domingo, 13 de septiembre de 2026
O director xeral de Familia, Infancia e Dinamización Demográfica, Jacobo Rey, participou hoxe na sesión plenaria do Observatorio Galego de Dinamización Demográfica na que se deu conta dos últimos datos de poboación que amosan que Galicia continúa un ano máis cunha tendencia positiva á alza tras rexistrarse un saldo migratorio, segundo as últimas estatísticas oficiais, de máis de 30.000 persoas.
Jacobo Rey explicou que os últimos datos publicados esta semana con respecto ao ano 2024 reafirman a tendencia a alza que se está vivindo en Galicia nos últimos anos. Así, explicou que as cifras amosan un incremento de 30.300 persoas que entraron a residir na comunidade fronte ás que saíron, de feito nos últimos tres anos o cómputo foi de 83.300.
Neste sentido, o director xeral lembrou que os datos provisionais do ano 2025 tamén inciden no aumento da natalidade que se mantén en positivo; polo que desde a Xunta, avanzou, seguirase traballando para consolidar a comunidade como un referente nos recursos da infancia, especialmente coas medidas como a gratuidade das escolas infantís ou o bono concilia familia que son esenciais para fomentar e apoiar a corresponsabilidade e a conciliación.
Ademais, o director xeral fixo fincapé en que estes datos demográficos contrastan coas predicións establecidas hai dez anos ao reverter as cifras negativas pronosticadas. A maiores, este ano Galicia conseguir acadar unha nova cifra récord de esperanza de vida, que superou por vez primeira os 84 anos de idade e nos retos que supón para as políticas públicas.
Precisamente, o pleno do Observatorio avaliou un informe elaborado por profesionais investigadores das universidades galegas que afonda na lonxevidade e o envellecemento da poboación en todo o territorio galego, ao tempo que se dan a coñecer desafíos e posibles necesidades que isto traerá para o futuro. Por iso, Jacobo Rey explicou que é fundamental a cooperación entre as administracións e o tecido social para poder crear espazos de diálogo e reflexión que permitan seguir avanzando nunha Galicia Calidade que represente os dereitos de todas as xeracións.
A reposición dálle continuidade á aposta do Centro Dramático Galego por recuperar títulos do seu repertorio que manteñen a demanda do público máis alá da súa primeira exhibición. No caso de 'A serie clopen', as 33 funcións ofrecidas no Salón Teatro durante a súa estrea en 2025 reuniron arredor de 5.500 espectadores, antes de iniciar unha serie de representacións por outros espazos de Galicia e de Portugal. O regreso aos escenarios prodúcese despois do recoñecemento acadado pola produción nos Premios de Teatro María Casares, pois obtivo dous galardóns: Natalia Pajarito, como mellor actriz protagonista, e Marta Alonso Tejada, pola dirección de movemento.
O sábado 12 de setembro chegará un dos pratos fortes do ciclo: A Movida Viguesa e a Homenaxe a Golpes Bajos. Esta histórica xornada supón o regreso aos escenarios de artistas fundamentais para comprender a historia musical de Vigo e de Galicia. Bandas e músicos que naceron na cidade e que, desde aquí, conquistaron o panorama nacional e mesmo internacional. Reunir nun mesmo escenario a Golpes Bajos, Semen Up, Miguel Costas de Siniestro Total, Killer Barbies e Stoned at Pompei é moito máis que un concerto: é unha homenaxe a unha xeración irrepetible e a unha cidade que marcou unha época dentro da música española.
