jueves, 29 de octubre de 2026
Nota de prensa remitida por el Gabinete de Comunicación de la Xunta de Galicia:
O Salón Teatro da Consellería de Cultura, Educación e Ordenación Universitaria será o escenario o venres día 30 de maio, ás 20.30 horas, do concerto no que Fetén Fetén presentará en directo os temas de Bailables, o seu novo traballo discográfico. O dúo burgalés de música folk chega a Compostela como parte do cartel do ciclo Sons14 que organiza o Concello de Santiago.
O grupo do violinista Diego Galaz e do acordeonista Jorge Arribas, ex integrantes ambos da mítica banda La Musgaña e colaboradores habituais de destacados artistas do panorama estatal, ofrece un directo inspirado nos salóns de baile, nas sesións vermú e nas festas populares. Trátase, en definitiva, de música para bailar destinada a todos os públicos e baseada nos ritmos de sempre: valses, boleros, pasodobres, xotas, tangos, rumbas, fox trot, chotis, chachachás...
Como músicos polifacéticos, Galaz e Arribas incorporan ao seu espectáculo ao vivo unha chea de instrumentos insólitos, como o violín-trompeta, o vibrandoneón, o serrucho ou o metalófono, que interpretan xunto co violín, o acordeón, a mandolina e a frauta. Nos directos acompáñaos, ademais, o percusionista Diego Martín.
Bailables é o segundo álbum de Fetén Fetén, tras a edición en 2011 do seu disco de debut homónimo. Dábase a coñecer daquela o proxecto musical que estes novos músicos comparten desde 2009 co obxectivo de poñer banda sonora ás súas influencias e recordos. Así, as súas composicións orixinais ofrecen unha ruta pola memoria das raíces e tradicións, sen esquecer outras das súas preferencias musicais. Botan así man de sons mediterráneos, ritmos do Leste de Europa e influencias da música castelá como ingredientes claves da súa traxectoria.
As entradas para o concerto deste venres no Salón Teatro poden mercarse no despacho de billetes do Teatro Principal, aberto de 18.00 a 21.00 horas. No Salón Teatro estarán dispoñibles o día da actuación deste as 18.30 horas.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
O informe da Dirección Xeral de Saúde Pública da Consellería de Sanidade sobre a actividade das infeccións respiratorias agudas referido á semana que rematou o 25 de outubro reflicte que a actividade gripal na comunidade mantén o seu nivel basal con tendencia crecente, constatando un incremento na dispensación de antigripais nas farmacias galegas. En concreto, a taxa de dispensación de antigripais nas farmacias aumentou un 38,9 % na última semana, mentres que a de probas de antíxenos se reduciu nun 17,9 %, tal e como informan as oficinas de farmacia integradas na rede sentinela impulsada pola Xunta, co obxectivo de anticipar a evolución dos virus respiratorios na comunidade.
