jueves, 18 de abril de 2024
A compañía Nova Galega de Danza presentou na Coruña a estrea do espectáculo Son, coproducido xunto á Axencia Galega das Industrias Culturais (Agadic) a través do Centro Coreográfico Galego, que ofrecerá a súa primeira función este venres 27, ás 20.30 horas, no Teatro Rosalía de Castro. Un corpo de baile integramente masculino pon en escena esta proposta, construída a partir dunha decena de pezas nas que a danza tradicional galega convive coa española, a contemporánea e o flamenco.
O director da Agadic, Jacobo Sutil, acompañou o equipo da montaxe nesta presentación, na que tamén interviñeron Jaime Pablo Díaz e Carlos Rodríguez, directores artísticos de Son; Sergio Moure de Oteyza, director musical; Alberto Velasco, director de escena; e Carmelo Segura, coreógrafo convidado para o apartado de danza contemporánea.
Sutil explicou que esta proposta se insire no plan de coproducións que a Agadic vén desenvolvendo a través do Centro Coreográfico Galego co obxectivo de que os creadores plasmen os seus proxectos con total independencia e consigan que estes cheguen aos escenarios nas mellores condicións artísticas e técnicas posibles. Neste sentido, as propostas seleccionadas contan cunha achega económica da Xunta de Galicia, ademais de co apoio loxístico e técnico da súa unidade de produción coreográfica.
Trece anos de traxectoria
Como sinalou o director da Agadic, a elección de Son vén referendada pola traxectoria de Nova Galega de Danza, unha compañía que desde os seus inicios en 2003 non deixou de sorprender coa súa orixinal mestura de tradición e innovación. De feito, a linguaxe coreográfica que desprega na súa nova achega conta con pasos de catro estilos ben diferentes: a danza tradicional galega, a española, a contemporánea e o flamenco.
Ademais de asinar a dirección artística e a coreografía, Jaime Pablo Díaz e Carlos Rodríguez encabezan o corpo de baile do que tamén forman parte catro bailaríns especialistas en danza galega (Iván Villar Agulleiro, Francisco Sieira González, José Adrián Casal Sio e Ricardo Fernández Louro), outros catro en danza española (Rubén Puertas Martín, José Alarcón Cuevas, José Ángel Capel Ferrón e Alejandro Muñoz Muñoz) e un en contemporánea (David Vilariño).
Banda sonora
O cantaor Juan Debel, Javier Feijoó Xisco (gaita, pandeiro e canto), Francisco Sieira González (pandeiro), Alba Moura Etrad (tarrañolas e cante) e Cords del Món (violíns) puxeron voz e música ás composicións de Sergio Moure de Oteyza, autor de numerosas bandas sonoras para cinema e televisión polas que foi finalista aos premios Goya, Mestre Mateo e Gaudí, entre outros.
Sara Sánchez La Morena asina o vestiario e Luis Perdiguero, a iluminación e escenografía de Son, no que as coreografías se entrelazan a través de transicións nas que se utilizan diferentes elementos que sitúan o público nun obradoiro de escultura, ademais de evocar a paisaxe galega.
O espectáculo chega á Coruña despois da súa preestrea o pasado mes de febreiro no Teatro Colsubsidio de Bogotá, en Colombia. Para a estrea deste venres, Nova Galega de Danza conta tamén coa colaboración do Concello da Coruña, que pecha con este función no Teatro Rosalía de Castro o seu programa TRCDanza 2016. As entradas están xa á venda na web de Ticketea, no teléfono 902 044 226 e na billeteira central da praza de Ourense en horario de 9.30 a 13.00 e de 16.30 a 19.30 horas. Ademais, o día da función poderán adquirirse no propio teatro de 12.00 a 14.00 e de 18.00 a 20.00 horas
A Secretaría de Estado de Turismo vén de emitir a resolución pola que se concede a declaración de Interese Turístico Nacional á Festa da Filloa de Lestedo, en Boqueixón. Con este recoñecemento, Galicia suma xa 10 festividades con este recoñecemento. A Festa da Filloa de Lestedo súmase así ás outras nove que xa contan con este recoñecemento: a Romaría de Nosa Señora da Barca (Muxía), as Carrilanas de Esteiro (Muros), as festas do San Froilán (Lugo), a Feira do Bonito (Burela), a Festa da Historia (Ribadavia), o Entroido de Verín. Tamén a Festa do Marisco do Grove, as Festas de San Roque (Vilagarcía de Arousa) e a Festa da Reconquista (Vigo).
Baixo o título 'Horizontes dos Estudos Galegos e /na Lusofonía', esta nova edición do congreso da AIEG parte do tradicional vínculo entre Galicia e os países lusófonos para promover o debate, a crítica e novas propostas sobre as relacións no espazo cultural, académico e institucional. Farao a través de relatorios, paneis, mesas e sesións plenarias nas que participarán especialistas das tres universidades galegas, pero tamén do ámbito nacional e internacional, que discutirán sobre os campos lingüístico, literario, histórico, económico, antropolóxico, filosófico, sociolóxico e artístico. No marco do congreso tamén terán cabida as actividades culturais, como excursións ou exposicións, especialmente dirixidas á mocidade investigadora; ou a presentación de produtos académicos e proxectos, como o Proxecto Nós, impulsado polo Goberno galego para incorporar a lingua propia de Galicia á vangarda da Intelixencia Artificial.
