viernes, 30 de octubre de 2026
Nota de prensa remitida por el Gabinete de Comunicación de la Xunta de Galicia:
O Salón Teatro da Consellería de Cultura, Educación e Ordenación Universitaria acolle o xoves día 16, ás 21.00 horas, o concerto no que o cantautor compostelán Xosé Constenla compartirá co público da súa cidade a publicación do disco Sinecismo, gravado en directo o pasado mes de xuño neste mesmo escenario.
Nesta ocasión, estará acompañado por Javier Constenla aos teclados e Róber Vázquez á batería para interpretar temas recollidos neste traballo discográfico, que acaba de ver a luz da man de Setestrelo Editora, ademais de novas composicións que está a incorporar ao seu repertorio.
O equipo técnico do Salón Teatro volve participar na realización desta actuación, como xa o fixera o ano pasado durante o concerto que quedou recollido en Sinecismo, para o que Xosé Constenla contou tamén coa colaboración do Servizo de Producións e Arquivo Sonoro da CRTVG e das produtoras Tingalaranga e Picnic Ideas Felices. O resultado é un CD-DVD, para cuxa edición levou a cabo unha campaña de crowdfunding.
Nado en Compostela en 1980, Xosé Constenla asume con naturalidade a definición de cantautor xa que, de feito, a súa música está directamente vinculada co sentido de compromiso social. Xa desde pequeno gustaba de escribir narrativa e poesía, gañando preto dunha ducia de premios literarios, ao tempo que comezaba a entrar en contacto cos grandes cantautores ibéricos e latinoamericanos.
Con 16 anos compón os seus primeiros temas musicais e ao ano seguinte lánzase a actuar en locais de Santiago. Na actualidade, é un habitual das escena musical compostelá e galega, ademais de visitar coa súa guitarra diferentes espazos e salas de Cataluña, Castela e León, Asturias e Madrid.
O disco que gravou en directo no Salón Teatro é o terceiro da súa traxectoria, tras Quen fixo berrar o silencio (autoeditado, 2005) e Olladas dun entusiasta (Setestrelo Editora, 2008).
Ademais, en 2011 Xosé Constenla inicia un intenso período creativo durante o que compón máis de 30 cancións, sen abandonar nunca o contacto co público a través dos directos. Ao tempo, o cantaoutor traballa na recuperación e revisión de temas compostos entre 1998 e 2003 cara á súa gravación nun formato acústico.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
O informe da Dirección Xeral de Saúde Pública da Consellería de Sanidade sobre a actividade das infeccións respiratorias agudas referido á semana que rematou o 25 de outubro reflicte que a actividade gripal na comunidade mantén o seu nivel basal con tendencia crecente, constatando un incremento na dispensación de antigripais nas farmacias galegas. En concreto, a taxa de dispensación de antigripais nas farmacias aumentou un 38,9 % na última semana, mentres que a de probas de antíxenos se reduciu nun 17,9 %, tal e como informan as oficinas de farmacia integradas na rede sentinela impulsada pola Xunta, co obxectivo de anticipar a evolución dos virus respiratorios na comunidade.
