viernes, 18 de septiembre de 2026
A directora da Axencia Galega de Innovación, Carmen Cotelo, participou hoxe en Cracovia (Polonia) na reunión anual de directores da Vanguard Initiative, a alianza estratéxica que agrupa a 35 rexións europeas co obxectivo de impulsar o crecemento europeo a través da colaboración interrexional en I+D+i e a especialización intelixente. A representante da Consellería de Educación, Ciencia, Universidades e FP puxo en valor o traballo de Galicia neste eido co obxectivo de reforzar a colaboración entre rexións.
A xornada, á que asisten representantes de alto nivel das diferentes rexións membro da Vanguard, celébrase en Cracovia coincidindo coa presidencia polaca do Consello da Unión Europea. No encontro debateuse arredor das prioridades para 2025 e de futuras actuacións da alianza co obxectivo de impulsar a innovación e a competitividade europea. Ademais, con esta reunión preténdese amplificar a voz dos actores rexionais en asuntos clave da política europea e garantir así que as prioridades rexionais estean ben representadas a nivel europeo.
No cumio expuxéronse, entre outros, os resultados do mecanismo de financiamento de proxectos interrexionais de innovación, Vinnovate, posto en marcha en 2024 por esta alianza co obxectivo de promover proxectos conxuntos en temáticas de interese compartido e vencellados ás áreas de especialización intelixente de cada rexión. Así mesmo, houbo oportunidade de tratar os detalles da nova convocatoria para 2025, que ten aberta a primeira fase ata o 15 de setembro, e abordar a incorporación de novos socios como o País Vasco. En 2024, Galicia foi a única comunidade española participante.
Medio milleiro de investigadoras e investigadores e máis de 150 actividades científicas nas sete cidades galegas: Vigo, Ourense, Pontevedra, Santiago, A Coruña, Ferrol e Lugo. Así se celebrará en Galicia a sexta edición da Noite Galega das Persoas Investigadoras, G-Night 2026, unha actividade na que a comunidade científica galega une talento e esforzos co obxectivo de achegar a ciencia á cidadanía e espertar vocacións científicas, ao tempo que se ofrecen propostas de lecer científico, cultural e educativo para toda a familia.
A Xunta de Galicia reclama ao Goberno central medidas estruturais de apoio ao sector agrogandeiro. Do mesmo xeito, esíxese que se teña en conta a realidade de cada territorio á hora de levar a cabo estas actuacións, que deben executarse de xeito urxente. Así o trasladou a conselleira do Medio Rural, María José Gómez, na Conferencia Sectorial celebrada en Madrid, na que se dirixiu ao ministro de Agricultura, Pesca e Alimentación, Luis Planas, para facer estas reclamacións. Alí, reafirmou tamén o compromiso do Executivo galego con este sector.
