sábado, 13 de junio de 2026
Nota de prensa remitida por el Gabinete de Comunicación de la Consellería de Cultura e Turismo de la Xunta de Galicia:
O director xeral de Promoción e Difusión da Cultura, Francisco López presentou unha nova edición da colección Lagarto Pintado para conmemorar o recente Día Internacional do Libro Infantil e Xuvenil, celebrando o Día das Letras Galegas e no contexto do Ano do Libro e da Lectura. Francisco López describiu estes dous novos exemplares, Verdades de plastilina e Manual para condutores con faros antinéboa, como pequenos libros, sinxelos e fermosos, como pequenos agasallos pintados e escritos por artistas e escritores de Galicia. Ao acto tamén asistiu o director de Gálix e coordinador da edición Lagarto Pintado, Manuel Figueiras.
A Consellería de Cultura e Turismo, a través da Asociación Galega do Libro Infantil e Xuvenil (Gálix), editou 7.000 exemplares destas novas achegas coas que recupera a colección Lagarto Pintado destinada aos segmentos de literatura infantil e xuvenil. Nembargante, o director xeral lembrou que son libros para todos, porque todos somos un pouco nenos e todos gardamos no noso interior un pouco da inxenuidade que nos provoca as intensas emocións da lectura. Francisco López definiu aos libros presentados como dous pequenos volumes enchidos de arte e de vida, dúas pequenas obras feitas con talento, con imaxinación e con arte para todos aqueles que se acheguen a súa lectura, engadiu.
Segundo Francisco López, a Dirección Xeral de Promoción e Difusión da Cultura agarda que os 7.000 volumes publicados cheguen a todos os puntos de Galicia, ás bibliotecas das nosas cidades e dos nosos rueiros xa que serán repartidos e difundidos para que poidan verse nas librerías, nos postos das feiras do libro, nos colexios e nos anaqueis das casas.
Para Manuel Figueiras, director de Gálix e coordinador da edición de Lagarto Pintado, a actividade resulta moi interesante porque por un lado foméntase a lectura xa que os libros van destinados aos rapaces e aos pais, e por outro lado, supón un recoñecemento aos escritores galegos e a literatura galega. Manuel Figueiras destacou que os textos son orixinais e forman un conxunto de relatos e debuxos de gran calidade. Estas publicacións son unha homenaxe a cada un dos escritores e ilustradores por o seu traballo realizado o ano anterior, engadiu.
Literatura infantil e xuvenil
Esta nova edición da colección Lagarto Pintado vén a apoiar ás iniciativas da exposición de 50 anos de literatura infantil e xuvenil que está a percorrer bibliotecas de Galicia e que se inaugurou no Día da Literatura Infantil e Xuvenil. Asemade, no Ano do Libro e da Lectura, destacan iniciativas a prol da literatura infantil e xuvenil como as publicacións presentadas no Día das Letras Galegas como A banda deseñada, Novoneyra: a voz herdada, de David Rubín e Kike Benlloch; a difusión do volume A grande aventura do libro, a celebración en Compostela do congreso do IBBY, o meirande acontecemento mundial neste campo, e a Feira de Boloña.
A través da publicación destes dous libros, Verdades de plastilina, literatura infantil para rapaces de ata 10 anos e Manual para conductores con faros antiniebla, literatura xuvenil para rapaces de máis 11 anos, preténdese chegar ás bibliotecas das cidades e dos concellos de Galicia renovando unha colección de ampla acollida en edicións precedentes tratando de dinamizar e enriquecer esta colección.
As historias contadas nos exemplares chegan este ano da man de Yolanda Castaño, Jacobo Fernández Serrano, Charo Pita e Xavier Queipo, autores de Verdades de plastilina, ilustrado por David Pintor e de Francisco Castro, Eva Moreda, Carlos Negro e Carlos Vila Sexto, autores de Manual para condutores con faros antinéboa, ilustrado por Manel Cráneo.
Foron presentados os novos equipamentos do Centro de Supercomputación de Galicia) instalación que vai incorporar un segundo computador cuántico, denominado IQM Spark. O novo supercomputador e os dous novos computadores cuánticos que se van adquirir situarán a nosa Comunidade na vangarda europea en canto a capacidade de almacenamento de datos e participación en grandes proxectos internacionais. En canto aos computadores cuánticos, o de menor capacidade (5 cúbits), dedicarase exclusivamente a tarefas de formación, probas de concepto e de algoritmia, complementando así ao de maior capacidade (54 cúbits), que será o buque insignia.
A Xunta exixe o rescate da AP-9 e asina cos Gobernos de Asturias e Castela e León e o tecido empresarial das tres comunidades a Declaración Compostela, que insta á Comisión Europea a culminar o ditame sobre as prórrogas da AP-9 e AP-66. A conselleira de Vivenda e Planificación de Infraestruturas, María Martínez Allegue, interveu no encontro 'As infraestruturas viarias do Noroeste', organizado pola Confederación de Empresarios de Galicia.
