martes, 3 de febrero de 2026
A directora da Axencia Galega de Innovación (Gain), Patricia Argerey, animou esta mañá en Santiago a emprendedores e startups a sumarse ao polo aeroespacial de Galicia participando na nova aceleradora Business Factory Auto (BFAero), o programa de apoio ao emprendemento innovador neste sector que prevé o maior investimento en Europa. Argerey destacou que deste xeito se busca completar a cadea de valor do sector en Galicia, gañar tamaño e continuar posicionando a Comunidade no escenario internacional cun sector de alto compoñente tecnolóxico e gran potencial de futuro.
Na xornada de presentación desta aceleradora celebrada en Santiago, na que participaron arredor de 70 representantes de empresas, universidades, centros de coñecemento e outras entidades, informouse de que se poden presentar proxectos ata o 28 de febreiro. A BFAero inclúe dous itinerarios: un de incubación e outro de aceleración, para os que se dispón de tres prazas en cada un.
A convocatoria está dirixida a todo o ecosistema de innovación a nivel internacional -universidades, centros tecnolóxicos, empresas e emprendedores- e está dotada cun orzamento público-privado de 4,75 millóns de euros, coa previsión de apoiar a través de tres convocatorias 19 proxectos e empresas que xeren máis de 60 empregos directos en Galicia.
A aceleradora, que se enmarca na Civil UAVs Initiative, está promovida pola Xunta, a través do Igape, Gain e Xesgalicia, polas empresas Indra e Babcock e o centro tecnolóxico da automoción CTAG, xestionada pola Fundación CEL e apoiada por diferentes entidades colaboradoras representadas polo Consorcio Aeronáutico Galego.
Ademais de financiamento, BFAero ofrece acceso a infraestruturas especializadas, asesoramento individualizado con mentores profesionais activos do sector, asesoramento tecnolóxico e acceso a potenciais clientes de ámbito internacional.
As áreas temáticas prioritarias, nas que Galicia posúe talento investigador, técnico e empresarial, son o deseño e produción de vehículos non tripulados, a automatización de operacións de aeronavegabilidade ou de navegabilidade ou a captura, procesamento e explotación de datos, entre outras.
A aceleradora BFAero inscríbese no programa de emprendemento innovador do polo aeroespacial de Galicia, que ten por obxectivo fortalecer o apoio ao talento emprendedor impulsando a creación de empresas nun sector de alto valor engadido estratéxico para a Comunidade; baseado no coñecemento e aliñado coa Estratexia de Especialización Intelixente de Galicia (RIS3). Dentro deste programa está prevista tamén a creación dun Centro de Emprendemento en Lugo dedicado integramente ao sector aeroespacial, futura sede da Business Factory Aero.
Así mesmo, vén sumarse ás iniciativas de StartIN Galicia, a rede galega de aceleradora que agrupa toda a oferta de apoios que a Consellería de Economía, Emprego e Industria pon a disposición das startups para o seu establecemento en Galicia e o fomento do seu fortalecemento e competitividade internacional.
A Filmoteca de Galicia dedica en febreiro o eixo principal da súa carteleira na sala José Sellier ao ciclo Hiroshi Shimizu, o arte de perderse, realizado en colaboración coa Fundación Xapón, ao tempo que programa o inicio do especial sobre as colaboración entre Béla Tarr e László Krasznahorkai. Outras citas importantes da súa actividade mensual serán a visita de José Luis Guerin dentro da conmemoración dos 20 anos de Cinema en curso e co seu filme Historias del buen valle. A actividade prevista, que conforma o programa número 300 do centro, complétase coa segunda entrega de Territorios mutantes.
Siro López comezou a traballar como delineante na empresa metalúrxica Bazán, máis axiña foi quen de arriscarse para dedicarse de cheo ao mundo da ilustración. A partir de aí, encheu páxinas de diversas publicacións de debuxos, artigos de arte, cultura e humor, salientando o gran traballo que desenvolveu entre 1985 e 2006 en La Voz de Galicia como caricaturista político. Ademais, xunto con outros debuxantes da Comunidade, como Xaquín Marín, participou nunha serie de iniciativas que abriron novas posibilidades profesionais aos humoristas gráficos galegos, como o manifesto En defensa do humor, a publicación da revista Can sen dono, o Museo do Humor de Fene, ou a Praza do Humor da Coruña.
