miércoles, 22 de abril de 2026
Nota de prensa remitida polo Gabinete de Comunicación da Xunta de Galicia:
A directora de Turismo de Galicia, Nava Castro, compareceu no Parlamento de Galicia para explicar á acción promocional do departamento que dirixe a través do videoclip Noche y de Día de Enrique Iglesias.
A directora de Turismo de Galicia explicou que a dita iniciativa non é máis que outra das accións incluídas no programa de promoción internacional que se está a desenvolver dende Turismo de Galicia para continuar pola senda de crecemento do turismo internacional. Neste senso, afirmou que, tal e como se recolle na quinta liña estratéxica do Plan Integral de Turismo, dende a administración autonómica estase a desenvolver unha firme aposta pola internacionalización.
A responsable de Turismo da Xunta de Galicia resaltou que a finalidade é promocionar o sector turístico galego e chegar a milleiros de turistas potenciais procedentes de todo o mundo polo que o retorno económico superará con creces o investimento realizado. Unha acción de promoción de Galicia na que colaborou un artista de recoñecemento mundial, incidiu a directora de Turismo de Galicia.
Nava Castro destacou que Enrique Iglesias é capaz de lograr unha repercusión mundial nos medios de comunicación e nas redes sociais a nivel internacional grazas aos seus seguidores que cóntanse por millóns e distribúense ao longo e ancho do mundo. Ademais abarca todas as idades e condicións sociais e económicas e isto é unha baza esencial para que os seus videoclips se convertan en grandes éxitos do panorama mundial, afirmou.
Durante a súa intervención, a directora de Turismo de Galicia resaltou que o videoclip suma nunha soa semana máis dun millón novecentas mil visitas so na plataforma de Vevo. Ademais, soamente as tres publicacións no Facebook do artista previas ao estreo do videoclip con imaxes e referencias a Galicia sumaron máis de dous millóns de visitas, máis de 170 mil usuarios marcaron a opción de Me Gusta, produciron máis de 3.000 comentarios e foron compartidos por mais de 10 mil usuarios. En canto ao Twitter, os tres comentarios do artista anunciando o videoclip, que ademais de incluír a gravación contiña referencias ao noso destino, rexistraron case dous mil e medio de retweets e máis de catro mil favoritos. No que se refire a Instagram, se rexistraron comentarios de usuarios de diferentes partes do mundo como Brasil, Estados Unidos ou Alemaña.
Nava Castro comparou estas espectaculares cifras coas acadadas polos spots promocionais das comunidades autónomas. As visualización dos últimos spots promocionais de todas as comunidades autónomas de España suman un total de 744.741 visualizacións e este videoclip acumula 1.821.904, sinalou a directora de Turismo de Galicia. Isto supón que so este vídeo conseguiu un millón de visitas mais en menos dunha semana que o conxunto dos spots turísticos de todas as comunidades autónomas en meses polo que Galicia estase promocionando a nivel internacional e dándose a coñecer a un público que ata o de agora era inalcanzable., afirmou Nava Castro.
Datos históricos de turismo internacional
Durante a súa intervención, Nava Castro destacou que a política levada a cabo para dar a coñecer Galicia en países estranxeiros constituíu uns dos piares fundamentais para que o mercado internacional presentara o pasado ano un incremento de preto do 11% no volume das súas pernoitas e de máis do 16% no volume dos seus viaxeiros.
A directora de Turismo de Galicia resaltou que con esta mellora acadouse un máximo histórico, superando por vez primeira en Galicia a barreira do millón de viaxeiros e acadando case 1,8 millóns de pernoitas.
Así mesmo, resaltou que o gasto total do turismo internacional no pasado ano ascendeu ata os 895 millóns de euros, un 19,5% máis que no ano anterior.
Estes son datos históricos para Galicia, afirmou Nava Castro. A directora de Turismo de Galicia incidiu en que os datos do turismo internacional avalan as novas políticas turísticas levadas a cabo pola Xunta de Galicia confirmando que as accións internacionais desenvolvidas están a reverter positivamente no sector turístico galego. A nosa estratexia de internacionalización está a fortalecer a marca Galicia, a posicionar o noso destino no exterior e a atraer a diferentes segmentos de mercado, afirmou.
