lunes, 12 de octubre de 2026
O director xeral de Cultura, Anxo M. Lorenzo, destacou hoxe a 'excelencia artística e a relevancia no panorama europeo' da novena edición do Festival Clasclás que, baixo lema de Paixón, se vai celebrar, do 20 ao 27 de xuño, no municipio pontevedrés de Vilagarcía de Arousa. Así o puxo en valor na presentación da súa 'ambiciosa programación', da que salientou a súa 'aposta pola vangarda e a ciencia'.
O representante da Consellería de Cultura, Lingua e Xuventude erixiu este certame como unha das 'grandes citas internacionais da música clásica' e gabou a calidade da súa programación, 'que abrangue desde a excelencia da Orquestra Sinfónica de Galicia e da música de cámara ata o virtuosismo de solistas chegados de diferentes partes do mundo'.
En concreto, Anxo M. Lorenzo salientou que inclúe a celebración dun 'histórico concerto inmersivo' para conmemorar a eclipse solar, que terá lugar no mes de agosto, como culminación das actividades que se levarán a cabo durante unha semana por numerosos espazos, prazas e rúas de Vilagarcía de Arousa. Precisamente, enxalzou capacidade do festival de 'transformar a cidade nun auditorio expandido, onde formacións, orquestras e solistas dialogarán coa veciñanza'.
Neste senso, o director xeral de Cultura inxeriu este certame como un 'claro exemplo das programacións en liña co espírito da Lei de cultura inclusiva e accesible de Galicia, xa que expande e democratiza o acceso á cultura, á vez que procura atraer novos públicos con formatos innovadores'. De igual xeito, celebrou o seu papel como 'motor de desestacionalización, proxectando unha imaxe de prestixio internacional tan acorde coa de Galicia Calidade, que nos representa tamén no eido artístico', concluíu.
Foi presentada a novena edición de Intersección, Festival Internacional de Cine da Coruña, celebrada nos Cantones Cines. O festival desenvolverase do 13 ao 17 de outubro cunha programación que combina proxeccións, exposicións, formación e encontros profesionais arredor das novas linguaxes cinematográficas. Así, as seccións competitivas Galicia, Internacional e Fulgor achegarán ao público obras afastadas dos circuítos comerciais habituais e novas voces da creación audiovisual contemporánea. En concreto, a sección Internacional reúne 27 filmes procedentes de 22 países, entre os que figuran catro estreas mundiais, 17 en España e cinco en Galicia. As propostas exploran cuestións como a tecnoloxía, a memoria, o territorio e a identidade desde linguaxes e xeografías diversas.
A Real Academia Galega de Ciencias (RAGC) celebrou en Santiago, no Salón Nobre do Colexio de Fonseca, o acto do Día da Ciencia en Galicia, no que se homenaxeou á oceanógrafa Aida Fernández Ríos (Vigo, 1947 - Moaña, 2015) como Científica Galega 2026. Ademais, entregáronse as Medallas de Investigación a cinco científicas e científicos da nosa comunidade. O presidente da Academia destacou que 'Aida Fernández Ríos foi unha investigadora capaz de identificar problemas relevantes e de situalos nun contexto internacional, converténdose nunha científica respectada moito máis alá de Galicia.
