lunes, 13 de julio de 2026
Detección temperá: O debut de ALume e a vixilancia intelixente
A gran novidade no eido tecnolóxico é o lanzamento de ALume, unha nova aplicación móbil xa dispoñible para sistemas Android e iOS. Esta ferramenta, deseñada cunha interface moi intuitiva, actúa como canle complementaria ao teléfono tradicional 085 e permite que calquera cidadán envíe de xeito inmediato a localización exacta dun foco de lume, achegando ademais imaxes, gravacións de son e observacións en tempo real.
O despregue tecnolóxico compleméntase coas seguintes innovacións estruturais:
- Intelixencia Artificial aplicada: O sistema interno de xestión, o Xeocode, incorpora IA para procesar as imaxes da rede de cámaras, permitindo xerar alertas automáticas e inmediatas ao detectar columnas de fume ou focos iniciais, sen requirir unha intervención humana previa nin aviso telefónico.
- Ampliación da videovixilancia: A rede de cámaras medra un 30 %, alcanzando as 241 cámaras distribuídas en 111 localizacións estratéxicas do territorio galego.
- Drons de última xeración: Incorpóranse tres unidades aéreas tripuladas de forma remota para supervisar e actuar de forma específica en zonas de difícil acceso ou orografía complexa.
Reforzo operativo: Máis brigadas e especialización en grandes incendios
O dispositivo humano e material, que volverá contar con máis de 7.000 profesionais coordinados, contabilizando tanto os da Xunta como os adscritos a outras administracións, experimenta cambios significativos na súa estrutura para adaptarse ás novas tipoloxías de lumes de gran intensidade:
- Unidade de Directores de Extinción (UDEX): A unidade especializada en grandes incendios forestais refórzase, pasando de 6 a 15 membros.
- Brigadas de Reforzo: Incorpóranse 42 novas brigadas (de catro compoñentes cada unha) destinadas especificamente á tempada de alto risco.
- Medios Aéreos: Súmanse catro novas aeronaves (dous avións de carga en terra, un avión de coordinación e un helicóptero pesado), ascendendo a 24 os medios dependentes directamente da administración autonómica.
- Maquinaria Pesada en Terra: Incorpóranse 16 novos bulldózeres para labores preventivos. En terra con preto de 380 motobombas e vehículos pesados.
Así mesmo, estase a avanzar no eido das infraestruturas de apoio coa execución e mellora de instalacións clave, entre as que destacan a nova base de helicópteros de Lalín e o próximo aeródromo de Valga.
Estratexia preventiva e revisión de zonas de alta actividade
No eido das actuacións preventivas, está previsto actuar directamente sobre unha superficie total de 33.880,41 hectáreas mediante a creación e mantemento de áreas cortalumes, faixas auxiliares, mellora de pistas forestais; a realización de queimas prescritas; os convenios coas entidades locais e as accións enmarcadas dentro das subvencións para a prevención dos danos causados aos bosques por incendios. A dotación do convenio para a xestión da biomasa en faixas secundarias duplícase ata acadar os 25 millóns de euros anuais, reforzando así o apoio que se lle presta a propietarios e administracións locais para cumprrnir coas súas obrigas de xestión da biomasa.
Ademais, actualizouse o mapa de Parroquias de Alta Actividade Incendiaria (PAAI). Nesta revisión entran 11 novas parroquias e saen dúas (Santigoso, no concello da Mezquita, e Pardo de Limia, en Muíños), situando o cómputo total para esta campaña en 35 parroquias cualificadas baixo este criterio de especial vixilancia (fronte ás 26 do ano anterior).
No eido da formación, o obxectivo é seguir a liña dos últimos anos e afondar na mellora da profesionalización e seguridade do persoal para conformar un dispositivo máis eficiente e capacitado para afrontar as novas tipoloxías de incendios forestais. Neste ano están previstos cursos monográficos, accións de adestramento do persoal e iniciativas formativas para medios das entidades locais e tamén dirixidas á poboación. Todo isto conta cun orzamento conxunto de preto dun millón de euros.
O Pladiga contempla ademais o impulso dun proxecto piloto orientado a reforzar a colaboración da poboación local de cara á vixilanciados incendios forestais das comunidades de montes veciñais en man común. Esta iniciativa está xa en marcha coa colaboración da Mancomunidade de Montes do Baixo Miño a través da rede "Ollos no Monte", coa que se organizan equipos de vixilancia preventiva e detección temperá nos montes da súa contorna durante a temporada de verán. Este programa ten repercusións moi beneficiosas e estase traballando para replicar noutras zonas do territorio.
As oito curtametraxes finalistas na última edición dos Premios Mestre Mateo volven percorrer Galicia como parte do Ciclo de Mestre Mateo Galicia Calidade en virtude da colaboración entre a Xunta de Galicia e a Academia Galega do Audiovisual para contribuír á difusión da produción galega neste formato. Deste xeito, as oito pezas de ficción e animación que chegaron á última fase dos galardóns visitarán este ano 26 concellos galegos combinadas en dúas sesións de catro curtas segundo se trate de obras en imaxe real ou de animación. A iniciativa, que pasou xa polos municipios de Cea e Vilalba, continuará este mes coas vindeiras proxeccións en Meira (15 de xullo) e Ribadavia (28 de xullo) como parte da campaña de verán da 'Para gustos, cultura'.
O presidente da Xunta, Alfonso Rueda, avanzou que Galicia será a Capital iberoamericana da gastronomía saudable entre este ano e 2027, o que servirá para potenciar a cociña galega como un dos piares da actividade turística, da proxección exterior e da identidade propia da comunidade autónoma. O titular do executivo autonómico asinou un convenio de colaboración neste sentido co presidente da Academia Iberoamericana de Gastronomía, Rafael Ansón. Durante o tempo que dure a capitalidade, organizaranse diversos tipos de actividades como campañas de difusión, elaboraranse materiais como recetarios ou revistas, así como tamén se celebrarán concursos e congresos.
