sábado, 10 de octubre de 2026
Miguel Corgos lembrou que todas as CC.AA. están infrafinanciadas e mentres o problema medra cada ano, a reforma do Sistema de Financiamento Autonómico é urxente e é o Goberno central quen ten que presentar un novo modelo asumible para as comunidades.
Durante a súa participación na inauguración das XIII Xornadas da Rede de Investigadores en Financiamento Autonómico e Descentralización Financeira (RIFDE) -que se celebran en Valencia- e na mesa redonda O punto de vista das CC.AA., o responsable da Facenda galega recordou que Galicia, nas condicións actuais, precisa un mínimo de 500 millóns de euros adicionais para cubrir os custes de prestación dos servizos, máis caros pola dispersión da poboación, única en España.
Miguel Corgos puxo en valor a responsabilidade das CC.A.A. e amosouse convencido de que todas saberán ceder se o novo modelo que o Goberno central presenta ten máis recursos e pondera de maneira axeitada os custos de prestación dos servizos.
A condonación non incrementa a capacidade de gasto
O conselleiro de Facenda e Administración Pública insistiu unha vez máis en que a condonación da débeda debería estar fóra do taboleiro. Galicia non ten un problema de débeda, e a condonación nin resolvería as eivas de financiamento nin permitiría maior capacidade de gasto. A proposta, ademais, incrementaría en 600 millóns de euros a débeda para a cidadanía galega, xa que se retirarían 4.000 M da débeda autonómica pero habería que asumir 4.600 M do conxunto do Estado.
Miguel Corgos quixo recalcar tamén que a Comunidade galega non depende da votación da senda de estabilidade para ter máis ingresos, xa que o déficit proposto (0,1%) no Consello de Política Fiscal e Financeira é incompatible coa regra de gasto, polo que non se podería dispor de maiores recursos.
Miguel Corgos rematou poñendo en valor as xornadas RIFDE, que baixo o lema Finanzas autonómicas: Son sostibles as traxectorias de gasto? consolídanse como foro independente de reflexión e transferencia de coñecemento sobre o modelo de descentralización financeira.
Foi presentada a novena edición de Intersección, Festival Internacional de Cine da Coruña, celebrada nos Cantones Cines. O festival desenvolverase do 13 ao 17 de outubro cunha programación que combina proxeccións, exposicións, formación e encontros profesionais arredor das novas linguaxes cinematográficas. Así, as seccións competitivas Galicia, Internacional e Fulgor achegarán ao público obras afastadas dos circuítos comerciais habituais e novas voces da creación audiovisual contemporánea. En concreto, a sección Internacional reúne 27 filmes procedentes de 22 países, entre os que figuran catro estreas mundiais, 17 en España e cinco en Galicia. As propostas exploran cuestións como a tecnoloxía, a memoria, o territorio e a identidade desde linguaxes e xeografías diversas.
A Real Academia Galega de Ciencias (RAGC) celebrou en Santiago, no Salón Nobre do Colexio de Fonseca, o acto do Día da Ciencia en Galicia, no que se homenaxeou á oceanógrafa Aida Fernández Ríos (Vigo, 1947 - Moaña, 2015) como Científica Galega 2026. Ademais, entregáronse as Medallas de Investigación a cinco científicas e científicos da nosa comunidade. O presidente da Academia destacou que 'Aida Fernández Ríos foi unha investigadora capaz de identificar problemas relevantes e de situalos nun contexto internacional, converténdose nunha científica respectada moito máis alá de Galicia.