Investimos para dar a coñecer Galicia o que reverterá na economía, no emprego e na facturación do sector e continuará coa senda do incremento dos peregrinos, do turismo nacional, do internacional, do seu gasto e de todos os indicadores que nos mostran que o turismo en Galicia está nunha tendencia positiva, concluíu a directora de Turismo de Galicia.
Nota de prensa remitida polo Gabinete de Comunicación do BNG:
A parlamentaria do BNG, Carme Adán volveu criticar, na Comisión de Turismo, o investimento de 300.000 euros nun videoclip de Enrique Iglesias para a promoción do turismo de Galicia.
Para a deputada, o vídeo supón un despilfarro de cartos públicos como xa denunciaron, dixo, os diferentes sectores da cultura galega, sobre todo da música e o do audiovisual. Ademais, engadiu, non vemos por ningún lado a transparencia da que presume Núñez Feijóo , non coñecemos nin o contrato nin as cláusulas do mesmo polo que requiriu da responsábel de Turismo unha copia das condicións contractuais entre a Xunta e produtora do cantante.
A parlamentaria tamén preguntou porqué resulta máis caro rescindir o contrato que executalo como afirmou onte o portavoz do Partido popular, Agustín Baamonde, en resposta a unha pregunta formulada en comisión pola tamén deputada do BNG, Ana Pontón.
Moitos gústame e retweet avalan para a Xunta o videoclip de Enrique Iglesias
Pola súa parte, a directora de Turismo foi tallante na resposta e afirmou que non romperá o contrato porque será un grande éxito nas redes sociais como indica, explicou, a grande cantidade de gústame e retweets rexistrados. A parlamentaria ironizou sobre esta cuestión asegurando que se as campañas publicitarias da Xunta van a xustificarse por moitos gústame, xa non entendía nada.
No transcurso do debate , Adán lamentou que os datos do turismo en Galiza non sexan positivos, sobre todo en turismo rural e cultural, polo que preguntou si existen informes previos sobre o retorno económico do devandito vídeo para non levar outra sorpresa negativa como aconteceu coa visita do Papa.
Adán volveu preguntar porqué o contrato é confidencial e a Xunta non impide que o Parlamento coñeza en que condicións foi realizado polo que volveu solicitar unha copia das cláusulas.
Non coñecemos o contrato nin os informes que o xustifiquen o que nos leva a pensar, dixo, que houbo escurantismo. Qué clase de turismo quere vostede potenciar con este vídeo, a quén vai dirixido e non me responda que hai moitos gústame e retweets porque iso non representa ningún retorno económico, concluíu.
Estase a celebrar a Asemblea Xeral anual de NECSTouR, a rede de rexións europeas centrada en promover o turismo sostible e competitivo. A xuntanza que se desenvolve baixo o lema 'Turismo e cultura: da creación ao legado -construíndo territorios resilentes e conectados' ten lugar estes días en Bourges, no Val de Loira (Francia), e no marco da mesma, a entidade vén de acordar a celebración da vindeira cita anual en Galicia coincidindo co Xacobeo 2027. En NECSTouR están representadas un total de 44 rexións europeas e 32 organizacións académicas, asociacións e redes de empresas de turismo sostible, que representan a 19 países europeos.
Alfonso Rueda anunciou que Galicia será a primeira comunidade que regule os exames virtuais para o ensino público non universitario. Esta regulación para a 'educación do futuro', que se encadra na futura Lei de educación dixital, contempla o emprego de 'sistemas biométricos que garantan a autenticidade dos resultados' no caso de probas a distancia sen supervisión docente. Neste sentido, cómpre lembrar que esta Lei incorporará outras medidas destinadas a responder os retos presentes e futuros da educación, como que a comunicación entre profesores e familias se produza só a través de Abalar, a prohibición de gravar clases sen autorización, ou a regulación do uso da intelixencia artificial ou do móbil nas aulas.
