martes, 3 de noviembre de 2026
O director xeral de Pesca, Acuicultura e Innovación Tecnolóxica, Juan Maneiro, asistiu á inauguración da V edición da Feira Internacional das actividades económicas ligadas ao mar, Expomar 2016, que se celebra na illa caboverdiana de San Vicente entre o 20 e o 22 de outubro.
O director xeral estará presente nesta feira para apoiar ás empresas galegas que están no certame na procura de contactos comerciais con empresas deste país africano co obxectivo de afianzar as relacións pesqueiras e comerciais entre Galicia e Cabo Verde. Neste sentido, Juan Maneiro, intercambiará con empresas galegas e caboverdianas do mundo do mar impresións sobre as oportunidades de negocio e o desenvolvemento pesqueiro.
Ademais a Xunta tamén está presente nesta feira por cuarta vez cun stand de 36 metros cadrados de superficie, que alberga a 10 empresas e entidades, a maioría dedicadas ao subministro de instrumentos e de produtos electrónicos para barcos e ao mantemento e reparación de equipos en buques. Ademais, desa decena, unha dedícase a comercializar especies de peixe capturadas pola frota de palangre de superficie.
Un exemplo dos lazos pesqueiros e comerciais entre Galicia e Cabo Verde é o Entreposto de Frío de Mindelo, na illa caboverdiana de San Vicente, xestionado por unha sociedade composta por unha empresa galega e outra vasca. Esta infraestrutura de tratamento, conxelación e conservación de produtos da pesca entrou en funcionamento o ano pasado e serve como plataforma loxística estratéxica de distribución de produtos pesqueiros para todas as frotas que faenan no Océano Atlántico en xeral, e para a galega en particular, sobre todo para o sector do palangre de superficie, de grande importancia na zona, e para a frota atuneira.
Ademais cabe lembrar que a principios deste ano, nunha visita do Vicepresidente da Xunta, Alfonso Rueda, a Cabo Verde a Xunta e o goberno caboverdiano asinaron un memorando de entendemento para establecer unha colaboración permanente en materias como a pesca. Este memorando ten entre os seus obxectivos a cooperación no ámbito da pesca fomentando o establecemento dunha colaboración para o uso das infraestruturas pesqueiras e portuarias, valorando a man de obra caboverdiana e incluíndo a posibilidade de educación e formación profesional na área. Ademais, continuarase apoiando o traballo de cooperación en materia pesqueira e acuícola que vén desenvolvendo a Fundación Galega Centro Tecnolóxico do Mar, Cetmar.
A feira Expomar reúne a axentes de diferentes actividades da economía do mar e está organizada polo Ministerio de Economía e Emprego de Cabo Verde. Conta con expositores nacionais e internacionais pertencentes a sectores como o transporte marítimo, pesca e transformación de peixe, promoción empresarial, xestión portuaria, servizos náuticos, seguros, ensino, servizos financeiros, equipamentos, alimentación, seguridade marítima, turismo de cruceiros, etc.
Ademais acolle conferencias internacionais, seminarios e obradoiros e tamén promove encontros de negocio entre empresas nacionais e estranxeiras, centros de I+D e representantes de países europeos. Ademais integra un espazo de mostra de produtos, servizos e tecnoloxías da área do mar. O ano pasado contou con 80 expositores e 3.500 visitantes. Esta feira enmárcase na celebración da Semana do Mar, que se desenvolve en Cabo Verde entre o 17 e o 22 de outubro e inclúe actividades e conferencias relacionadas con este sector.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur. De feito, destacan os altos rexistros acadados entre os días 9 e 15.
A Xunta de Galicia puxo en marcha a campaña de inmunización fronte á gripe e a COVID, que este ano incorpora como principais novidades a extensión da vacina antigripal de alta carga ás persoas de 65 a 69 anos e a ampliación do proxecto piloto de vacinación nos colexios a 75 centros educativos. O inicio oficial tivo lugar nun acto nas residencias de maiores e centros de discapacidade, o colectivo polo que arranca tradicionalmente a campaña debido á vulnerabilidade deste grupo fronte ás infeccións respiratorias.
