domingo, 13 de septiembre de 2026
A campaña de inverno céntrase en identificar os perigos máis habituais desta estación e en lembrar que, con pequenos xestos e moito sentido común, é posible protexer tanto ás persoas como aos bens.
Quentar o fogar sen riscos: lume e gases perigosos
Cando o frío aperta, buscamos confort térmico no interior das vivendas. Porén, os sistemas de calefacción poden converterse nunha fonte de perigo se non se utilizan correctamente. Desde o 112 Galicia lémbrase a necesidade de extremar as medidas de seguridade para evitar incendios domésticos e intoxicacións por monóxido de carbono.
Incendios no fogar: prevención ante todo
O lume require control constante. En Galicia son frecuentes as lareiras, cociñas de leña e estufas tradicionais, pero un uso inadecuado pode provocar accidentes graves.
Un dos factores máis perigosos é a acumulación de feluxe nos condutos das chemineas. Estes restos son altamente inflamables e, se non se eliminan mediante unha limpeza periódica, poden prender e facer que o lume se propague con rapidez, sobre todo en casas con estruturas de madeira.
- Nunca deixes o lume sen atención: antes de durmir ou saír da casa, asegúrate de que está completamente apagado.
- Mantén distancias de seguridade: arredor de calquera foco de calor debe haber espazo libre. Non seques roupa enriba das estufas nin sitúes mobles, cortinas ou alfombras a menos dun metro.
Monóxido de carbono: un risco silencioso
Ademais do lume, existe un perigo invisible: o monóxido de carbono. Este gas prodúcese cando a combustión non é correcta e pode acumularse en estancias mal ventiladas.
- Síntomas a ter en conta: dor de cabeza, mareo, náuseas, cansazo extremo ou somnolencia. Poden confundirse con malestar xeral, pero requiren actuación inmediata.
- Ventilación constante: é fundamental renovar o aire con frecuencia. Non bloquees as entradas de ventilación e, se usas braseiros ou estufas de leña, deixa unha porta ou xanela entreaberta. Ante calquera sospeita, ventila de inmediato e sae ao exterior.
Conducir no inverno: adaptar a marcha ás condicións
A xeografía galega e o clima fan que as estradas presenten dificultades adicionais no inverno. Chuvia persistente, xeo ou neve obrigan a extremar a prudencia ao volante.
Antes de saír: revisión do vehículo
A seguridade comeza antes de iniciar a marcha. No inverno, o coche require atención especial:
- Comproba o estado e a presión dos pneumáticos.
- Revisa o nivel de anticonxelante, o funcionamento do limpaparabrisas e das luces.
Se circulas por zonas elevadas, leva pneumáticos de inverno e cadeas e asegúrate de saber utilizalas.
Atención ás placas de xeo
O xeo é especialmente perigoso porque pode pasar desapercibido no asfalto.
- Momentos críticos: primeiras horas do día e da noite, zonas sombrías, pontes e accesos a túneles.
- Como reaccionar: mantén a calma, evita freadas bruscas e movementos violentos do volante. Solta suavemente o acelerador ata recuperar adherencia.
Condución segura con mal tempo
- Aumenta a distancia de seguridade.
- Evita aceleracións e freadas bruscas.
- En neve ou xeo, arrinca con marchas longas e utiliza o freo motor en descensos.
- Con vento forte, reduce a velocidade e suxeita firmemente o volante, sobre todo ao adiantar camións ou ao saír de túneles.
Levar no coche un pequeno kit de emerxencia con manta, roupa de abrigo, auga, cargador de móbil e combustible suficiente pode resultar clave en caso de incidencia.
Climatoloxía adversa e coidado persoal
Os temporais non só afectan ás vivendas ou á circulación, tamén inflúen na nosa saúde e nas actividades diarias.
- Na rúa: durante alertas por vento, evita zonas con risco de desprendementos como cornixas, árbores vellas ou estruturas inestables. No litoral, non te achegues a diques nin zonas expostas ao mar.
- Roupa axeitada: é mellor vestir por capas. Protexe cabeza, mans e pés e emprega calzado antiescorregadizo.
- Persoas vulnerables: nenos e maiores sofren máis os efectos do frío. É importante comprobar que as persoas maiores, especialmente se viven soas, teñen calefacción suficiente e empregan os sistemas de forma segura.
Episodios de vento forte
Os refachos intensos son habituais no inverno e poden causar danos importantes.
- Na vivenda: asegura obxectos en balcóns, fiestras e tellados antes da chegada dun temporal.
- No exterior: mantén distancia de edificios antigos, valos publicitarios, árbores e zonas en obras.
Chuvias abondosas e inundacións
As precipitacións intensas poden provocar asolagamentos en pouco tempo.
- Limpa canlóns e desaugadoiros con antelación.
- Se vives nunha zona susceptible de inundación, traslada obxectos valiosos e produtos perigosos a plantas altas.
- Nunca cruces zonas cubertas de auga, nin a pé nin en coche. A profundidade e a forza da corrente poden enganar.
Actividades na montaña durante o inverno
O frío tamén é tempo de lecer ao aire libre, pero require planificación.
- Ten en conta que anoitece cedo e calcula a duración das rutas.
- Informa a alguén do teu itinerario.
- Leva o móbil cargado, batería externa, roupa axeitada e calzado de montaña.
Manterse informados salva vidas
Para concluír, o 112 Galicia insiste na importancia de seguir as canles oficiais de información. Antes de viaxar ou realizar actividades no exterior, consulta a previsión meteorolóxica e as alertas activas a través da Axega e dos medios de comunicación.
E lembra: ante calquera situación de perigo, chama ao 1-1-2. Neste inverno, a mellor protección é actuar con prudencia.
A reposición dálle continuidade á aposta do Centro Dramático Galego por recuperar títulos do seu repertorio que manteñen a demanda do público máis alá da súa primeira exhibición. No caso de 'A serie clopen', as 33 funcións ofrecidas no Salón Teatro durante a súa estrea en 2025 reuniron arredor de 5.500 espectadores, antes de iniciar unha serie de representacións por outros espazos de Galicia e de Portugal. O regreso aos escenarios prodúcese despois do recoñecemento acadado pola produción nos Premios de Teatro María Casares, pois obtivo dous galardóns: Natalia Pajarito, como mellor actriz protagonista, e Marta Alonso Tejada, pola dirección de movemento.
O sábado 12 de setembro chegará un dos pratos fortes do ciclo: A Movida Viguesa e a Homenaxe a Golpes Bajos. Esta histórica xornada supón o regreso aos escenarios de artistas fundamentais para comprender a historia musical de Vigo e de Galicia. Bandas e músicos que naceron na cidade e que, desde aquí, conquistaron o panorama nacional e mesmo internacional. Reunir nun mesmo escenario a Golpes Bajos, Semen Up, Miguel Costas de Siniestro Total, Killer Barbies e Stoned at Pompei é moito máis que un concerto: é unha homenaxe a unha xeración irrepetible e a unha cidade que marcou unha época dentro da música española.
