miércoles, 24 de abril de 2024
O secretario xeral de Politica Lingüística, Valentín García, participou, no salón de graos da Facultade de Dereito compostelá, na presentación deste vocabulario, incidindo na súa intervención, na importancia do traballo terminolóxico para manter actualizada unha lingua e favorecer que os falantes a empreguen nos máis diversos ámbitos, dotándoa deste xeito da vida que só pode dar o uso frecuente e variado e do prestixio que lle confire o ser empregada en campos coma o do dereito, que hoxe nos convoca aquí.
O secretario xeral estivo acompañado por Gumersindo Feijoo Costa, vicerreitor de Planificación e Proxección Estratéxica da USC; Gumersindo Guinarte Cabada, decano da Facultade de Dereito da mesma universidade, e a profesora Alicia Villalba Sánchez, coautora do glosario xunto con Xusto A. Rodríguez Río.
Máis de 1000 conceptos
Termos esenciais de dereito do traballo e da seguridade social é un glosario trilingüe (galego-español-inglés) que recolle máis de 1000 conceptos dos ámbitos indicados no seu título. Esta publicación completa a colección de vocabularios básicos de dereito elaborados polo Servizo de Normalización Lingüística da USC, na que se incluíron propostas terminolóxicas de dereito constitucional, penal, internacional, civil, administrativo e mercantil.
Colaboración para a normalización lingüística
A elaboración e publicación deste traballo foi froito da colaboración entre a Universidade compostelá e a Secretaría Xeral de Política Lingüística da Consellería de Cultura e Turismo, que ten asinado con ela un convenio de colaboración en materia de normalización da Lingua Galega. O dito convenio posibilita tamén a celebración de diversos cursos de formación, o apoio á redacción e defensa en galego de teses, traballos de fin de grao e de fin de mestrado ou o subtitulado de vídeos TED do ámbito da saúde, entre outras accións.
Por que o universo dos activos dixitais semella un mundo masculino? Por que a maioría de influencers do mundo cripto que saen á palestra son homes? Está equilibrada a proporción entre homes e mulleres nos consellos de administración das empresas? Estas son algunhas das preguntas ás que se deu resposta este luns na VI Xornada de igualdade de xénero e Dereito Mercantil, actividade dirixida desde a Facultade de Ciencias Xurídicas e do Traballo polas docentes Sara Louredo e Ana Mª Aido e para a que, nesta ocasión, se contou coa participación de dúas profesoras expertas en Dereito Mercantil: Vanessa Jiménez, da Universidad de Salamanca, e Josefina Boquera, da Universidad de Valencia.
Un total de 23 os equipos de 19 colexios e institutos participaron no lanzamento de satélites elaborados por parte de centros educativos galegos no marco da fase autonómica do programa da Axencia Espacial Europea Cansat 2024, que se desenvolveu no aeródromo das Gaivotas, en Cerceda. A xornada desenvolveuse arredor de tres actividades: un obradoiro de foguetes químicos e de auga impartida polo alumnado do Centro Público Integrado O Cruce (Cerceda), unha exhibición de drons a cargo de Aeromedia e o lanzamento dos satélites. O secretario xeral técnico da Consellería de Educación, Ciencia, Universidades e FP, Manuel Vila, acompañou os alumnos nesta xornada.
