Notas de prensa

O Nobel de Química Jean-Pierre Sauvage dará unha conferencia en Santiago sobre as máquinas moleculares

O Premio Nobel de Química en 2016, Jean Pierre-Sauvage, pronunciará este xoves 29 unha conferencia sobre máquinas moleculares en bioloxía e en química. Precisamente foi ese o traballo polo que conseguiu o premio da Academia xunto con Sir J. Fraser Stoddart e Ben Feringa, unha investigación que abriu o camiño para a revolución nanotecnolóxica.

O relatorio, de entrada libre e con tradución simultánea, será ás 20.00 horas no Auditorio ABANCA. O acto enmárcase nas actividades do Programa ConCiencia da USC e o Consorcio de Santiago de Compostela, e conta coa colaboración da Fundación Española para la Ciencia y la Tecnología - Ministerio de Ciencia, Innovación y Universidades.

Jean-Pierre Sauvage, profesor e investigador na Universidade de Estrasburgo (Francia), completou o seu doutoramento na Universidade Louis-Pasteur en Estrasburgo en 1971 baixo a supervisión de Jean-Marie Lehn, describindo as primeiras síntese de criptos, que son moléculas bi e policíclicas sintéticas que se unen a un átomo de metal central. Foi profesor en Estrasburgo de 1981 ata 1984 e director de investigación no CNRS de 1979 a 2009, cando se converteu en director emérito.

Un campo con moito futuro

Savage, un dos pioneiros da química supramolecular, publicou en 1983 a primeira síntese eficiente das moléculas cíclicas entrelazadas denominadas "catenanos". Estas moléculas foron a base dunha das primeiras máquinas moleculares nas que o movemento dos aneis de catenano foi controlado a través de medios electroquímicos e fotoquímicos. Seguindo enfoques similares, o seu grupo produciu en 2000 unha estrutura de rotaxano que pode estenderse e contraerse como un filamento muscular. A súa outra investigación inclúe a modelización do centro de reacción fotosintético e a redución do CO2 por medios electroquímicos.

O Premio Nobel tivo esta mañá un encontro cos medios de comunicación no que estivo acompañado do catedrático de Electromagnetismo e coordinador de ConCiencia, Jorge Mira, e do catedrático de Química Orgánica José Luis Mascareñas, ambos os dous da USC. Este último salientou do científico francés o seu traballo pioneiro no descubrimento de maneira artificial de máquinas moleculares “cando todo o noso corpo, a nosa natureza, está cheo delas”. A súa investigación é en si mesma, dixo, “unha revolución polas moitísimas aplicacións que van poder ter”.

No encontro cos medios, Sauvage recalcou que traballa en ciencia básica, “que é a orixe de todo: da medicina, das novas tecnoloxías; en definitiva, de todo aquilo que nos proporciona un maior benestar”. A investigación en máquinas moleculares está comezando, explicou, “e así como hoxe poden verse poucas aplicacións estou seguro de que no futuro será esencial, por exemplo, no campo do procesado e almacenamento de información e na nanomedicina”.

Universidade de Santiago de Compostela, 2018-11-28

Actualidad

Foto del resto de noticias (libros.jpg) Máis de 3.000 alumnos e alumnas, tras ler as obras finalistas, emitiron as súas valoracións para escoller as obras gañadoras das sete categorías. Os títulos seleccionados na categoría Infantil foron Caderno de cores e cancións, de Magín Blanco e Sonia García, como ilustradora, e está editado por Galaxia. Na de primeiro e segundo curso de Educación primaria foi distinguido Violeta parapluie e outras historias de xente pouco corrente de Ramón D. Veiga, publicada por Edicións Embora. Na segunda categoría distinguiuse A pulga espacial de Xabier Domínguez e Alba de Evan.
Foto de la tercera plana (comunicacion.jpg) A Xunta publica a consulta previa para unha nova Lei de servizos dos medios públicos de comunicación audiovisual de Galicia para a sociedade dixital, que se adecúe á normativa europea e á realidade que trouxeron consigo os cambios tecnolóxicos dos últimos anos. As modificacións introducidas pola Directiva comunitaria 2018/1808, polo Regulamento comunitario 2024/1083 e pola recente Lei 13/2022 xeral de comunicación audiovisual, xunto cos avances tecnolóxicos, obrigan a reconsiderar o vixente texto legal.

Notas

O próximo día 8 de maio terá lugar no Xardín das Pedras que falan (xardín traseiro do Colexio de Fonseca), ás 20.00 horas e con entrada libre, a segunda edición do MilongUSC. Nesta ocasión, contará coa participación dos alumnos do curso de Danza-tango 23/24 da USC que, baixo as ensinanzas dos profesores Chusa Pérez de Vallejo e Ezequiel Merlo, amosarán o aprendido neste curso.
A Facultade de Educación e Traballo Social do campus de Ourense acolleu a xornada 'Inclusión e deporte. O deporte como clave para intervir socialmente'. Nela reivindicouse o papel da educación social no deporte, convidando a egresadas deste centro, educadoras sociais, a expor boas prácticas desenvolvidas neste eido en diferentes entidades da cidade.
PUBLICIDAD
ACTUALIDAD GALICIADIGITAL
Blog de GaliciaDigital
PUBLICACIONES