viernes, 30 de octubre de 2026
Nota de prensa remitida por el Gabinete de Comunicación de la Xunta de Galicia:
A Consellería de Cultura, Educación e Ordenación Universitaria ofrece o venres 7, ás 21.00 horas, no Salón Teatro de Santiago de Compostela a presentación da curtametraxe Flores para Amalia, do director guardés Nani Matos. A fita, que está a iniciar o seu percorrido de proxeccións e participación en festivais, acaba de ser recoñecida cos premios do público e do xurado dos veciños á mellor curta de ficción na pasada edición do Festival de Cans.
Mela Casal e Gonzalo Uriarte protagonizan esta historia intimista sobre unha parella que pasa os últimos anos da súa vida nunha residencia para maiores, onde a longa enfermidade da muller levará o seu home a tomar unha decisión. Trátase dun traballo sobre os pequenos xestos da vida e sobre a capacidade de conmovernos co máis próximo. Como sinala o seu director, Flores para Amalia é unha desas historias cotiás que moitas veces pasan diante de nós case sen nos decatar, quizais porque a maioría dos que as protagonizan pasan inadvertidos para unha sociedade que non se para a mirar cara a atrás.
Nani Matos contou para este traballo cun elenco de recoñecidos intérpretes da escena e do audiovisual galegos, no que xunto con Mela Casal e Gonzalo Uriarte figuran Luis Iglesia B., Susana Dans, Teté García, Avelino González, Xan Cejudo, Santi Cortegoso, Xosé M. Esperante e Machi Salgado. Parte do equipo artístico e técnico desta curtametraxe acompañará o director e os protagonistas na presentación deste venres na sede compostelá do Centro Dramático Galego (CDG), para a que a entrada é libre ata completar a capacidade.
Rodada en diferentes localizacións da provincia de Pontevedra, Flores para Amalia foi estreada o pasado mes de abril no Teatro Principal da cidade do Lérez e na súa breve traxectoria foi seleccionada tamén para ser exhibida na sección oficial do Festival Primavera de Cine de Vigo.
Coñecido principalmente pola súa faceta de actor teatral e televisivo, Nani Matos regresa con este novo título á realización audiovisual, na que debutou en 2009 como guionista e director da curtametraxe Dies Dei. Con este primeiro traballo participou durante dous anos en máis de vinte festivais internacionais, percorrido durante o que obtivo media ducia de galardóns e mencións especiais.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
O informe da Dirección Xeral de Saúde Pública da Consellería de Sanidade sobre a actividade das infeccións respiratorias agudas referido á semana que rematou o 25 de outubro reflicte que a actividade gripal na comunidade mantén o seu nivel basal con tendencia crecente, constatando un incremento na dispensación de antigripais nas farmacias galegas. En concreto, a taxa de dispensación de antigripais nas farmacias aumentou un 38,9 % na última semana, mentres que a de probas de antíxenos se reduciu nun 17,9 %, tal e como informan as oficinas de farmacia integradas na rede sentinela impulsada pola Xunta, co obxectivo de anticipar a evolución dos virus respiratorios na comunidade.
