novela marcada pola calidade e eficiencia da súa escrita nunha intelixente integración de abondosas referencias ao mundo musical e cinematográficas.
Colaboracións
Este libro, publicado por Edicións Fervenza, foi a obra que resultou gañadora do Concurso Balbino de Relatos, no que colaboran a Consellería de Cultura, Educación e Ordenación Universitaria, a Secretaría Xeral de Política Lingüística da Xunta de Galicia, o departamento de Cultura e Lingua da Deputación de Pontevedra, o Concello de Boqueixón, o Concello de Vila de Cruces e a Fundación Xosé Neira Vilas.
Pablo Nogueira (O Carballiño, 1987)
Influído polos seus irmáns comeza, xa de cativo, unha gran paixón pola música e a lectura que desembocará nun amor incondicional polos libros.
En Compostela estuda Maxisterio, Psicopedagoxía e Mestrado en investigación en educación, diversidade cultural e desenvolvemento comunitario. Exerce de mestre no ensino público e compaxina esta labor coa súa afección á música, dentro da banda de rock Susie Qs, colaborando tamén no proxecto instrumental Acuario Sonoro.
A súa faceta literaria chega coa publicación de dous títulos infantís para a estimulación da linguaxe oral en galego, Nube Branca quere ser astronauta (Baía Edicións, 2018) e A banda de Raimunda (Baía Edicións, 2019). Actualmente vén de gañar o IV Concurso Balbino de Relatos coa obra B.S.O. Banda Sonora Orixinal (Edicións Fervenza, 2019).
Foron presentados os novos equipamentos do Centro de Supercomputación de Galicia) instalación que vai incorporar un segundo computador cuántico, denominado IQM Spark. O novo supercomputador e os dous novos computadores cuánticos que se van adquirir situarán a nosa Comunidade na vangarda europea en canto a capacidade de almacenamento de datos e participación en grandes proxectos internacionais. En canto aos computadores cuánticos, o de menor capacidade (5 cúbits), dedicarase exclusivamente a tarefas de formación, probas de concepto e de algoritmia, complementando así ao de maior capacidade (54 cúbits), que será o buque insignia.
A Xunta exixe o rescate da AP-9 e asina cos Gobernos de Asturias e Castela e León e o tecido empresarial das tres comunidades a Declaración Compostela, que insta á Comisión Europea a culminar o ditame sobre as prórrogas da AP-9 e AP-66. A conselleira de Vivenda e Planificación de Infraestruturas, María Martínez Allegue, interveu no encontro 'As infraestruturas viarias do Noroeste', organizado pola Confederación de Empresarios de Galicia.
