viernes, 30 de octubre de 2026
Nota de prensa remitida por el Gabinete de Comunicación de la Xunta de Galicia:
A compañía galega Chévere desenvolve no Teatro Valle-Inclán de Madrid e dentro da temporada do Centro Dramático Nacional (CDN) unha serie de 23 funcións do seu espectáculo Eurozone, dúas delas en idioma orixinal galego polo apoio da Consellería de Cultura, Educación e Ordenación Universitaria.
A obra escrita por Manuel Cortés con dirección e dramaturxia de Xron a propósito dunha particular interpretación da crise na zona euro, permanecerá na carteleira da Sala Francisco Nieva do Teatro Valle-Inclán, situado na praza de Lavapiés, entre o 30 de outubro e o 24 de novembro, con seis representacións semanais de martes a domingo.
Ademais, e como actividades paralelas de difusión, o CDN organizará un encontro da compañía co público madrileño ao final da función do día 7 e unha mesa redonda o 11 de novembro baixo o título Eurozona. Hai alternativas? Este coloquio, que será moderado pola xornalista de Tele 5 Leticia Iglesias, contará coa participación de Carlos Berzosa (catedrático de Economía Aplicada), Alicia González (redactora económica), César Molinas (matemático e economista) e Ricardo Zaldívar (doutor en Economía e Urbanismo).
Manuel Cortés, Miguel de Lira, Patricia de Lorenzo, Borja Fernández, Mónica García, Iván Marcos, Pepe Penabade e Arantza Villar interpretan esta proposta escénica que se estreou o pasado 22 de febreiro no auditorio da Ramallosa (Teo), onde permaneceu cinco semanas e foi vista por 1.700 espectadores. Agora entra na programación do Centro Dramático Nacional con 23 funcións, 21 en idioma castelán e dúas en galego, as correspondentes ao sábado 9 e o domingo 10 de novembro. Deste xeito, o espectáculo poderá verse tamén no idioma orixinal no que foi concibido o espectáculo grazas á colaboración brindada neste sentido pola Consellería de Cultura, Educación e Ordenación Universitaria.
Así o explicou hoxe nun almorzo informativo cos medios de comunicación da capital española o director da Axencia Galega das Industrias Culturais (Agadic), Jacobo Sutil, quen participou xunto aos creadores de Eurozone nun encontro cos xornalistas especializados e no que tamén interveu Ainhoa Amestoy por parte do Centro Dramático Nacional.
O director da Agadic referiuse a estadía de representacións de Chévere en Madrid como un éxito do teatro galego en xeral e felicitou tanto os responsables do CDN como aos membros da compañía por conseguir programar estas funcións no Teatro Valle-Inclán, o que constituirá, segundo dixo, unha excelente oportunidade para amosar diante do público non galego o traballo escénico que se desenvolve actualmente en Galicia.
Eurozone é unha farsa teatral sobre a crise da zona euro, que mestura referencias directas a Reservoir Dogs, a mítica primeira película de Quentin Tarantino, na que están presentes a linguaxe da publicidade e o argot económico que ultimamente inunda o día a día dos cidadáns. A montaxe xorde como resposta á última escena do espectáculo anterior da compañía: Citizen. Se entón Chévere deixaba aberto o final como un xesto escénico de escoita ao público, en Eurozone, a compañía deixa clara desde o principio a súa visión sobre os conflitos do presente.
Trátase de establecer un diálogo entre a peza teatral e o seu referente no cinema, para amosar aos espectadores cales poden ser os paralelismos entre os personaxes de Reservoir Dogs e os principais líderes político-económicos da Europa actual.
Por riba do resultado artístico, Eurozone é unha demostración do compromiso da compañía por manter activa unha cultura independente, un teatro de creación contemporánea e un traballo de creación colaborativa. De feito, no proceso de construción de Eurozone participou o equipo completo de oito actores e actrices ao longo de dous meses de ensaios.
O resultado é unha obra coral na que todo o elenco comparte escenario durante a representación e na que a escenografía, resultado dun concurso de ideas realizado en colaboración co Colexio de Arquitectos de Galicia ao que se presentaron 32 proxectos españois e portugueses, xoga un papel moi importante.
Fotografía: Gabinete de Comunicación de la Xunta de Galicia.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
O informe da Dirección Xeral de Saúde Pública da Consellería de Sanidade sobre a actividade das infeccións respiratorias agudas referido á semana que rematou o 25 de outubro reflicte que a actividade gripal na comunidade mantén o seu nivel basal con tendencia crecente, constatando un incremento na dispensación de antigripais nas farmacias galegas. En concreto, a taxa de dispensación de antigripais nas farmacias aumentou un 38,9 % na última semana, mentres que a de probas de antíxenos se reduciu nun 17,9 %, tal e como informan as oficinas de farmacia integradas na rede sentinela impulsada pola Xunta, co obxectivo de anticipar a evolución dos virus respiratorios na comunidade.
