martes, 1 de julio de 2025
Esta convocatoria está dirixida a consorcios de empresas que contraten organismos de investigación como forma de potenciar a transferencia de coñecemento entre os distintos actores da innovación tecnolóxica no eido espacial.
Os grupos de investigación da UVigo, tanto do campus de Ourense como do de Vigo, colaborarán con compañías como Airbus, Indra Sistemas, GMV Aerospace and Defence ou a galega Alén Space, spin-off que naceu precisamente na propia Universidade de Vigo. En total asinaranse oito contratos con sete empresas, que suporán a captación de 1.490.000 euros para impulsar o desenvolvemento tecnolóxico no campo do espazo en dúas frontes: as constelacións de satélites e a maduración bottom-up da tecnoloxía espacial.
Os proxectos nos que se involucrará o persoal da UVigo están relacionados con aspectos como as comunicacións entre satélites de órbita baixa, a configuración de cargas en plataformas de alta altitude, os usos innovadores destas constelacións de satélites ou a vixilancia na loita contra os incendios. Dende a Oficina de I+D, onde se promoven e asesoran estes proxectos colaborativos de I+D+i, estanse a ultimar os contratos coas empresas para poder comezar os traballos.
Cinco proxecto ligados principalmente a atlanTTic
Para levar a cabo os cinco proxecto, a Universidade de Vigo establecerá oito contratos con sete empresas. Cinco dos contratos corresponden á Escola de Enxeñería Aeronáutica e Espazo do campus de Ourense, todos co grupo GTA Grupo de Tecnoloxías Aeroespaciais, que forma parte do centro de investigación atlanTTic. Outros tres asinaranse con persoal do campus de Vigo, dous deles con grupos de atlanTTic (GTA Grupo de Tecnoloxías Aeroespaciais e SC7 Antenas, Radar e Comunicacións Ópticas) e un terceiro co grupo EEE Enxeñería de Equipos Electrónicos da Escola de Enxeñería Industrial.
Unha mostra da excelencia dos nosos grupos de investigación
A vicerreitora de Investigación, transferencia e innovación, Belén Rubio, celebra o importante logro que supón para a Universidade de Vigo a consecución destes cinco novos proxectos no ámbito aeroespacial, un éxito que reflicte non só a capacidade e excelencia dos nosos grupos de investigación e a colaboración estabelecida entre eles no marco do centro atlanTTic, senón tamén a fortaleza do noso modelo de colaboración entre institucións académicas e o tecido empresarial, tanto a nivel nacional como internacional.
Rubio subliña que a participación de empresas de referencia como Airbus, Indra Sistemas, GMV Aerospace and Defence ou a galega Alén Space pon de manifesto a calidade e a competitividade da nosa investigación, así como a súa capacidade para xerar impacto real no sector aeroespacial. Ademais, destaca, a nosa Universidade reafirma así o seu papel como axente clave na transferencia de coñecemento e no desenvolvemento de solucións innovadoras en tecnoloxías como as comunicacións entre satélites de órbita baixa, a configuración de cargas en plataformas de alta altitude ou a aplicación destas constelacións para retos cruciais como a loita contra os incendios.
Por outra banda, a vicerreitora tamén destaca o papel que teñen na consecución destes éxitos as infraestruturas de investigación sólidas, como as existentes nos campus de Ourense e Vigo, que favorecen un ecosistema de I+D+i dinámico e de vangarda. Tampouco se esquece Rubio do traballo desenvolvido desde a Oficina de I+D da UVigo para impulsar proxectos estratéxicos que permiten non só fortalecer a capacidade investigadora da Universidade, senón tamén favorecer a integración do coñecemento xerado nos procesos de innovación industrial.
Cinco proxectos e sete empresas
O primeiro dos proxectos centrarase en desenvolver tecnoloxías avanzadas para liñas produción en serie de cargas de pago e plataformas espaciais. No marco deste proxecto asinaranse dous contratos, un deles por parte de Indra co GTA Grupo de Tecnoloxías Aeroespaciais, cos investigadores Marcos Arias e Fernando Aguado, da EE de Telecomunicación e investigadores de atlanTTic, como responsables. O segundo acordo será entre a empresa DHV Tecnología Espacial Avanzada Malagueña e o mesmo grupo, pero cos investigadores Uxía García e Carlos Ulloa, ambos da Escola de Enxeñaría Aeronáutica e do Espazo do campus de Ourense e investigadores de atlanTTic, como responsables.
