viernes, 6 de noviembre de 2026
O festival de monicreques tradicionais Titiriberia anunciou hoxe a programación completa da súa novena edición, que desenvolverá en Rianxo do 12 ao 18 de agosto e para a que volve contar co apoio económico da Xunta de Galicia a través da convocatoria anual de subvencións a mostras profesionais de artes escénicas. Desta volta, son 20 as compañías que compoñen a súa carteleira, que inclúe 30 funcións, ademais de obradoiros, mesas redondas e proxeccións.
O director da Axencia Galega das Industrias Culturais, Jacobo Sutil, participou nesta presentación xunto co Larraitz Urruzola, directora artística do festival que promove a asociación cultural Morreu o Demo, e os representantes do resto de entidades colaboradoras. Na súa intervención, o representante da Consellería de Cultura, Lingua e Xuventude felicitou a organización polo programa deste ano, que ademais de servir de escaparate para numerosas producións galegas, achega á nosa Comunidade outras interesantes propostas procedentes de República Checa, Portugal, Andalucía, Madrid e País Vasco.
Incremento das axudas ás mostras escénicas
Sutil explicou que a colaboración con Titiriberia insírese na liña de apoio específico a mostras de artes escénicas, que a Xunta canaliza anualmente a través dunha convocatoria de subvencións. En 2024 foron 12 os festivais beneficiarios destas axudas, que incrementaron a súa dotación en máis dun 30% respecto a 2023 para situarse nos 280.000 euros.
O Goberno galego recoñece así o papel deste tipo de certames profesionais como dinamizadores culturais, ademais de como plataforma de exhibición da máis recente produción escénica de Galicia. É o caso do Titiriberia, onde o vindeiro día 15 recalará De Vilatriste a Vilalegre, coprodución do Centro Dramático Galego con Teatro ó Cubo coa que a compañía pública está a compartir o seu 40º aniversario co público dun cento de concellos de toda Galicia.
Viravolta Títeres, Títeres Alakrán, Teatro Airiños ou Trécola son outras das formacións galegas que representarán as súas últimas propostas na mostra de Rianxo, que inclúe ademais dúas producións propias e sete coproducións con diferentes compañías.
A principal convidada internacional deste ano será a República Checa da man de dous recoñecidos especialistas na tradición histórica dos monicreques nese país, Marie Jirásková e Pavel Jirásek, cun obradoiro, unha exposición, visitas guiadas, presentacións de libros e unhas sesión audiovisual.
Outro dos pratos fortes deste ano será a chamada Feira Vella, que acollerá as estreas de varias propostas escénicas e na que o público poderá gozar, ademais, de xogos antigos e atraccións de feira tradicionais.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
