martes, 28 de abril de 2026
O conselleiro de Educación, Ciencia, Universidades e FP, Román Rodríguez, destacou hoxe en Vigo na presentación das xornadas Galicia Biodays que a Xunta busca posicionar Galicia como un territorio de referencia en innovación biotecnolóxica no ámbito internacional. Neste camiño, é fundamental a aposta por foros coma este, que mostra todo o potencial da Comunidade neste sector e que xa é unha cita obrigada para a industria biotecnolóxica europea", resaltou.
Román Rodríguez, acompañado da directora da Axencia Galega de Innovación, Carmen Cotelo, sinalou que este evento que se celebrará os días 6 e 7 de maio no Auditorio Mar de Vigo permitirá reforzar a marca Galicia Calidade en biotecnoloxía, fomentar o intercambio de coñecemento e establecer novas colaboracións científicas, empresariais e institucionais. De feito, está previsto que asistan máis de 1000 persoas e 9 biorrexións convidadas, con máis de 800 reunións e máis de 130 relatores.
Para o titular de Ciencia, Galicia Biodays converteuse nun evento clave para o sector en Europa, un claro exemplo da fortaleza de Vigo e a súa área no campo da biotecnoloxía.
Actualmente, Xunta e sector traballan na definición da nova Estratexia de excelencia da biotecnoloxía de Galicia 26-30, que está previsto presentar proximamente. Segundo apuntou o titular de Ciencia, Galicia é unha potencia no mundo bio, que non sería posible sen o traballo de todo un sector e un ecosistema que medrou nos últimos anos.
Neste senso, a biotecnoloxía está identificada como un ámbito clave no actual Plan galego de I+D+i 25-27, polo seu potencial para contribuír ao desenvolvemento doutros sectores estratéxicos e lograr un impacto económico relevante no territorio. Por iso, a Xunta de Galicia, en colaboración co clúster Bioga, leva executando estratexias de apoio ao sector en Galicia desde 2016.
O obxectivo desta folla de ruta, que está sendo elaborada a través dun proceso participativo, é acadar a excelencia en Galicia do sector biotecnolóxico nos vindeiros anos e posicionarse como unha biorrexión de referencia a nivel internacional.
Participación no evento
A Xunta de Galicia participará en Galicia Biodays coa ponencia Liderando a biotecnoloxía dende Galicia, na que a directora da Axencia Galega de Innovación presentará as capacidades do ecosistema galego e fará balance da estratexia de consolidación do sector, rematada en 2025. Pola súa banda, o Cesga (Centro de Supercomputación de Galicia) presentará as súas iniciativas no ámbito do OneHealth. En concreto, o demostrador multisectorial de espazo de datos e a factoría europea de IA. Ademais, contará cun stand propio no espazo do foro e unha delegación de Estados Unidos, Brasil e Portugal visitarán o centro para coñecer os seus proxectos e infraestruturas.
Foron presentadas as xornadas Galicia Biodays, que buscan posicionar Galicia como un territorio de referencia en innovación biotecnolóxica no ámbito internacional. Este evento vaise celebrar os días 6 e 7 de maio no Auditorio Mar de Vigo, e permitirá reforzar a marca Galicia Calidade en biotecnoloxía, fomentar o intercambio de coñecemento e establecer novas colaboracións científicas, empresariais e institucionais. Está previsto que asistan máis de 1000 persoas de 9 biorrexións convidadas, con máis de 130 relatores.
Alfonso Rueda informou de que o Consello deu conta do inicio da tramitación do anteproxecto da que será 'a primeira Lei do terceiro sector da acción social de Galicia'. Unha norma que busca 'unificar nun único texto legal a regulación deste eido e recoñecer de xeito formal o seu traballo e o papel que xogan as entidades na sociedade galega'. A necesidade de aprobar esta lei xustifícase na importante presenza destas entidades en Galicia, preto de 1.500, -que constitúen 'unha auténtica rede de solidariedade', segundo resaltou a conselleira de Política Social e Igualdade, Fabiola García-, para apoiar as persoas e fogares máis vulnerables.
