viernes, 30 de octubre de 2026
Nota de prensa remitida por el Gabinete de Comunicación de la Xunta de Galicia:
O conselleiro de Cultura, Educación e Ordenación Universitaria, Xesús Vázquez Abad mantivo unha reunión de traballo con representantes da Secretaría de Cultura da Nación Arxentina, na que se acadou o compromiso para realizar un encontro de industrias culturais protagonizado por Galicia e o país suramericano que servirá para establecer sinerxías noutros eidos xuntando tradición e modernidade. O evento dará a coñecer a oferta cultural arxentina a programadores e xestores culturais galegos e do resto de España e Portugal. A mostra, que collerá a testemuña do Mercado de Industrias Culturais Arxentinas (MICA) celebrado en abril na cidade de Bos Aires, terá lugar na primeira quincena de novembro con sede principal na Cidade da Cultura, incluíndo ademais a realización dalgún evento concreto no casco histórico da cidade de Santiago de Compostela.
A través deste certame galego sobre as industrias culturais arxentinas, Galicia configurarase como a porta de entrada dos produtos e servizos culturais e creativas do país suramericano en Europa. O encontro contará, por unha banda, cun cariz profesional onde os representantes dos sectores profesionais culturais, cámaras de comercio e clústeres culturais arxentinos intercambiarán coñecemento, experiencias e proxectos cos seus correspondentes en Galicia, España e Portugal. Por outra banda, o encontro servirá como programa de exhibición nos ámbitos culturais e creativos: audiovisual, música, artes escénicas, ou deseño.
O goberno arxentino pretende que este evento de intercambio teña continuidade en 2014, coa participación galega no mercado das industrias culturais de América do Sur (MICSUR), que se vai celebrar en Bos Aires do 15 ao 18 de maio e para o que se abriron novas vías de diálogo.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
O informe da Dirección Xeral de Saúde Pública da Consellería de Sanidade sobre a actividade das infeccións respiratorias agudas referido á semana que rematou o 25 de outubro reflicte que a actividade gripal na comunidade mantén o seu nivel basal con tendencia crecente, constatando un incremento na dispensación de antigripais nas farmacias galegas. En concreto, a taxa de dispensación de antigripais nas farmacias aumentou un 38,9 % na última semana, mentres que a de probas de antíxenos se reduciu nun 17,9 %, tal e como informan as oficinas de farmacia integradas na rede sentinela impulsada pola Xunta, co obxectivo de anticipar a evolución dos virus respiratorios na comunidade.
