jueves, 16 de abril de 2026
Nota de prensa remitida por el Gabinete de Comunicación de la Xunta de Galicia
A Axencia Galega das Industrias Culturais (Agadic) coproduce o espectáculo coreográfico SeisdeCatro, que seis integrantes de catro compañías de danza galegas estrean mañá venres 30 no Teatro de la Danza de San José de Costa Rica. A montaxe, promovida pola produtora Neodans co apoio do Ministerio de Cultura y Juventud do país centroamericano, representarase en distintos escenarios galegos a partir do 15 de outubro baixo a dirección artística de Erick Jiménez.
O propio Jiménez, bailarín e coreógrafo natural de Costa Rica que leva realizando en Galicia os seus últimos traballos, interpreta SeisdeCatro xunto a Maruxa Salas, Rut Balbís, Alexis Fernández, Caterina Varela e Henrique Peón; o que supón a participación na creación e desenvolvemento do proxecto de catro das compañías galegas de danza con maior proxección na actualidade: Sólodos, Pisando Ovos, La Macana e Quique Peón Cía.
O espectáculo, que se xestou nunha residencia de creación como premio do XXIV Certamen Coreográfico de Madrid, materializouse nunha proposta coreográfica sen fronteiras, que defende o intercambio e a posta en común entre os seus seis creadores como premisa fundamental, para despois continuar coa experiencia artística colectiva mediante a súa representación diante do público. Nos ensaios da semana previa á estrea participou tamén a Compañía Nacional de Danza de Costa Rica.
Como fío temático, Seisdecatro centra a súa atención nos planos da realidade e da fantasía e en distintos momentos cotiáns que se poden combinar cun mundo irreal e co inicio de camiños inesperados. O colectivo creativo parte da aceptación de que os feitos son reais pero sempre teñen unha connotación fantástica, o que pode suceder porque non teñen explicación ou pola improbabilidade de que ocorran.
A Axencia Galega das Industrias Culturais da Consellería de Cultura e Turismo participa economicamente neste proxecto, que ten colleitado tamén a colaboración de distintas institucións e entidades americanas, como son a Compañía Nacional de Danza Costa Rica, o Instituto Costarricense de Turismo ou a Plataforma Internacional Real.
Gala de danza galega
Os integrantes de SeisdeCatro representarán este espectáculo os días 30 de setembro e 1 de outubro; e aproveitarán a súa estadía na capital de Costa Rica para levar a cabo o 2 de outubro no mesmo escenario a denominada Gala de compañías de danza galegas, na que amosarán fragmentos ou pezas completas dalgunhas das súas últimas creacións coreográficas realizadas coas súas respectivas compañías. Así, Pisando Ovos (Rut Balbís e Erick Jiménez) ofrecerá un extracto de 30.000, La Macana (Alexis Fernández e Caterina Varela) representarán Ven, Quique Peón Cía (Henrique Peón) bailará parte de Ovay e Sólodos (Erick Jiménez e Maruxa Salas) interpretarán a coreografía titulada Vigilia en ausencia.
Na mesma gala colabora a compañía UNA Danza Joven, pertencente á escola de danza da Universidad Nacional de Costa Rica, que amosará Azul, unha coreografía para 21 bailaríns deseñada por Maruxa Salas e Erick Jiménez.
Este órgano está formado por 12 expertos de recoñecido prestixio, tanto a nivel galego como internacional, nos ámbitos científico, tecnolóxico, empresarial e das políticas públicas. Na actualidade a Comunidade despunta en ámbitos como a biotecnoloxía, a intelixencia artificial ou a computación cuántica e acada numerosos fitos. O obxectivo deste consello asesor é apoiar e asesorar ao Executivo autonómico nas súas políticas públicas de I+D+i para seguir acadando éxitos e posicionando Galicia como un territorio de referencia nesta materia. As persoas que forman parte deste organismo, ademais do conselleiro, e a directora da Axencia Galega de Innovación, Carmen Cotelo, son cinco no eido da investigación, tres no das políticas públicas e catro no ámbito da innovación, empresa e emprendemento.
Galicia consolida a súa posición como a comunidade española que máis logrou reducir en 2024 as emisións netas de gases de efecto invernadoiro (GEI) con respecto a 1990, ano de referencia a nivel comunitario para as políticas en materia de clima. En concreto, a baixada rexistrada neste período foi do 68,5% fronte ao 12,8% no que se sitúa a media nacional. Os últimos datos oficiais dispoñibles volven situar a Galicia á cabeza da clasificación nacional en canto a redución de emisións netas. No período 1990-2024 Galicia logrou reducir en máis de dous terzos as súas emisións netas e tamén é a comunidade española que lidera a baixada de emisións GEI interanual, cun 9,8% menos que en 2023.