Outro dos proxectos é Leopnt-P: Carga de pago (payload) accesible e compacta distribuída sobre satélites de constelacións en órbita baixa para proporcionar servizos de navegación e tempo. Neste caso o proxecto implica a sinatura de tres contratos. Un por parte de GMV Aerospace and Defense con Ana Vázquez Alejos e Óscar Rubiños, ambos pertencentes á EE de Telecomunicación e a atlanTTic, como responsables; outro de Alén Space cun equipo liderado polo docente da EE Industrial Andrés Augusto Nogueiras; e un terceiro por parte tamén de Alén Space co GTA Grupo de Tecnoloxías Aeroespaciais, que terá como responsables a Guillermo Rey e Uxía García, da Escola de Enxeñaría Aeronáutica e do Espazo e no caso de García, investigadora de atlanTTic.
O terceiro proxecto é Icaro, que se centrará no deseño dun sistema VLEO de observación da Terra para a loita contra incendios. Neste caso, a empresa Aistech Space establecerá un acordo co GTA Grupo de Tecnoloxías Aeroespaciais, e terá como investigadores responsables a Pedro Orgeira e Uxía García, adscritos á Escola de Enxeñaría Aeronáutica e do Espazo e ao centro atlanTTic.
Outro dos contratos permitirá que Pedro Orgeira xunto con Fernando Aguado, da EE de Telecomunicación, ambos parte de atlanTTic, coordinen dende a UVigo o proxecto SIOS: Satellite for in-orbit sustainability liderado pola empresa AVS, Added Value Industrial Engineering Solutions.
Finalmente, o quinto proxecto implica á empresa Aibus, que traballará cun equipo do GTA Grupo de Tecnoloxías Aeroespaciais liderado polos investigadores Alejandro Gómez, da Escola de Enxeñaría Aeronáutica e do Espazo e Fernando Aguado, da EE de Telecomunicación, ambos de atlanTTic, para o desenvolvemento dunha nova xeración de tecnoloxías disruptivas en cargas útiles para Haps.
A primeira fase do piloto do proxecto Xenoma Galicia permitiu detectar, entre os máis de 1.000 participantes aos que se lle recolleu unha mostra de sangue, 14 novos casos de alto risco para as patoloxías investigadas de cancro de mama e ovario hereditario, síndrome de Lynch e hipercolesterolemia familiar. A Consellería de Sanidade presentou esta mañá ante o Consello da Xunta un informe de situación do piloto do proxecto Xenoma Galicia. Cun investimento de 20 millóns de euros, o Goberno galego márcase o obxectivo de recompilar o ADN de 400.000 persoas. Pola porcentaxe de poboación incluída, Xenoma Galicia é un dos proxectos de maior envergadura do mundo. Permitirá ofrecer tratamentos farmacolóxicos individualizados, predicir o risco de enfermidades antes de apareceren para poder anticiparse a elas e evitalas grazas ao estudo do xenoma e da historia clínica.
No marco do Plan de Actuacións fronte aos posibles efectos das altas temperaturas sobre a saúde, a Xunta de Galicia vén de rebaixar a alerta por altas temperaturas aos niveis 1 e 2. Deste xeito, a vaga de calor iniciada pasado venres, que na xornada de onte acadou o nivel 3 de alerta en diversas áreas de Galicia, agora queda establecida nos dous primeiros niveis de alerta. En concreto, as zonas que ficarán no nivel 2 son o noroeste de Ourense, o interior de Pontevedra, así como o Centro e a Montaña da provincia de Lugo. Pola súa banda, defínese o nivel de alerta 1 por vaga e calor as zonas do interior de Coruña, o sur de Lugo, Miño de Ourense, montaña de Ourense, sur de Ourense, Valdeorras, litoral de Pontevedra e a zona Miño de Pontevedra.
