domingo, 1 de noviembre de 2026
O secretario xeral da Lingua, Valentín García, participou hoxe na presentación da quinta edición do Maré. Festival de Músicas e Artes Atlánticas onde salientou o carácter multicultural que converterá a cidade de Santiago de Compostela nun punto de encontro cultural e lingüístico.
Valentín García puxo en valor a colaboración da Xunta de Galicia con esta cita que contará cunha trintena de artistas chegados doutros países como Alemaña, Angola, Brasil, Estonia, México, Mozambique, Palestina ou Portugal. A iniciativa que se celebra dende o día 25 pon de manifesto esta diversidade lingüística cunha programación específica polo Día Internacional das Linguas o día 26.
O representante da Consellería de Cultura, Lingua e Xuventude destacou a grande oferta cultural que ten Galicia, facendo da nosa comunidade un referente en canto a festivais. Deste xeito, salientou a colaboración da Xunta de Galicia co Gozo Fest e o Son do Camiño, dous acontecementos que acolleu a capital galega e que foron quen de complementar e mellorar a calidade das ofertas culturais na comunidade.
O Maré. Festival de Música e Artes Atlánticas do día 25 ata o 29 de setembro acollerá unha ampla oferta de iniciativas que van desde a música ata as artes escénicas. As actividades terán lugar en diferentes espazos como a Sala Capitol, a praza Mazarelos ou o Teatro Principal que irán dende os concertos, que ocuparán a maior parte das accións, ata representacións teatrais, obradoiros, encontros, artesanía, poesía ou propostas na rúa para a cativada.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
O informe da Dirección Xeral de Saúde Pública da Consellería de Sanidade sobre a actividade das infeccións respiratorias agudas referido á semana que rematou o 25 de outubro reflicte que a actividade gripal na comunidade mantén o seu nivel basal con tendencia crecente, constatando un incremento na dispensación de antigripais nas farmacias galegas. En concreto, a taxa de dispensación de antigripais nas farmacias aumentou un 38,9 % na última semana, mentres que a de probas de antíxenos se reduciu nun 17,9 %, tal e como informan as oficinas de farmacia integradas na rede sentinela impulsada pola Xunta, co obxectivo de anticipar a evolución dos virus respiratorios na comunidade.
