Notas de prensa

O XVII Congreso Galego de Estatística e Investigación de Operacións reúne en Ourense a 130 profesionais

O congreso, que se prolongará ata o sábado, foi inaugurado por Francisco Javier Rodríguez, vicerreitor do campus de Ourense; José Alberto Díez de Castro, secretario xeral de Universidades da Xunta de Galicia; Rosendo Fernández, deputado provincial; César Andrés Sánchez, presidente de Sgapeio, e Ana Pérez, co-presidenta do comité organizador do evento. Nas súas intervencións puxeron en valor a importancia da estatística e da investigación de operacións nos diferentes eidos profesionais, desde o académico e o económico ata o sanitario e agrario, e a importancia de contar con foros coma este congreso para o intercambio de coñecementos e inquedanzas.

O congreso conta co patrocinio de SiDOR Research Group, a Vicerreitoría do Campus de Ourense e o Campus Auga da Universidade de Vigo; o Grupo de Modelización, Optimización e Inferencia Estatística da Universidade da Coruña; o Grupo de Modelos de Optimización, Decisión, Estatística e Aplicacións da Universidade de Santiago de Compostela; o Centro de Investigación e Tecnoloxía Matemática de Galicia (CITMAga) e a Consellería de Educación, Ciencia, Universidades e Formación Profesional da Xunta de Galicia. O seu Comité Organizador está formado por un amplo grupo de persoal docente e investigador da Universidade de Vigo encabezado por Ana Pérez e Tomás R. Cotos (presidentes do comité) e Manuel A. Mosquera (secretario). Neste comité tamén participan o Instituto Galego de Estatística e o IES As Barxas (Moaña).

Presentación de 50 traballos

Formando parte desta cita en Ourense terá a lugar a Xornada de Aplicacións de Estatística e Investigación de Operacións na Agricultura e o Medio Ambiente e as II Xornadas de Innovación Docente na Estatística e Investigación de Operacións. Ao longo de tres días de actividade, o congreso contará cun amplo panel de conferencias plenarias, mesas redondas, obradoiros e comunicacións a cargo de especialistas nas diferentes materias. En total, presentaranse arredor de 50 traballos de especialistas de áreas de coñecemento moi diversas, como sanidade, educación, economía e agricultura. As mesas redondas abordarán cuestións como a deriva da estatística oficial e a estatística nas probas de acceso á universidade (PAU) e as comunicación cuestións referidas por exemplo á teoría de xogos e á estatística pública. Ademais haberá obradoiros de temas como o software Pyomo e datos computacionais. As conferencias plenarias correrán a cargo de Juan Carlos Escanciano (Universidad Carlos III de Madrid), Wenceslao González (Universidade de Santiago de Compostela), Josep Freixas (Universitat Politècnica de Catalunya), Javier Palarea (Universitat de Girona) e Anabel Forte (Universitat de València).

O XVII Congreso de Estatística e Investigación de Operacións, indican desde a súa organización, forma parte da intensa programación que, desde hai anos, desenvólvese desde a Sociedade Galega para a Promoción da Estatística e a Investigación de Operacións a través de reunións científicas, boletíns informativos, intercambios nacionais e internacionais e fomento da relación entre as universidades galegas e os sectores público e privado, co obxectivo de a estimular a investigación e a difusión da estatística e da investigación de operacións ao servizo da ciencia e da sociedade.