viernes, 6 de noviembre de 2026
O presidente da Xunta, Alberto Núñez Feijóo, avanzou unha achega de 56 millóns de euros para apoiar novos proxectos industriais no eido da automoción e das TIC e avanzar de cara a fábrica intelixente.
Durante a rolda de prensa do Consello, Feijóo afirmou que os proxectos, pertencentes a PSA Peugeot e á corporación Televés e seleccionados logo dun proceso de consulta ao mercado e unha convocatoria pública en concorrencia competitiva, permitirán: atraer investimentos a Galicia e avanzar no novo modelo industrial baseado na innovación; fixar tecido industrial e crear postos de traballo de calidade; e incrementar a competitividade de dúas industrias cun gran peso na economía da comunidade.
Nesta liña, precisou que as empresas implicadas, que investirán un total de 168 millóns de euros nas dúas iniciativas, comprométense a que, ademais do proxecto tecnolóxico, a fase de industrialización se desenvolva en Galicia.
En relación á iniciativa F4.0 de automoción, impulsada por PSA, en colaboración co CTAG, o titular do Goberno galego anunciou que suporá un investimento de máis de 145 millóns de euros, contando cunha axuda pública de preto de 50 millóns que deberá agora ser aprobada pola Comisión Europea.
O proxecto terá por obxectivo concibir, deseñar, construír e validar unha planta piloto de factoría 4.0, que permitirá a Vigo ser a referencia mundial do grupo neste eido tendo en conta o concepto de fábrica estendida. Así, esta iniciativa abranguerá a toda a cadea de valor, incluíndo os provedores de compoñentes e subministracións, a distribución de vehículos rematados e incluso puntos de venda e usuarios finais.
Tamén se buscará o desenvolvemento de compoñentes novos que poidan cubrir as novas expectativas dos clientes, respectando as máis altas esixencias ambientais e incorporando estas novas tecnoloxías a vehículos a un custo competitivo. Ademais, validaranse os novos procesos e produtos desenvolvidos mediante a construción e o ensaio de distintos prototipos de vehículos e das instalacións que se integren na planta piloto.
Con respecto a isto, sinalou a importancia de innovar cunha planta piloto de 4.0 da automoción en Vigo para descubrir novos compoñentes en materiais.
Sobre o proxecto Corp4future presentado pola corporación Televés, Feijóo explicou que cun investimento de 23 millóns de euros, dos cales 5,7 serán achegados pola Xunta, a compañía buscará mellorar os seus procesos produtivos a través do uso de novas tecnoloxías como: realidade aumentada, robótica e novos métodos de fabricación de placas impresas, entre outros.
Non en van, entre os obxectivos do proxecto atópanse: a apertura de novos mercados a partir da mellora da produtividade e do desenvolvemento de novas liñas; a mellora dos sistemas de información e da comunicación entre a corporación e os seus clientes de xeito que se poida ofrecer un produto máis personalizado e flexible de acordo cos paradigmas da Industria 4.0; e o desenvolvemento dun prototipo global que sirva como demostrador das novas capacidades adquiridas.
Feijóo concluíu afirmando que co apoio a estas dúas novas iniciativas avánzase no reto de conseguir un novo modelo industrial sustentado na máxima innovación posible.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur. De feito, destacan os altos rexistros acadados entre os días 9 e 15.
A Xunta de Galicia puxo en marcha a campaña de inmunización fronte á gripe e a COVID, que este ano incorpora como principais novidades a extensión da vacina antigripal de alta carga ás persoas de 65 a 69 anos e a ampliación do proxecto piloto de vacinación nos colexios a 75 centros educativos. O inicio oficial tivo lugar nun acto nas residencias de maiores e centros de discapacidade, o colectivo polo que arranca tradicionalmente a campaña debido á vulnerabilidade deste grupo fronte ás infeccións respiratorias.
