miércoles, 22 de abril de 2026
Nota de prensa remitida por el Gabinete de Comunicación de la Xunta de Galicia:
A Xunta de Galicia xestionará, nunha primeira fase, cincuenta vivendas cedidas pola Sociedad de Xestión de Activos Procedentes da Reestructuración Bancaria (Sareb, S.A.), segundo establece o convenio de colaboración asinado entre a dita sociedade e o Instituto Galego da Vivenda e Solo (IGVS), cunha duración de catro anos prorrogable. Despois de que o Consello da Xunta autorizara este convenio, a conselleira de Medio Ambiente, Territorio e Infraestruturas, Ethel Vázquez, e o director xeral da entidade, Óscar García Maceira, acompañado pola directora de Patrimonio, Olga Guitián, rubricaron o convenio de cesión destes inmobles de xeito inmediato e aos que se sumarán de forma progresiva nos novas vivendas.
A sinatura deste acordo supón a posta en marcha efectiva do Plan rehaVIta, aprobado o pasado mes polo Consello da Xunta co obxectivo prioritario de facilitar o acceso á vivenda e evitar situacións de risco de exclusión social.
Durante o acto de sinatura do convenio, Ethel Vázquez salientou que unha vez que as vivendas cedidas sexan debidamente analizadas polos técnicos do Instituto Galego da Vivenda e Solo, procederase a adxudicalas a familias afectadas por execucións hipotecarias ou a aquelas que estean en situación de emerxencia social.
A conselleira de Medio Ambiente explicou que esta adxudicación farase en condicións semellantes as que se empregan coas vivendas de promoción pública propiedade da Xunta, xa que será en réxime de alugueiro e cunha renda mensual que en ningún caso poderá superar o 30% dos ingresos da unidade familiar adxudicataria.
Os adxudicatarios das vivendas pagarán unicamente o importe do alugueiro das mesmas e os consumos que orixinen (enerxía, auga, etc.), pero non lles corresponderá aboar os gastos de comunidades e taxas ou impostos da vivenda, que serán por conta de Sareb, así como os gastos extraordinarios de mantemento da habitabilidade e reparacións das vivendas. Pola súa parte, o IGVS farase cargo dos gastos correspondentes á obtención do certificado de eficiencia enerxética se a vivenda non dispón del, gastos de mantemento e reparacións ordinarias e de xestión e administración dos alugueiros.
O convenio entre o IGVS e a Sareb terá unha duración de catro anos prorrogables por períodos dun ano. Unha vez que finalice o convenio, o IGVS devolverá á Sareb as vivendas baleiras ou con contratos en vigor. Os técnicos do IGVS comprobarán o estado das vivendas cedidas pola Sareb para determinar as actuacións necesarias previas á súa adxudicación.
Este acordo coa Sareb supón materializar unha das primeiras medidas recollidas no Plan de vivenda de Galicia, aprobado polo Consello da Xunta e presentado no Parlamento de Galicia pola conselleira de Medio Ambiente, Territorio e Infraestruturas, Ethel Vázquez, como unha planificación estratéxica que guiará as políticas públicas en materia de vivenda nos próximos cinco anos.
O Plan rehaVIta é o primeiro plan de vivenda que elabora integramente a Xunta de Galicia e ten como obxectivo principal de facilitar o acceso á vivenda ás persoas que máis o necesitan e previr a exclusión residencial. As medidas recollidas no plan suporán un investimento de preto de 600 millóns de euros, dos cales 307 millóns serán fondos públicos, e cunha previsión de beneficiar máis de 152.000 galegos.
Fotografía: Gabinete de Comunicación de la Xunta de Galicia
Inspirada no Camiño da Traslatio, Saias do mar é un espectáculo de danza contemporánea que homenaxea a muller galega como forza ancestral ligada ao mar. A peza transforma o corpo nun territorio fluído e propón unha lectura coreográfica do feminino como memoria viva e indómita, depositaria dunha herdanza espiritual e simbólica, vencellada á ruta sagrada que trouxo o corpo do apóstolo Santiago por vía marítima ata estas terras. Juan Miguel Hernández é o autor da coreografía desta montaxe dirixida por Nerea Andrés, e ambos forman tamén parte do elenco xunto a Dayron Rodríguez, Irene Lorenzo, Laura Pereiras, Lucía Fontenla, Alba Fariña e Zoe Amor. A proposta, de 40 minutos de duración e pensada para poder executarse en todo tipo de espazos, complétase cunha selección musical de Rosa Cedrón, Daniel Minimalia e Luar na Lubre, vestiario de Santos Salgado e atrezzo de Elva Bernat.
O presidente da Xunta informou de que a Xunta vén de solicitar ao Goberno central 'que suspenda de inmediato a reforma do Regulamento de Costas' porque 'invade competencias exclusivas de Galicia e vulnera os dereitos dos titulares de concesións do litoral'. O Goberno autonómico lembra que, nos termos actualmente previstos, este regulamento non se adecuaría ás exixencias da Comisión Europea nin ao propio Dereito comunitario.
