Notas de prensa

Preséntanse en Fitur os novos produtos que permiten vivir o Camiño de Santiago a peregrinos en cadeira de rodas

A directora de Turismo, Nava Castro, expuxo en Fitur os novos produtos que permiten percorrer o Camiño de Santiago a peregrinos en cadeira de rodas. Con esta iniciativa, dáse un paso máis para posibilitar que calquera persoa poda vivir a experiencia da ruta xacobea, convertida novamente nun exemplo do turismo inclusivo.

Baixo a marca Descubre o teu propio Camiño, o Camiño Francés ofrece xa a posibilidade de contratar un servizo para facer diversas etapas en Galicia e León. Esta iniciativa é resultado do proxecto europeo Saber Universal no que participa a Xunta e que se desenvolve no principal itinerario xacobeo e no camiño de San Benedito de Italia. En total, habilitáronse cinco paquetes para persoas con discapacidade visual, mobilidade reducida e público senior.

No caso de Galicia, a viaxe vai dirixida a grupos mixtos, compostos por dúas persoas en cadeira de rodas que peregrinarán con handbikes eléctricas e híbridas, que adaptarán ao seu ritmo a peregrinación e irá acompañados de dúas ou tres persoas en bicicleta. Poderán sentir así a emoción final do Camiño de Santiago, cubrindo etapas entre León e Santiago de Compostela, con aloxamento en hoteis de tres estrelas, hostais e albergues accesibles.

Catro días e 64 quilómetros

A viaxe desenvólvese ao longo de 64 quilómetros, repartidos en catro días, cunha media de 15 quilómetros diarios e co apoio dun vehículo con condutor para os traslados necesarios, así como da equipaxe. Poderán percorrer as etapas Casanova-Raído, Fontelas-A Salceda, A Salceda-O Pedrouzo e entre o Parque Monte do Gozo e Santiago de Compostela.

“Na Xunta de Galicia queremos que o Camiño de Santiago sexa unha experiencia inclusiva. Por iso aprobamos o pasado ano o Plan de accesibilidade turística e do Camiño”, declarou Nava Castro. Nesta liña, subliñou que os aseos e dormitorios da rede pública de albergues do Xacobeo foron adaptados. Ademais, entre eles, destacan especialmente os casos de Melide e Ribadiso (Arzúa), nos que se remataron proxectos de accesibilidade universal.

Apoio aos festivais de música

Na presentación durante a 38ª edición desta feira internacional de turismo, que se celebra ata o domingo en Madrid, Nava Castro comentou novidades do prólogo musical deseñado como antesala do Xacobeo 2021, e que contará con artistas internacionais de primeiro nivel. Este programa completarase cunha nova edición de Cultura no Camiño e co apoio por parte de Turismo de Galicia a numerosos festivais de música galegos como o Resurrection Fest de Viveiro, o Festival WOS de Santiago de Compostela, o Festival Sinsal da Illa de San Simón, o Festival Portamérica de Caldas, o Festival Revenidas de Vilaxoán, o Festival Son Rías Baixas de Bueu, o Festival V de Valarés de Ponteceso, o Atlantic Fest da Illa de Arousa (Pontevedra), o Festival da Luz de Boimorto e o Festival da Ribeira Sacra de Sober.

Con iniciativas como esta, séguese avanzando na preparación do Xacobeo 2021, “unha cita de repercusión internacional na que Santiago de Compostela volverá erixirse como unha das cidades referentes para culturas de todo o mundo”, declarou a directora de Turismo.

Mancomunidade do Camiño Francés

Na presentación tamén participaron Rafael Sánchez, xerente do Xacobeo; Emilio López, director do Centro Nacional de Información Xeográfica (IGN), e Juan Serrano, presidente da Mancomunidade de Concellos Galegos do Camiño Francés. López presentou o Mapa dos Camiños de Santiago en Europa, realizado en colaboración coa Federación de Asociacións de Amigos do Camiño, representada neste acto polo seu presidente, Luis Gutiérrez. Este mapa permite visualizar máis de 80.000 quilómetros marcados como ruta xacobea en 28 países europeos. Pola súa banda, Juan Serrano expuxo O Camiño dos sentidos, no que se reúne a oferta gastronómica dos municipios que integran este itinerario xacobeo.

Precisamente as presentacións teñen como contexto o 25 aniversario da declaración do Camiño Francés como Patrimonio Mundial, o primeiro dos tres itinerarios xacobeos que recibiron este recoñecemento da Unesco. Foi en 1993, distinción á que seguiría en 2015 a do Camiño Primitivo e o Camiño do Norte. A celebración deste cuarto de século coincide có Ano Europeo do Patrimonio Cultural, unha cita que Galicia aproveitará para impulsar aínda máis o turismo cultural e o uso turístico sustentables dos seus numerosos recursos.

Ademais, en colaboración coas rexións que forman a Macrorrexión de Rexións do Sudoeste Europeo RESOE (Galicia, Asturias, Castela e León, Cantabria e Norte e Centro de Portugal), a Xunta de Galicia traballa nun novo produto que teña como fío condutor o Camiño e os numerosos Patrimonios Mundiais existentes neste amplo territorio de España e Portugal.

A pegada de Rosalía de Castro

Na terceira xornada de presentacións en Fitur, Nava Castro tamén apoiou, entre outras, a Ruta Rosaliana en Galicia: tras a pegada de Rosalía, promovida polos concellos de Padrón, Ames, Brión, Dodro e Santiago de Compostela. Esta proposta de turismo literario permitirá achegarse a espazos vinculados á súa vida e obra como San Xoán de Ortoño, a igrexa de Bastavales, a colexiata de Iria Flavia, o Pazo de Arretén ou a Casa de A Matanza.