Feijóo fai balance con representantes do Clúster do Turismo de Galicia
O presidente da Xunta, Núñez Feijóo, mantén un encontro con representantes do Clúster de Turismo de Galicia para facer balance dos obxectivos acadados e marcar os retos para os vindeiros anos. Reitera o obxectivo anunciado en Fitur de "de recibir cinco millóns de turistas en 2016.
O presidente do Goberno galego, Alberto Núñez Feijóo, mantivo un encontro con representantes do Clúster de Turismo de Galicia, para coñecer de primeira man o balance sobre os obxectivos ata o momento e fixar os retos e as directrices a seguir ata 2021.
No acto, que tivo lugar no Restaurante do Centro Superior de Hostelería de Galicia, servido polos alumnos que estudan alí, tamén estiveron presentes a directora de Turismo de Galicia, Nava Castro, e o presidente do Clúster, Francisco González.
Alí analizáronse polo miúdo os logros acadados desde 2014, ano no que se constituíu o Clúster, e o sector tamén aproveitou para transmitirlle ao presidente da Xunta as súas inquedanzas e necesidades.
No que atinxe aos retos do futuro, Nava Castro lembrou que se plantexou o obxectivo, como xa manifestou o presidente en Fitur, de recibir cinco millóns de turistas en 2016. Neste senso, agarda que esta xuntanza sirva para preparar ese camiño.
Gabinete de Comunicación da Xunta de Galicia, 2016-02-17
Actualidad
O equipo, eminentemente galego e cunha moi alta porcentaxe feminina, está a filmar en distintas localizacións das provincias da Coruña e Lugo, a través das que se reconstrúe o nacemento e a evolución da mítica fábrica de cerámica, que se deu en chamar a Bauhaus galega polas cores, formas e deseños vangardistas das súas creacións. Ao tempo, contarase tamén a historia de Galicia a través do seu deseño, cos seus elementos diferenciais e de calidade no centro do discurso. Outros dos escenarios polos que discorrerá Hoxe e o resto do mundo son Cervo (Lugo), onde comeza esta historia a primeiros do século XIX, Sada (A Coruña) e Santiago de Compostela, ademais doutros espazos da cidade herculina.
O CDG celebra os 40 anos da súa fundación desenvolvendo unha intensa programación que estende a súa actividade á produción e participación en 15 espectáculos e proxectos escénicos, a máis de 100 concellos de toda a Comunidade e á colaboración con entidades dunha decena de países en Europa e América. En palabras de Román Rodríguez, conselleiro de Cultura, a unidade teatral continuará avanzando nunhas liñas mestras que, desde o respecto ao pasado, poñen o foco en novas vías de encontro coa cidadanía, na accesibilidade, na proxección exterior ou na creación galega.
Notas
A Facultade de Química será entre os días 3 e 6 de setembro a sede do XI Congreso Internacional de Nanociencia e Nanotecnoloxía Analítica (XI NyNA 2024). O encontro está organizado polo grupo de investigación de Elementos Traza, Espectroscopía e Especiación (GETEE) e o Instituto de Materiais (iMATUS) da USC coa colaboración do Grupo Especializado en Ciencia e Tecnoloxías (Bio) Analíticas da Real Sociedade Española de Química (RSEQ).
Os vindeiros 9, 10 e 11 de abril celébrase na Universidade da Coruña o primeiro congreso IA & Hospitality, un espazo onde se analizará a relación presente e futura entre a Intelixencia Artificial e o turismo, un dos principais motores económicos do noso país. O programa do congreso, que terá lugar no Paraninfo da UDC, inclúe oito mesas de debate nas que se tratará dende a experiencia do cliente ata a ciberseguridade e os destinos e a IA.