viernes, 16 de mayo de 2025
Trátase dos proxectos europeos Ecodestin_3In e Capiten, nos que o Goberno autonómico, a través de Turismo de Galicia e da Consellería do Medio Rural, e o sector náutico alíanse cun convenio de colaboración ata 2020 asinado pola directora de Turismo e o director de Agader co presidente da Asociación Galega de Actividades Náuticas (AGAN+), Manuel Soliño, no porto deportivo de Combarro.
Este acordo supón un reforzo do compromiso do Executivo galego coa posta en valor dos recursos marítimos e fluviais, para seguir avanzando no obxectivo colectivo de continuar impulsando Galicia como destino náutico, mariñeiro e deportivo. Para logralo, a Xunta cofinanciará o desenvolvemento deste dous ambiciosos proxectos sustentables.
A través de Ecodestin_3IN, Galicia busca consolidarse como destino náutico os 365 días do ano mediante a creación, promoción e comercialización de 50 novos produtos vinculados coa cultura do mar, a náutica recreativa e o patrimonio natural da Comunidade galega.
Máis de 4.000 participantes
O produto estrela do proxecto son os Minicruceiros Costeiros polas Rías de Galicia, que precisamente esta mañá tiveron unha saída desde Combarro instantes antes da sinatura do convenio. As autoridades saudaron aos participantes nesta experiencia, que se estende desde o 23 de abril ao 26 de outubro con máis de 4.000 persoas embarcadas nas case 100 saídas previstas nalgunha das tres propostas: os minicruceiros, o programa Descubrindo as nosas rías ou o programa de familiarización para colectivos e axencias de viaxes.
Ecodestin_3IN traballará para mellorar esta experiencia ao incluír entre as súas accións a preparación dos portos para que sexan viables como puntos de saída e escala de minicruceiros e convertelos en portos inclusivos grazas ao apoio das novas tecnoloxías.
Por outra banda, co apoio da Xunta ao segundo dos proxectos, Capiten no que ademais se inclúen 18 socios de Francia, Reino Unido, Irlanda, España e Portugal, impúlsase a creación do Clúster Náutico. Capiten tamén traballa para converter os portos galegos en puntos de información turística, atraer a Galicia novos turistas nacionais e internacionais e facer extensiva a experiencia dos Minicruceiros Costeiros polas Rías ao norte de Galicia.
Este segundo proxecto europeo ten o seu marco de actuación nas provincias de Lugo e A Coruña, onde se pretende implantar cruceiros costeiros ou pequenos cabotaxes, similares aos minicruceiros que xa operan na actualidade nas Rías Baixas.
Natureza e excelencia
A colaboración do Goberno galego co sector náutico nestes proxectos europeos aspira a reforzar internacionalmente a imaxe da nosa Comunidade. Permitirá poñer en valor aos 72 municipios costeiros, aos máis de 1.500 quilómetros de costa, ás 16 rías navegables practicamente todo o ano e ás preto de 900 praias.
Así mesmo, permitirá resaltar a aposta pola excelencia, pois de cada dez instalacións náutico deportivas co distintivo Q de Calidade Turística en España, seis atópanse en Galicia. A Comunidade destaca cada ano, ademais, na clasificación de bandeiras azuis. Actualmente conta con 124 entre praias, que suman 109, e 15 portos deportivos.
Os proxectos cofinanciados tamén permitirán avanzar nun dos obxectivos do modelo turístico autonómico: a internacionalización do destino. A Estratexia do turismo de Galicia 2020, consensuada co sector, aspira a que ao final dese período un terzo dos turistas que chega a Galicia sexan estranxeiros. O ano pasado o peso do mercado internacional foi do 28,7%, unha porcentaxe que o convenio asinado hoxe aspira a reforzar.
Galicia consolida o seu liderado na taxa de escolaridade de 0 a 3 anos e mantense por riba do 60%, máis de 13 puntos superior á media de España, segundo os últimos datos oficiais que vén de publicar o Ministerio de Educación e Formación Profesional. Esta porcentaxe sitúa á nosa comunidade ao nivel dos países con maiores índices de benestar en Europa, como Suecia ou Dinamarca. Galicia é a comunidade autónoma onde o programa da gratuidade é máis completo, xa que ningunha outra ofrece ata 8 horas diarias e 11 meses por curso atención educativa totalmente de balde ao 100% do alumnado e en todas as escolas infantís: as públicas, as de iniciativa social e as privadas.
Os complexos hospitalarios universitarios de Santiago de Compostela e de Vigo veñen de ser seleccionados para a administración de terapias CAR-T en pacientes adultos. Esa designación formalizarase mediante resolución da Secretaría de Estado de Sanidade, logo da validación por parte do Grupo Institucional do Plan para a Abordaxe das Terapias Avanzadas no Sistema Nacional de Saúde. Galicia xa dispoñía desde 2022 de dous centros designados polo Ministerio de Sanidade para a administración de terapia CAR-T: o Complexo Hospitalario Universitario da Coruña administraba estes medicamentos avanzados en pacientes adultos e o de Santiago de Compostela en pacientes pediátricos.
