sábado, 10 de octubre de 2026
O balance, elaborado pola Axencia para a Modernización Tecnolóxica de Galicia (Amtega), destaca que os principais avances en 2025 están vinculados ao ámbito dos sistemas de información xeoespacial e á Plataforma Territorio Intelixente. En concreto, desenvolvéronse 15 novos proxectos con funcionalidades xeográficas integradas e publicáronse novos servizos de información xeográfica. Estes servizos permiten almacenar, xestionar a analizar a información para avaliar riscos naturais, planificar rutas e xestionar emerxencias, infraestruturas e transporte, entre outras utilidades.
O informe destaca tamén o avance no despregamento da plataforma de soporte de xemelgos dixitais. Puxéronse en marcha catro proxectos piloto no marco da iniciativa estatal das Redes de Especialización Tecnolóxica (Retech). Así mesmo, habilitouse un xeocatálogo para facilitar a difusión interna e a gobernanza dos conxuntos de datos e servizos de información xeográfica. En 2025 procesáronse con este criterio 15 recursos xeoespaciais.
Púxose en marcha tamén o Espazo de Innovación Rural Aplicada EIRA, no que colaboran a Amtega e a Axencia Galega de Desenvolvemento Rural. O seu obxectivo é aplicar tecnoloxías intelixentes baseadas no territorio en ámbitos rurais para impulsar a recuperación de terras agrarias.
Foi presentada a novena edición de Intersección, Festival Internacional de Cine da Coruña, celebrada nos Cantones Cines. O festival desenvolverase do 13 ao 17 de outubro cunha programación que combina proxeccións, exposicións, formación e encontros profesionais arredor das novas linguaxes cinematográficas. Así, as seccións competitivas Galicia, Internacional e Fulgor achegarán ao público obras afastadas dos circuítos comerciais habituais e novas voces da creación audiovisual contemporánea. En concreto, a sección Internacional reúne 27 filmes procedentes de 22 países, entre os que figuran catro estreas mundiais, 17 en España e cinco en Galicia. As propostas exploran cuestións como a tecnoloxía, a memoria, o territorio e a identidade desde linguaxes e xeografías diversas.
A Real Academia Galega de Ciencias (RAGC) celebrou en Santiago, no Salón Nobre do Colexio de Fonseca, o acto do Día da Ciencia en Galicia, no que se homenaxeou á oceanógrafa Aida Fernández Ríos (Vigo, 1947 - Moaña, 2015) como Científica Galega 2026. Ademais, entregáronse as Medallas de Investigación a cinco científicas e científicos da nosa comunidade. O presidente da Academia destacou que 'Aida Fernández Ríos foi unha investigadora capaz de identificar problemas relevantes e de situalos nun contexto internacional, converténdose nunha científica respectada moito máis alá de Galicia.
