martes, 27 de octubre de 2026
O director de Turismo de Galicia, Xosé Merelles, anunciou esta mañá a adhesión de Galicia, e concretamente da xestión do turismo rural, aos principios da Carta Internacional de ICOMOS para o Turismo Cultural Patrimonial de 2022. Xosé Merelles mantivo un encontro coa vicepresidenta do Comité Científico Internacional de Turismo Cultural de ICOMOS e coordinadora da Carta, Celia Martínez Yáñez, que se atopa visitando a comunidade xunto a outros membros do Comité, para reflexionar, debater e apoiar a aplicación do documento cos axentes implicados na xestión do turismo e o patrimonio en Galicia.
Segundo destacou o director de Turismo de Galicia con este encontro a comunidade galega súmase así aos lugares comprometidos con esta recomendación internacional, que ten unha filosofía transformadora e rexenerativa que a converteron nun referente internacional entre os sitios patrimoniais e comunidades que perseguen un turismo responsable, transformador e sostible.
A Carta de Turismo Cultural Patrimonial 2022 é unha guía para alcanzar un equilibrio entre a actividade turística, a participación dos residentes e demais sectores implicados, e a conservación e goce dos valores do lugar, así como a mitigación dos impactos climáticos e ambientais. O documento céntrase principalmente na xestión e planificación, a cooperación, a gobernanza compartida, a interpretación do patrimonio ou a sustentabilidade na planificación e xestión, entre outros.
Sete principios da Carta
Manifestando publicamente a súa adhesión aos sete principios da Carta, Turismo de Galicia mostra o seu compromiso por situar a protección e conservación do patrimonio cultural no centro da planificación e xestión responsable do turismo cultural; xestionar o turismo nos lugares do patrimonio cultural a través de plans de xestión baseados na capacidade de acollida e outros instrumentos de planificación e vixilancia dos efectos do turismo; e enriquecer a concienciación pública e a experiencia dos visitantes mediante unha interpretación e presentación sensibles do patrimonio cultural.
Tamén aposta por recoñecer e reforzar os dereitos das comunidades residentes mediante o acceso e a gobernanza participativa; sensibilizar e reforzar a cooperación para a conservación do patrimonio cultural; aumentar a resiliencia das comunidades e do patrimonio cultural; e integrar a acción climática e as medidas de sustentabilidade na xestión do turismo cultural e o patrimonio cultural.
Durante o encontro, o director de Turismo de Galicia destacou o bo momento no que se atopa Galicia con máis 3,9M de visitantes desde xaneiro a xullo deste ano e unha riqueza repartida polo territorio e de forma desestacionalizada.
Ademais, destacou os recursos naturais, paisaxísticos e patrimoniais que atesouran destinos como Ribeira Sacra, Os Ancares e O Courel, así como do interior da provincia de Ourense, que dan conta dos valores defendidos pola Carta Internacional de ICOMOS para o Turismo Cultural Patrimonial 2022.
Xosé Merelles destacou que outros lugares -como cidades ou zonas marítimas, e lexislacións de turismo a nivel internacional- xa adoptaron esta Carta. Neste caso, Galicia, cos seus bens culturais e ambientais, especialmente os rurais e de interior, pretende ser exemplar e pioneira converténdose nun modelo turístico cultural sostible e consciente que se poida replicar noutros lugares tamén de interior.
Precisamente, o director de Turismo lembrou que a comunidade galega conta, dentro das actuacións no campo da sustentabilidade turística, con varios plans de sustentabilidade turística en destino con actuacións ao redor da mobilidade, protección dos bens culturais e ambientais e outros recursos, compatibilidade de usos, participación veciñal e avaliación da capacidade de carga e acollida turística.
O proxecto Xenoma Galicia, que conta cun investimento de 20 millóns de euros, ten por obxecto recompilar o ADN de 400.000 galegos para identificar os xenes relacionados co cancro de mama e ovario hereditario, a síndrome de Lynch e a hipercolesterolemia familiar. Ata o de agora, foron analizadas 3.112 mostras biolóxicas. En concreto, 1.037 mostras de sangue na primeira pilotaxe do proxecto, 796 de saliva no segundo piloto e, coa primeira fase do proxecto en marcha, 1.279 mostras dos voluntarios dos primeiros distritos participantes. A análise das mostras destes 1.279 participantes da fase 1 permitiu detectar 25 novos casos positivos. En concreto, 14 participantes deron positivo en cancro de mama e ovario hereditario, dous na síndrome de Lynch e nove en hipercolesterolemia familiar.
A Pedreira e Fillas de Cassandra estarán presentes no Womex 2026, o máis importante encontro mundial das músicas folk e de raíz que se celebra ata este domingo en Las Palmas de Gran Canaria. Trátase dunha iniciativa que ofrece aos artistas e ás empresas galegas un espazo para dar a coñecer o seu traballo ante programadores, festivais, axencias de contratación e outros profesionais de diferentes países. A artista foi escollida por un xurado internacional independente para formar parte dos Official Showcases, a selección oficial de concertos coa que Womex achega aos profesionais propostas das músicas do mundo.
