sábado, 31 de octubre de 2026
A Mediateca do Centro Galego das Artes da Imaxe, está especializada en cine, fotografía e comunicación audiovisual. Estará aberta ao público en horario de 10 a 14 horas e permitirá a consulta dos fondos propios do CGAI, así como ao material do NO-Do relacionado con Galicia, do que existe copia na institución. Só os fondos da Biblioteca inclúen máis de 7.000 monografías, máis de 4.000 publicacións periódicas e novas relacionadas co audiovisual galego.
As instalacións da Mediateca do CGAI contan con 10 postos de consulta para investigación e cinco cabinas de visionado (catro delas para todo tipo de material e unha para o material do NO-DO). A sala está dotada tamén con servizo de reprografía e conexión gratuíta a internet.
Os usuarios poderán contactar coa nova Mediateca do Centro Galego de Artes da Imaxe a través da páxina www.cgai.org, que abre o acceso ás bases de datos dos fondos bibliográficos, hemerográficos e á Bibliografía do Cine Galego, elaborada polo Departamento de Cine da USC.
A Mediateca do CGAI permitirá, ademais, facer uso dun servizo de préstamo gratuíto das producións audiovisuais sobre as que a Xunta de Galicia ten dereitos de difusión cultural e daquelas películas recuperadas e restauradas polo CGAI. Este servizo está dirixido a institucións e asociacións sen ánimo de lucro que teñan como obxectivo difundir a produción audiovisual galega, que poderán presentar as solicitudes a través da web www.cgai.org.
Vinte anos da Filmoteca de Galicia
O Centro Galego de Artes da Imaxe, a Filmoteca de Galicia, cumprirá o vindeiro 15 de marzo vinte anos como institución responsable autonómica do audiovisual e salvagarda do seu patrimonio neste campo. Exerce, desde as súas orixes, coa seguintes funcións:
-A recuperación, catalogación, custodia e difusión das producións e obras do patrimonio audiovisual e fotográfico galego.
-A programación de proxeccións, exposicións, conferencias, publicacións, etc. co fin de proporcionar un maior coñecemento das artes da imaxe.
-A colaboración, cos obxectivos anteriores, en actuacións en Galicia e no exterior.
-A participación na promoción da produción audiovisual galega en mercados, mostras e festivais.
Na actualidade o CGAI posúe preto de 3.000 copias en soporte cinematográfico, 4.000 copias en soporte videográfico, compilando toda a produción subvencionada desde 1984. Completan o seu importante arquivo uns 10.000 carteis e un inxente fondo fotográfico, incluídos os fondos fotográficos e fílmicos do escritor arxentino Julio Cortázar (conseguidos por José Luis Cabo).
Homenaxe a José Luis Cabo
A Mediateca do Centro Galego de Artes da Imaxe leva o nome do que foi director da institución entre 1999 e 2006, José Luis Cabo (1957-2009), quen traballou para a Filmoteca desde os seus inicios. Historiador da fotografía, documentalista e activista cultural de ampla traxectoria, el mesmo fotógrafo, foi unha figura crucial na difusión do audiovisual en Galicia, grazas as súas políticas de apoio e de impulso de exposicións que permitiron a consolidación de fotógrafos galegos como Vari Caramés ou Manuel Vilariño. Foi responsable de innumerables propostas editoriais, restauracións cinematográficas, mostras de fotografía histórica (Ruth Anderson, Pedro Brey, Jean Dieuziade, Schmidt de las Heras ou Sebastiao Salgado) e actividades formativas, como os curso de Cero en Conducta e os Cartoon Master, destacando o pioneiro mercado de animación do Cartoon Forum.
Coordinador de Audiovisual Galego (2003) e das dúas edicións do Diccionario do Cine en Galicia, a última en 2009, autor dunha monografía sobre Fernando Rey (1994), así como de Espectáculos precinematográficos en Galicia (1990), os seus traballos de investigación versaron tamén sobre a fotografía clásica ou a arquitectura dos cines galegos.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
O informe da Dirección Xeral de Saúde Pública da Consellería de Sanidade sobre a actividade das infeccións respiratorias agudas referido á semana que rematou o 25 de outubro reflicte que a actividade gripal na comunidade mantén o seu nivel basal con tendencia crecente, constatando un incremento na dispensación de antigripais nas farmacias galegas. En concreto, a taxa de dispensación de antigripais nas farmacias aumentou un 38,9 % na última semana, mentres que a de probas de antíxenos se reduciu nun 17,9 %, tal e como informan as oficinas de farmacia integradas na rede sentinela impulsada pola Xunta, co obxectivo de anticipar a evolución dos virus respiratorios na comunidade.
