sábado, 10 de octubre de 2026
A campaña de vacinación fronte á gripe da Xunta acada xa as 243.320 persoas inmunizadas.
O conselleiro de Sanidade, Antonio Gómez Caamaño, vacinouse este mediodía fronte á gripe e á covid no punto de atención continuada de Santiago, onde estivo acompañado polo xerente da área sanitaria de Santiago de Compostela e Barbanza, Ángel Facio, e responsables de enfermería e de coordinación da campaña de vacinación na área compostelá.
A campaña de vacinación fronte á gripe e a covid está activa desde o pasado 29 de setembro e ata o 31 de decembro, tendo como poboación diana as persoas maiores, os menores de 11 anos e, por exposición laboral, os profesionais da sanidade.
Unha das novidades desta campaña é que todas as persoas chamadas a vacinarse poden facelo no seu propio centro de saúde ou consultorio.
Ata o de agora, a Consellería de Sanidade enviou sms de citación a máis do 60 % dos maiores de 70 anos e a máis do 50 % das familias de nenas e nenos de 6 meses a 11 anos.
As mulleres embarazadas ou no puerperio e menos de 60 anos con patoloxías de risco poden solicitar autocita con enfermería, no seu centro de atención primaria ou a través da aplicación Sergas Móbil, para vacinarse a partir da próxima semana.
A cobertura antigripal en maiores de 80 anos é actualmente do 53,30 % e sobe ao 65,17 % en maiores de 85.
A partir do 10 de novembro comezará a vacinación de persoas de 60 a 69 anos.
A cobertura de vacinación do persoal sanitario fronte á gripe, comezada o pasado día 20 de outubro, supera nestes momentos o 27 %.
A aposta pola prevención da Xunta materialízase nun incremento constante no orzamento dedicado á vacinación, que en 2026 chegará aos 48,2 millóns de euros, o que supón unha suba de 7,2 millóns.
Foi presentada a novena edición de Intersección, Festival Internacional de Cine da Coruña, celebrada nos Cantones Cines. O festival desenvolverase do 13 ao 17 de outubro cunha programación que combina proxeccións, exposicións, formación e encontros profesionais arredor das novas linguaxes cinematográficas. Así, as seccións competitivas Galicia, Internacional e Fulgor achegarán ao público obras afastadas dos circuítos comerciais habituais e novas voces da creación audiovisual contemporánea. En concreto, a sección Internacional reúne 27 filmes procedentes de 22 países, entre os que figuran catro estreas mundiais, 17 en España e cinco en Galicia. As propostas exploran cuestións como a tecnoloxía, a memoria, o territorio e a identidade desde linguaxes e xeografías diversas.
A Real Academia Galega de Ciencias (RAGC) celebrou en Santiago, no Salón Nobre do Colexio de Fonseca, o acto do Día da Ciencia en Galicia, no que se homenaxeou á oceanógrafa Aida Fernández Ríos (Vigo, 1947 - Moaña, 2015) como Científica Galega 2026. Ademais, entregáronse as Medallas de Investigación a cinco científicas e científicos da nosa comunidade. O presidente da Academia destacou que 'Aida Fernández Ríos foi unha investigadora capaz de identificar problemas relevantes e de situalos nun contexto internacional, converténdose nunha científica respectada moito máis alá de Galicia.
