miércoles, 15 de abril de 2026
Galicia acada máximos históricos no eido turístico o pasado ano 2024 cun volume de viaxeiros que supera os 8,2 millóns de turistas aloxados en establecementos da Comunidade. Así o puxo de manifesto o director de Turismo de Galicia, Xosé Merelles, durante a visita á oficina de turismo de Parada de Sil, onde se referiu aos datos feitos públicos hoxe polo Instituto Nacional de Estatística (INE). Neste sentido, salientou que por primeira vez na serie histórica a Comunidade galega achégase aos 7,3 millóns de viaxeiros en 2024 aloxados en establecementos hoteleiros e extrahoteleiros galegos aos que hai que sumar os viaxeiros aloxados en vivendas de uso turístico.
O turismo na Comunidade galega está a medrar cuantitativa e cualitativamente, asegurou destacando o incremento na rendibilidade económica hoteleira e tamén no gasto realizado polo turista internacional ao tempo que salientou que a actividade turística está a xerar emprego de maior calidade e menos temporalidade.
En canto ao nivel de demanda, segundo o INE, este superou os 13,6 millóns de noites con 115 mil novas noites respecto do indicador de 2023. Ademais, a Comunidade consolida o seu crecemento desestacionalizado con incrementos ao longo do ano en meses fóra de tempada como maio cun incremento do 11,1% e novembro co 12,2% de suba.
Os datos de peche de 2024 tamén falan dun importante peso do mercado internacional que se sitúa no 30% e un crecemento de viaxeiros procedentes de Estados Unidos (+22,1%), Italia (11,8%) e Alemaña (5%) .O gasto medio do turista internacional que visita Galicia aos 170 euros, experimentando un crecemento do 14,3% con respecto a 2023.
En canto á rendibilidade hoteleira, estímase que o sector obtivo uns ingresos nominais totais de 432 millóns de euros, un 6,7% máis que en 2023. Ademais, o emprego xerado en Galicia ao redor do turismo continúa a medrar en afiliacións á seguridade social a un ritmo do 3,1% e tamén está a ser un emprego de maior calidade, gañando en estabilidade e en redución de taxas de temporalidade, colocándose en mínimos históricos.
O xornalista galego de elDiario.es José Precedo, que defendeu o dereito ao segredo xornalístico ante o Tribunal Supremo, é o gañador do XXII Premio Xornalistas de Liberdade de Prensa, convocado polo Colexio Profesional de Xornalistas de Galicia coa colaboración do Concello de Pontevedra. Precedo recibirá o premio en Pontevedra o vindeiro 9 de maio na Casa Consistorial. A sala de prensa do Concello de Pontevedra acolleu o anuncio da candidatura gañadora da vixésimo primeira edición do Premio Xornalistas de Liberdade de Prensa, organizado polo Colexio Profesional de Xornalistas de Galicia coa colaboración do Concello de Pontevedra. O acto contou coa presenza do alcalde Miguel Anxo Fernández Lores, a decana do Colexio Belén Leal e o secretario do premio Darío Janeiro.
Esta edición do Encontro de Artes Novas contará coa participación de talentos recoñecidos como a escritora, comisaria e podcaster Sonia Fernández Pan, que realiza desde 2021 a serie de podcasts The Tale and The Tongue co Instituto de Arte, Xénero e Natureza da Escola Superior de Deseño e Arte de Basilea. Ou a dupla artística Clo-Plas, unha proposta sonora única e radical da poeta e xornalista Xiana Arias e o artista e investigador Berio Molina, que fusionan versos e electro-pop minimalista coa oralidade popular da Fonsagrada. O programa inclúe tamén cunha conversa co profesor e investigador en Filosofía da Tecnoloxía, Pablo Sanguinetti, autor do libro Tecnohumanismo. Por un diseño narrativo y estético de la inteligencia artificial e de numerosos artigos académicos e divulgativos sobre a intersección entre tecnoloxía, humanidades e creatividade.
