Notas de prensa

Compostela súmase ás homenaxes a Manuel María nas Letras Galegas 2016

A concelleira de Acción Cultural explicou que no 17 de maio haberá tres actividades centrais organizadas desde o seu departamento. Para as 11:00 horas está previsto un acto de homenaxe a Manuel María, na rúa que leva o seu nome no barrio de Salgueiriños. No seu transcurso actuará a Banda Municipal de Música e haberá un recital poético a cargo da veciñanza da propia rúa.

Xa pola tarde, celebrarase un paseo-recital, no que se incidirá na relación de Manuel María con Santiago, a través da súa obra Poemas a Compostela. O acto comezará na praza do Obradoiro, onde a concelleira de Acción Cultural fará unha introdución sobre a figura do poeta lugués e a súa relación con Compostela. De seguido, haberá unha lectura de poemas, a cargo de persoas vinculadas coa cultura como Comba Campoi, Olalla Cociña, Rosalía Fernández, Montse Dopico, Miro Villar, Laureano Araúxo, Lara Rozados e Manolo Portas.

Todos eles invitarán ao público a participar na lectura, na propia praza do Obradoiro, na Quintana e en San Martiño Pinario. Neste punto rematará o paseo-recital, e alí está previsto un concerto de García MC, compoñente do colectivo hip hop Dios Ke Te Crew e que ten musicado un dos textos do Poemas a Compostela, de Manuel María. Branca Novoneyra explicou que con este paseo literario "a intención é que a celebración do Día Das Letras sexa a celebración da obra do autor homenaxeado, e non da súa figura, sen máis".

A programación do 17 de maio complétase cun concerto da Banda Municipal de Música na praza de Praterías, a partir das 19:30 horas. A formación estará acompañada por Cantigas e Agarimos, e na actuación integrarase a música da Banda Municipal coa das gaitas e o coro da agrupación folclórica. Tamén participará o grupo de baile acompañando algunhas das pezas.

Pola súa banda, o alcalde deu conta das actividades organizadas polo Departamento de Lingua en relación co Día das Letras Galegas. O Concello ten en marcha o concurso #fotolingua, co obxectivo de poñer en valor o uso do galego na paisaxe de Santiago. Nesta primeira edición, o certame leva por lema #ogalegovende e os participantes terán que presentar, a través dos perfís do concurso en Facebook ou Instagram, fotografías de elementos de negocios ou empresas de Compostela nos que apareza a lingua galega, tales como letreiros, etiquetas, ou cartaces. Haberá dous premios, un para a imaxe elixida por un xurado, e outra para a fotografía que reciba máis "gústame" nas redes. Nos dous casos, o agasallo será un teléfono móbil de última xeración.

O prazo para presentar as fotografías abriuse onte e pecharase o 24 de maio, e en todos os casos as imaxes deben ir acompañadas dos hashtags #fotolingua e #ogalegovende. O nome dos gañadores publicarase o 27 e maio.

Martiño Noriega tamén deu conta do apoio do Concello de Santiago ao Correlingua, a carreira pola lingua. O Correlingua empezou en Pontevedra e chegará a Santiago o 13 de maio. O punto de encontro dos participantes será a praza da Quintana, e o percorrido da carreira é circular, pasando pola rúa da Conga, rúa Nova, Caldeirería, Preguntoiro, Cervantes, Troia, Fonte de San Miguel, Porta da Pena, Xasmíns, avenida de Xoán XXIII, San Francisco, Obradoiro, Fonseca e Xelmírez, para rematar de novo na Quintana. A proba comezará ás 11:00 horas e os organizadores xa advirten da posibilidade de suspendela, no caso de chuvias importantes.

Unha vez finalizado o percorrido, a partir das 12:00 horas, terá lugar un final de festa na Quintana, presentado por Talía Teatro. No seu transcurso lerase o manifesto gañador, escrito por alumnado de portugués do IES Dionisio Gamallo de Ribadeo. Tamén actuará o alumnado do grupo Liviao de Marrao.

Polo de agora, na Correlingua están inscritos máis de 1.300 rapaces e rapazas da comarca de Compostela. O Concello colabora coa carreira nos aspectos relacionados coa seguridade, e fai unha achega de 2.500 euros a través dunha subvención nominativa.