sábado, 7 de noviembre de 2026
Entre elas, Habitar (2023), Véxote (2024), To Bird or Not To Bird (2023), Non te vexo (2023), Queimar cando morra (2024) e Alguén me chamou serpe negra (2024).
Así e co apoio da Consellería de Cultura, Lingua e Xuventude, amplíase o foco galego neste festival que dirixe a produtora catalá Joana Granero. O obxectivo é contribuír a reforzar a oferta cultural de Galicia na capital británica, no marco dun dos eventos que máis sona ten entre a comunidade española e foránea, e na liña do traballo desenvolvido desde 2015 polo colectivo Galician Film Forum como espazo de exhibición do noso cine en Londres.
Encontros con Janet Novas e Emilio Fonseca
A programación seleccionada constata a realidade que vive o audiovisual galego, cunha presenza destacada en festivais internacionais, onde colleita recoñecementos como a Cuncha de Ouro acadada por O Corno na anterior edición do Festival de San Sebastián. A longa dirixida por Jaione Camborda poderá verse no London Spanish Film Festival o vindeiro domingo 22, ás 18,00 h., e a sesión incluirá un encontro con Janet Novas, gañadora do Goya á mellor actriz revelación polo seu papel nesta película.
O luns 23, á mesma hora, exhibirase o documental Salvaxe, Salvaxe, de Emilio Fonseca, quen tamén participará nun coloquio posterior. E o martes 24, a partir das 18,30 h., será a quenda das curtas Habitar, de Anxos Fazáns e gañadora este ano do premio da MICE (Mostra Internacional de Cinema Etnográfico) do Museo do Pobo Galego; Queimar cando morra, de Inés Pintor; Non te vexo, de Xacio Baño; To Bird or Not To Bird, de Martín Romero e premiada na última edición dos Goya; Alguén me chamou serpe negra, unha animación de Borja Santomé, e Véxote, de Óscar Pardo. A fórmula de exhibición acordada co festival para estes oito títulos é a versión orixinal galega con subtítulos en inglés.
Ademais da escolma apoiada pola Xunta, tamén forman parte da fiestra galega no 20º London Spanish Film Festival outras tres longametraxes con participación galega. Trátase da recentemente estreada Justicia Artificial, de Simón Casal; Tratamos demasiado bien a las mujeres, a ópera prima de Clara Bilbao, e a primeira longa de animación de Isabel Herguera, El sueño de la sultana.
Case 40 títulos no programa
Ao longo de oito días, o certame londiniense vai proxectar case 40 películas nas sedes do Ciné Lumière e Riverside Studios, cun programa de filmes a competición, mostras e retrospectivas, ademais das seccións dedicadas a recoller as distintas cinematografías estatais, con espazos específicos para as producións de Galicia, País Vasco e Cataluña.
Unhas 5000 persoas asisten ao festival cada ano, cunha mestura na que destaca o público británico, seguido do español e do latino. Letters from Galicia é, polo tanto, un excelente escaparate do audiovisual galego en Gran Bretaña, que permite afondar na promoción exterior do noso cinema a través de historias propias.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
