viernes, 30 de octubre de 2026
Nota de prensa remitida por el Gabinete de Comunicación de la Xunta de Galicia:
A Consellería de Cultura, Educación e Ordenación Universitaria celebra o xoves, 4 de xullo, a apertura da terceira edición do ciclo Atardecer no Gaiás a ritmo da banda galega Lendrone e un dos dúos imprescindibles do panorama musical nacional: His Majesty the King.
O concerto inaugural de Atardecer no Gaiás arranca a partir das 21:00 horas na praza central da Cidade da Cultura, que un verán máis se converterá no lugar ideal para escoitar a mellor música en actuacións de pequeno formato e totalmente de balde.
Nesta primeira sesión, o público poderá vivir en directo unha mestura única de rock instrumental, psicodelia espacial e krautrock a ritmo dos galegos 'Lendrone' e o seu primeiro disco: 'Uno, once cortes de rock instrumental que non deixarán indiferente a ninguén'.
Tras eles subirase ao escenario do Gaiás o dúo 'His Majesty the King'. Cun rock que se abre desde Elastica ata The White Stripes, Nacho e Clara amenizarán este primeiro atardecer a través dos temas do seu segundo traballo, con letras e melodías inspiradas nos sons das bandas dos 90.
Este dobre concerto de 'Lendrone' e 'His Majesty the King' co que se abre 'Atardecer no Gaiás' substitúe a actuación prevista dos italianos 'Niagara' que, por motivos alleos á organización, non poderá celebrarse. A Cidade da Cultura lamenta as posibles molestias que este cambio no programa lle poida ocasionar ao público do ciclo.
Tras esta estrea enérxica, o venres 5 de xullo volve á Cidade da Cultura a Orquestra de Cámara Galega, dirixida por Rogelio Groba, que ofrecerá ao longo do verán un miniciclo de catro concertos. O primeiro levará o título de 'Schubertiada' e nel, seguindo a tradición vienesa dos séculos XVIII e XIX, un ensemble de músicos da Orquestra de Cámara Galega interpretará unha selección de obras de cámara e para grupo instrumental dos compositores Schubert e Mozart.
O broche de ouro a esta primeira semana de 'Atardecer no Gaiás' porao a banda viguesa 'Mvnich' e o seu post punk. Tras coquetar con sons escuros e contundentes, 'Mvnich' chega á Cidade da Cultura para ofrecer en directo os temas do seu primeiro disco, 'Ina', unha combinación de sons levados ao límite baixo un patrón de emotividade e funcionalismo abismais.
Todas as actuacións de 'Atardecer no Gaiás' celebraranse ás 21:00 horas e terán unha duración aproximada dunha hora ou hora e media. Para subir á Cidade da Cultura, o público poderá tomar a liña 9 do autobús urbano, que pasa a cada hora por puntos céntricos de Santiago de Compostela como a rúa Senra ou Virxe da Cerca.
Do mesmo xeito, quen desexe baixar da Cidade da Cultura en urbano terá dispoñible un último autobús ás 22:45, cun percorrido circular (C11) que contará con parada no centro de Santiago, na rúa Xeneral Pardiñas.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
O informe da Dirección Xeral de Saúde Pública da Consellería de Sanidade sobre a actividade das infeccións respiratorias agudas referido á semana que rematou o 25 de outubro reflicte que a actividade gripal na comunidade mantén o seu nivel basal con tendencia crecente, constatando un incremento na dispensación de antigripais nas farmacias galegas. En concreto, a taxa de dispensación de antigripais nas farmacias aumentou un 38,9 % na última semana, mentres que a de probas de antíxenos se reduciu nun 17,9 %, tal e como informan as oficinas de farmacia integradas na rede sentinela impulsada pola Xunta, co obxectivo de anticipar a evolución dos virus respiratorios na comunidade.
