martes, 4 de agosto de 2026
O presidente da Xunta, Alfonso Rueda, informou hoxe de que o Consello acordou iniciar a tramitación da primeira Lei de saúde pública de Galicia co obxectivo de 'mellorar a resposta ante os riscos sanitarios xa existentes e os emerxentes, establecer protocolos de actuación e reducir a incidencia de enfermidades'.
O Executivo galego, na súa reunión de hoxe, deulle luz verde ao inicio da consulta pública previa á redacción deste anteproxecto de lei que establecerá un marco xurídico moderno, integral e adaptado ás necesidades actuais da saúde pública de Galicia. A través do proceso de consulta pública recolleranse as achegas da cidadanía e dos axentes implicados á redacción da norma.
'Queremos modernizar o marco xurídico en materia de saúde pública para responder aos desafíos actuais', indicou o conselleiro de Sanidade, Antonio Gómez Caamaño, quen falou dos novos riscos 'sanitarios e ambientais' e os novos retos derivados do impacto do cambio climático, a globalización, a dixitalización, a transición demográfica e a crecente importancia da promoción e prevención.
Galicia presenta, ademais, retos específicos como o envellecemento da poboación ou a dispersión xeográfica, o que require unha abordaxe integral e sostida desde o punto de vista da saúde pública.
Así mesmo, a experiencia recente da pandemia incrementou a conciencia social e institucional sobre a necesidade de reforzar a saúde pública como piar estratéxico do benestar colectivo.
Rueda lembrou que as cuestións sobre saúde pública están recollidas noutra normativa máis ampla que ten case 20 anos- Lei 8/2008, de saúde de Galicia- e asegurou que situacións coma a vivida na pandemia da covid 'fan necesario e imprescindible' desenvolver unha normativa 'específica' en materia de saúde pública. O conselleiro indicou que a Xunta traballa co obxectivo de 'aprobar e remitir ao Parlamento' a nova lei 'a principios do vindeiro ano'
Tal e como explicou Gómez Caamaño, a futura lei incorporará o enfoque de "saúde en todas as políticas", asegurando que as actuacións públicas de calquera sector teñan en conta o seu impacto na saúde da poboación, e adoptará o enfoque 'unha soa saúde", integrando a saúde humana, animal e ambiental.
A lei reforzará as capacidades de vixilancia epidemiolóxica, alerta temperá e resposta ante riscos e emerxencias sanitarias, dotando o sistema de estruturas áxiles con autonomía técnica e operativa.
Regulación específica
Con esta lei regularase de forma específica a promoción de estilos de vida saudables incluída a alimentación, a actividade física, o benestar emocional e a prevención de condutas aditivas; a protección da saúde fronte a riscos ambientais e alimentarios, a inspección de saúde pública e o control oficial, a detección precoz de enfermidades e a creación de contornas saudables en centros educativos, laborais e comunitarios, incorporando o potencial das novas tecnoloxías e da análise avanzada de datos.
A norma modernizará a gobernanza da saúde pública en Galicia mediante a participación cidadá e comunitaria, a investigación e a innovación e a avaliación continua das políticas e programas.
Garantirase, ademais, a equidade territorial e a coordinación cos concellos, co Sistema Nacional de Saúde e cos organismos nacionais competentes.
Impulso ás políticas activas de promoción da saúde
A través da nova lei posibilitarase previr enfermidades antes de que aparezan mediante o impulso de políticas activas de promoción da saúde, o que se traducirá nunha poboación máis sa e nunha menor carga de enfermidade crónica.
En segundo lugar, a cidadanía contará cunha maior protección fronte aos riscos sanitarios, o que incrementará a seguridade e a confianza no sistema público.
Ademais, fomentarase unha maior participación da cidadanía e das comunidades locais, permitindo que as persoas teñan un papel máis activo na definición das políticas públicas que afectan a súa saúde.
En conxunto, a lei contribuirá a un modelo de sociedade máis saudable e equitativa, mellorando tanto a saúde individual como colectiva dos galegos e das galegas.
O marco normativo vixente en Galicia en materia de saúde pública está fundamentalmente recollido na Lei 8/2008, de saúde de Galicia, que constitúe unha norma de carácter xeral orientada á ordenación do sistema sanitario no seu conxunto.
Aínda que esta lei incorporou previsións relevantes en materia de saúde pública, non desenvolve de xeito específico e sistemático este ámbito e non responde plenamente, polo tanto, aos retos actuais.
En consecuencia, a nova norma permitirá ampliar e sistematizar o catálogo de actuacións e prestacións de saúde pública, definindo con maior detalle funcións, competencias e instrumentos e mellorando a eficiencia no uso dos recursos públicos.
Co obxectivo de cumprir estes obxectivos, a Xunta de Galicia abre o trámite de consulta pública no Portal de transparencia e goberno aberto, onde a sociedade galega poderá facer achegas á nova lei.
A directora xeral de Formación e Cualificación para o Emprego, Zeltia Lado, valorou os últimos datos de paro rexistrado e afiliacións á Seguridade Social, destacando que Galicia alcanza por segundo mes consecutivo o máximo histórico de afiliacións, con 1.135.950 cotizantes. Ao mesmo tempo, a Comunidade rexistra o menor número de persoas desempregadas nun mes de xullo de toda a serie, con 107.322 persoas paradas. No referido ás afiliacións, estas medran tanto na comparativa anual como na mensual. Galicia conta con preto de 22.500 afiliacións máis que hai un ano (+2,02 %) e con case 13.000 cotizantes máis que en xuño (+1,15 %), sendo a 3ª comunidade autónoma na que máis aumentan as afiliacións.
A Estratexia Galicia Dixital 2030 (EGD2030) continuou avanzando durante 2025 coa posta en marcha de novas actuacións para acelerar a transformación dixital da Comunidade. O balance anual, elaborado pola Axencia para a Modernización Tecnolóxica de Galicia (Amtega), recolle avances en todos os eixes estratéxicos da Estratexia e unha actualización das súas metas para o final da década. O investimento mobilizado ao longo do pasado exercicio foi de 390,3 millóns de euros, entre capital público e privado.
