viernes, 24 de abril de 2026
Nota de prensa remitida por el Gabinete de Comunicación de la Xunta de Galicia:
A Consellería de Cultura, Educación e Ordenación Universitaria estrea o venres 21 de febreiro na Coruña o ballet clásico A bela adormecida, produción do Centro Coreográfico Galego (CCG) en colaboración coa Orquestra Sinfónica de Galicia (OSG), que interpretan un total de 64 bailaríns e 73 músicos. O Pazo da Ópera encherase esta fin de semana durante as dúas primeiras funcións para público xeral do espectáculo, que congregarán máis de 3.200 espectadores. De feito, nestes momentos quedan poucas entradas para o pase de mañá, ás 20.00 horas, mentres que xa están esgotadas todas as localidades para o do sábado, ás 18.00 horas.
O conselleiro de Cultura e Educación, Xesús Vázquez Abad, asistirá mañá a esta primeira representación completa do espectáculo, con dirección escénica da responsable do CCG, Mercedes Suárez, e musical do mestre Jonathan Webb, á batuta da Sinfónica. No seu formato didáctico, A bela adormecida xa foi vista polos máis de 8.500 alumnos de 71 colexios que asistiron aos seis pases escolares programados no Pazo da Ópera durante a pasada semana.
Para a versión en dous actos do célebre ballet de Tchaikovski e Petipa, coa que arrinca o plan de produción do Centro Coreográfico para 2014, a unidade de danza da Xunta de Galicia conta tamén coa participación de alumnos dun total de 10 conservatorios e escolas de danza de toda Galicia. Neste sentido, afonda na mesma fórmula de colaboración didáctica emprendida co Quebranoces, a súa anterior proposta clásica, cunha dobre finalidade: dunha banda, contribuír á creación de novos públicos para esta disciplina artística e doutra, favorecer a motivación dos estudantes e profesores mediante a súa implicación nunha produción coreográfica a nivel profesional.
Así, nestas primeiras representacións o elenco de 12 bailaríns profesionais do Centro Coreográfico Galego Àstrid Molinero, Juan M. Hernández, Paula Montoya, Ailen Ramos, Carmen Aparicio, Ana Serantes, Carlos Huerta, Jesús Benzal, Miguel A. Ponte, Rubén Ventoso, Raquel Santacruz e José Luís Cibreiro comparte escenario con rapaces e rapazas de diferentes idades que cursan estudos de danza nos conservatorios profesionais de Lugo e da Deputación da Coruña, así como nas escolas Danzade, Druída e Carmen da Coruña, Náyade de Ames, Cinderella de Arteixo, Danzarte de Betanzos e nas municipais de Oleiros e Ponteceso.
Na ficha artística desta nova montaxe clásica, María Villas repite como deseñadora do vestiario e da escenografía, que como é habitual nas producións da compañía pública foron realizados polos equipos de xastrería e de talleres da Agadic (Axencia Galega das Industrias Culturais).
A bela adormecida concentra en dous actos un dos ballets máis aclamados do repertorio clásico internacional, estreado en 1890 con coreografía de Petipa, libreto de Vsevolojski e música de Tchaikovski. A primeira parte céntrase na historia da princesa Aurora escrita polo francés Charles Perrault, mentres que a segunda parte corresponde ao terceiro acto do orixinal e recrea outros contos do mesmo autor, como O gato con botas, Carapuchiña vermella ou O paxaro azul.
Ademais, durante as representacións do Centro Coreográfico Galego na Coruña, o Pazo da Ópera acolle na súa entrada unha exposición dos 34 debuxos recibidos pola compañía pública con motivo do concurso infantil que organizou arredor deste ballet. A obra da gañadora Inés Vieiro, de Santiago de Compostela ilustra, así mesmo, o cartel do espectáculo, no que tamén se incorporaron detalles do debuxo de Miranda Rodríguez, de Sada, quen recibiu unha mención especial neste certame.
Nestes momentos, a venda anticipada das últimas localidades para a función de mañá venres continúa operativa a través da web entradas.novagaliciabanco.es como parte do programa Concertos en familia da Sinfónica. Tamén se poden adquirir no despacho de billetes da praza de Ourense (de 9.30 a 13.00 e de 16.30 a 19.30 horas) ou na billeteira do Pazo da Ópera, aberta os días de representación de 11.00 a 14.00 horas e a partir das 17.00 horas.
Tras esta fin de semana na Coruña, 'A bela adormecida' poderá verse proximamente nos auditorios municipais de Vilagarcía de Arousa (23 de marzo), Cangas do Morrazo (29 de marzo) e Lugo (30 de abril).
O festival Play-Doc desenvolverá do 29 de abril ao 3 de maio en Tui a súa 22ª edición para conectar memoria, creación actual e futuro do cinema galego e internacional. No ámbito galego, a programación desta edición volve ocupar un lugar central cunha Competición Galicia que reúne títulos de Xiana do Teixeiro, Roi Fernández, Xacio Baño, Adrián Canoura, Cristina Souto, Hugo Amoedo, Bea Lema, Berio Molina e Chloé Lecci López, entre outras voces. O festival mantén, ademais, a sección Sombras, dedicada nesta ocasión á recuperación da figura de Rafael Luca de Tena, e unha nova edición de Coming Soon, espazo no que se presentarán proxectos galegos en desenvolvemento. O Play-Doc continúa a reforzar a súa función de escaparate e plataforma de difusión para a produción audiovisual do país e como punto de encontro para novas obras e profesionais.
O número de persoas en Galicia que le ocasional ou habitualmente na nosa lingua medra en case nove puntos ata acadar o 72 %, isto é, sete de cada dez galegos. Ademais deste incremento do 13 por cento na lectura ocasional ou habitualmente en galego con respecto ao ano anterior, o estudo de 2025 tamén revela a consolidación dunha Galicia lectora, reflectida no sindicadores que sinalan que o 96,5 % da poboación maior de 14 anos le en calquera medio e soporte, o que sitúa a nosa Comunidade nun 1,4% por enriba da media de España. Ademais, o 70 % destas lecturas son de libros.
