Noticias

A 42ª MIT de Ribadavia ofrecerá 25 espectáculos de Galicia, Portugal, Francia, México e outras comunidades

A nova edición foi presentada hoxe nunha rolda de prensa na que participou o director da Axencia Galega das Industrias Culturais, Jacobo Sutil, xunto con representantes do Concello de Ribadavia e do equipo do festival. Durante o acto tamén se desvelou a imaxe gráfica deste ano, obra da ilustradora ourensá Olalla Higo, que recolle no cartel o espírito festivo e de celebración da Mostra.

O Goberno galego colabora un ano máis coa MIT a través dun convenio co Concello de Ribadavia por valor de 60.000€ para contribuír á organización dun dos encontros escénicos de referencia en Galicia, con máis de catro décadas de traxectoria e unha implicación que vai máis alá da mera exhibición. A programación deste ano reúne 11 propostas galegas, cinco internacionais e nove estatais, nunha carteleira que reforza o diálogo entre a creación do país e as principais liñas da escena contemporánea.

Presenza do Centro Dramático Galego

Na súa intervención como representante da Consellería de Cultura, Lingua e Xuventude, Jacobo Sutil salientou o peso da creación galega nunha programación que incorpora 11 espectáculos producidos en Galicia e na que o Centro Dramático Galego participa como coprodutor en catro deles: Berenguela na gaiola; A Fortaleza; Roland mon amour e José Afonso, ao vivo nos Coliseus, 1983. Deste xeito, a unidade teatral da Xunta reforza a súa presenza nunha carteleira que favorece o diálogo entre a escena galega, estatal e internacional.

Entre estas propostas figura A Fortaleza, da compañía A Feroz, coproducida polo Centro Dramático Galego e o festival FITEI do Porto. A obra, dirixida pola portuguesa Raquel Sousa e con dramaturxia de Lorena Conde e da propia Sousa, recupera a memoria das guerrilleiras antifranquistas galegas a través da figura de Consuelo Rodríguez López, Chelo. Tamén chegará á MIT Roland mon amour, de Cris Balboa, unha coprodución do Centro Dramático Nacional e do Centro Dramático Galego construída desde a música electrónica, o corpo e a palabra.

O programa incorpora, así mesmo, José Afonso, ao vivo nos Coliseus, 1983, do Teatro Experimental do Porto, peza escénico-musical arredor da figura de Zeca Afonso e da memoria democrática portuguesa. Xunto a ela, a presenza da compañía de teatro institucional da Xunta de Galicia completarase con Berenguela na gaiola, coproducida con Galeatro e Xarope Tulú, nunha edición na que a Mostra volve funcionar como escaparate da diversidade, a ambición e a capacidade de colaboración da escena galega contemporánea.

Memoria, música e encontro

A Mostra de Ribadavia dará comezo xusto dentro dun mes, o 17 de xullo, coa compañía galega Chévere e ICTUS (anatomía de ‘A derradeira leición’ de Castelao), a súa última creación en coprodución co Centro Dramático Nacional arredor da memoria histórica, a democracia e os efectos da desmemoria. Esta liña conecta tamén con A Fortaleza e con José Afonso, ao vivo nos Coliseus 1983. Os tres traballos que revisitan as ditaduras ibéricas, os movementos de resistencia antifascista e os procesos colectivos que fixeron posible a chegada da democracia en España e Portugal.

A produción galega terá un peso destacado ao longo de toda a Mostra con propostas como O Miradoiro, lectura performativa de Alomais Teatro a partir do texto gañador do Premio Abrente 2025; Circanelo, de Fredi Muíño; MONTE, de Laboratorio Escénico; Ribadavia 26, de La Volátil, como resultado dun proceso comunitario desenvolvido arredor da memoria da vila; ou Bio Construción, de Ibuprofeno Teatro, compañía que acadou o Premio do Público da MIT Ribadavia 2025. Estas e outras propostas sitúan a creación do país no diálogo coa escena estatal e internacional.

A presenza da música e do son como elementos mobilizadores será outra das grandes apostas desta edición. Neste ámbito sitúanse os devanditos espectáculos arredor de José Afonso e Roland mon amour; Mercedes máis eu, da Premio Nacional de Danza Janet Novás xunto á creadora musical Mercedes Peón, que escollerá Ribadavia para a súa despedida dos escenarios; e Atlas de anatomía, da bailarina canaria Paula Quintana, un solo acompañado por un coro de voces en directo.

Tamén artes do movemento

A carteleira incorpora tamén propostas de danza, teatro físico, artes vivas, performance, circo e creación comunitaria procedentes de diferentes comunidades autónomas e doutros países. Entre elas figuran El bolero, de Altraste Danza; Colapso, de Miguel Oyarzun e Juan Ayala; El discurso, de Rosa Romero; El peor espectáculo del mundo. De momento!, de Zanguango Teatro; Acción pálpito, de Diàleg Obert; ou 361º, de Proyecto Tránsito. No plano internacional, o programa inclúe pezas de Portugal e México como Zoombies, de Pedro Vilela; Mi madre y el dinero, de Anacarsis Ramos e a compañía Pornotráfico; e El cuerpo vacío, de Shantí Vera / Cuatro x Cuatro.

A MIT 2026 reivindica, así mesmo, a escena como lugar de encontro coa alteridade e co descoñecido a través de propostas como Estudio para una extracción, de Poliana Lima, ou Hospital de campo, de Societat Doctor Alonso, acompañada do taller El desenterrador. En colaboración coa Bienal de Artes Vivas de Pontevedra, Ribadavia acollerá por primeira vez unha peza do coreógrafo francés Jérôme Bel interpretada pola actriz e performer galega María Roja, primeira tradución ao galego deste traballo. Tamén se inclúe Enchivas, da creadora galega afincada en Suíza Begoña Cuquejo xunto á performer e matemática mexicana Erika Roldán, unha conferencia performativa que cruza fútbol, matemáticas e artes vivas desde unha perspectiva participativa.