miércoles, 30 de septiembre de 2026
O director de Turismo de Galicia, Xosé Merelles, participou hoxe no acto de entrega dos Premios Fitur 2026, no que o stand de Galicia foi recoñecido con dous galardóns: o Premio ao Mellor Stand, na categoría de comunidades autónomas, e o Premio ao Mellor Stand Sostible.
Galicia convértese así na primeira comunidade autónoma en acadar ambos recoñecementos nunha mesma edición, poñendo en valor a aposta de Turismo de Galicia pola innovación, a sustentabilidade e a promoción do destino. O stand de Galicia, que ocupou unha superficie de 1.138,5 metros cadrados, un 14% máis que na edición anterior, presentouse baixo a marca Galicia Calidade, como símbolo da excelencia que caracteriza o destino galego, e incorporou tamén a promoción do Xacobeo 2027 como gran acontecemento internacional.
O deseño do espazo apostou por unha proposta envolvente e inmersiva, destinada a favorecer a interacción dos visitantes cos principais valores turísticos de Galicia, como a autenticidade, a sustentabilidade, a natureza, a enogastronomía ou a cultura.
O xurado do Premio ao Mellor Stand valorou a adecuación do espazo á estratexia comercial, así como a súa orixinalidade e innovación. O Premio ao Mellor Stand Sostible recoñeceu, pola súa banda, o compromiso de Turismo de Galicia coa innovación e a defensa do medio ambiente, destacando o emprego de materiais reciclados.
A sustentabilidade estivo tamén presente nas actividades desenvolvidas no espazo, coa promoción de produtos enogastronómicos de proximidade amparados por selos de garantía, denominacións de orixe e indicacións xeográficas protexidas, contribuíndo á visibilidade das pequenas e medianas empresas galegas.
Ademais, o stand incorporou medidas para favorecer a accesibilidade e informadores con coñecementos da lingua galega, xunto coa posta en valor da música, a danza e outras manifestacións da cultura de Galicia.
Unha promoción turística centrada na calidade
A participación de Galicia en Fitur 2026 forma parte do Plan de Promoción de Turismo de Galicia 2026. O plan contempla máis de 150 accións promocionais en arredor de 20 mercados e a participación en máis de 30 feiras estratéxicas, nacionais e internacionais, do sector.
Os dous galardóns recibidos en Fitur 2026 poñen en valor a aposta da Xunta por unha promoción turística baseada na calidade, a innovación, a sustentabilidade e a posta en valor dos recursos propios, nun ano marcado pola preparación do Xacobeo 2027.
A sexta edición de 6coreógrafas acollerá dúas estreas: Trés bien, de Marta Alonso Tejada, un dúo de danza contemporánea de rúa interpretado por María de Vicente e Inés Santos que explora o esforzo de sosterse e permanecer xuntas, e BenQuererme, un solo de de Fran Sieira, que combina danza tradicional e contemporánea para reflexionar sobre o autocoidado emocional e o amor propio. A programación completarase con Suit(e), de Furia Sotelo, un diálogo entre a danza de Nuria Sotelo e o violonchelo de Millán Abeledo, e Bipedestrucción, da compañía navarro-galega Disiden.cia, unha peza de rúa para todos os públicos que aborda desde o humor a identidade, a diversidade e a importancia da comunidade.
O presidente da Xunta, Alfonso Rueda, informou de que o Goberno autonómico vén de autorizar na reunión desta mañá o envío ao Consello Consultivo de Galicia do decreto polo que se crea o Rexistro de autorizacións e concesións no dominio público marítimo-terrestre (DPMT). 'Isto vai situar Galicia á vangarda en transparencia e xestión do litoral', indicou. 'Imos habilitar un sistema para que a cidadanía poida coñecer en todo momento os usos e autorizacións vixentes na costa galega', salientou o presidente sobre un Rexistro, concibido para incorporar progresivamente as autorizacións e concesións no DPMT e que permitirá sistematizar e ampliar a información dispoñible sobre as actividades autorizadas, o que resulta fundamental para avanzar na planificación, protección e xestión integrada da costa galega así como reforzar a seguridade xurídica das actividades e proxectos.
