jueves, 28 de mayo de 2026
A Xunta valora o cambio de tendencia demográfica que está a consolidar Galicia. A comunidade gaña poboación con forza e de xeito constante en todas as provincias ata acadar os 2,73 millóns de habitantes, a cifra máis elevada dos últimos once anos. Así o indicou esta mañá o director xeral de Familia, Infancia e Dinamización Demográfica, Jacobo Rey, que compareceu na Comisión 5ª de Sanidade, Política Social e Emprego do Parlamento de Galicia.
Jacobo Rey debullou os datos recentemente publicados polo Instituto Nacional de Estatística (INE), que rexistran un crecemento de poboación de preto de 14.000 persoas nos últimos doce meses, de máis de 24.500 persoas nos dous últimos anos e de 31.600 persoas en comparación con 2023.
As cifras confirman que Galicia pasou dun descenso de residentes na década pasada a un incremento nesta e supón, ademais, unha mellora moi importante respecto ás proxeccións de poboación que fixeran no pasado tanto o INE como o Instituto Galego de Estatística (IGE). Estas prognosticaban hai dez anos que a comunidade tería na actualidade algo máis de 2,57 millóns de habitantes, mentres que a realidade é que supera os 2,73 millóns.
Saldo migratorio e esperanza de vida
Detrás deste incremento de poboación, destacou o director xeral, están o saldo migratorio positivo, neste momento en cotas históricas, e a esperanza de vida, que supera por primeira vez a barreira dos 84 anos.
Galicia atrae poboación tanto do estranxeiro como doutras comunidades autónomas, incluídas algunhas ás que no pasado emigraba a sociedade galega, como Madrid, Cataluña ou País Vasco.
En canto á esperanza de vida, no que vai de século creceu en case cinco anos. Un incremento, resaltou Jacobo Rey na súa intervención, motivado polos avances nos eidos sanitario e dos servizos sociais. Nestes, rematou, destacan algunhas das medidas postas en marcha pola Xunta de Galicia para as familias galegas, como a gratuidade das escolas infantís de 0 a 3 anos, a Tarxeta Benvida, o apoio fiscal ás familias con máis de dous fillos e a especial protección ás familias numerosas, ás monoparentais ou ás acolledoras.
Foi presentada a programación do Festival Outono Lírico 2026, unha iniciativa impulsada pola Asociación Amigos da Ópera de Vigo que permitirá gozar na cidade olívica da ópera Don Giovanni, de Mozart, e da actuación de grandes voces internacionais actuais. Entre as citas destacadas que programará este festival, cabe salientar a representación, o día 1 de novembro, de Don Giovanni, unha das obras máis influíntes e complexas da historia da ópera, que se ofrecerá na versión orixinal estreada en Praga, e coa participación da orquestra e coro GAOS. Tamén destaca o recital do 12 de setembro do tenor Jorge de León e o barítono Juan Jesús Rodríguez.
Co recoñecemento de Amescruz, Sociedade Cooperativa Galega como nova Organización de Produtores Pesqueiros, coa denominación de OPP-99, Galicia lidera o número de OPP de ámbito autonómico no conxunto do Estado, unha proba máis de que a nosa comunidade mantén o seu papel de referente no ámbito pesqueiro e acuícola. Das 32 entidades existentes en España, dez sitúanse en Galicia, é dicir, case o 33 %. As Organizacións de Produtores Pesqueiros son entidades recoñecidas oficialmente no marco da Política Pesqueira Común da UE. A súa finalidade é contribuír á xestión sostible dos recursos mariños, favorecer unha mellor planificación da produción e reforzar a comercialización dos produtos da pesca e da acuicultura.
