domingo, 1 de noviembre de 2026
A iniciativa, organizada pola Sociedade de Artistas Intérpretes ou Executantes (AIE), conta co patrocinio da Xunta para garantir a presenza de tres artistas ou bandas de Galicia en cada quenda de programación semestral.
Esta colaboración do Goberno galego insírese, á súa vez, no conxunto de accións de promoción e intercambio desenvolvidas pola Consellería de Cultura, Lingua e Xuventude para impulsar a circulación e o posicionamento dos nosos grupos e artistas no panorama estatal e internacional.
Os concertos galegos desta primeira metade do ano arrancan mañá venres 9 en Tafalla (Navarra) con Mad Martin Trio, que tamén tocará o sábado 10 en Logroño, o 7 de marzo en Huesca e o 18 de marzo en Alacante. Pola súa banda, Eladio y Los Seres Queridos actuará en Bilbao o 20 de febreiro, en Oviedo o 21 de ese mes, en Palencia o 17 de abril e en Valladolid o 18; mentres De Ninghures levará o seu directo a Bilbao o 27 de febreiro, Madrid o 10 de abril, Donostia o 17 dese mes e Barcelona o 29 de maio.
Mad Martin Trío é unha das bandas máis sólidas do rock and roll clásico da escena galega e estatal, recoñecida pola potencia do seu directo, mentres que Eladio y Los Seres Queridos celebra 20 anos de traxectoria como unha das formacións máis estables do pop galego con gran proxección e cun repertorio construído ao longo de seis discos. De Ninghures, unha das referencias da escena galega actual, combina a música tradicional con ritmos doutras culturas e presenta novo espectáculo baixo o título Feira.
No anterior semestre, a representación galega en AIEnRUTa-Artistas estivo a cargo de The Rapants, Boyanka Kostova e Kyr4, con actuacións xa celebradas en León, Barcelona, Valladolid, Madrid, Cáceres, Zaragoza, Zamora, Málaga, Sevilla, Murcia e Oviedo.
Con 20 anos de historia, este programa estatal e pioneiro no ámbito da música en directo naceu para facilitar o intercambio cultural entre comunidades e soster un circuíto estable de salas. Desde a súa posta en marcha, ten organizado preto de 5.500 concertos, con máis de 1.000 artistas e grupos, en máis de 550 locais e 140 cidades.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
O informe da Dirección Xeral de Saúde Pública da Consellería de Sanidade sobre a actividade das infeccións respiratorias agudas referido á semana que rematou o 25 de outubro reflicte que a actividade gripal na comunidade mantén o seu nivel basal con tendencia crecente, constatando un incremento na dispensación de antigripais nas farmacias galegas. En concreto, a taxa de dispensación de antigripais nas farmacias aumentou un 38,9 % na última semana, mentres que a de probas de antíxenos se reduciu nun 17,9 %, tal e como informan as oficinas de farmacia integradas na rede sentinela impulsada pola Xunta, co obxectivo de anticipar a evolución dos virus respiratorios na comunidade.
